သျှမ်းမြောက် သီပေါမြို့ ဘော်ကြိုဘုန်းကြီးကျောင်းတွင် ရှောက်ရှိခိုလှုံနေသော စစ်ဘေးရှောင် ပြည်သူတချို့ နေရပ်ကို ပြန်သွားကြောင်း သတင်းသိရသည်။
ပြီးခဲ့သည့် ဇန်နဝါရီ (၁၉)ရက်နေ့က သီပေါမြို့နယ် ကျင်သီ၊ ပုံဖမ်းနှင့် ကြံခင်းကျေးရွာတို့မှ ဘော်ကြို ဘုန်းကြီးကျောင်း သို့ စစ်ဘေးရှောင်လာရသည့် ပြည်သူ တချို့သည် နေအိမ်၊ ကျွဲ၊ နွားနှင့် လယ်ယာစိုက်ခင်းများကို စိတ်ပူသည့်အတွက် နေရပ်သို့ ပြန်သွားကြကြောင်း သိရသည်။
“ကျင်သီ၊ ပုံဖမ်းနဲ့ ကြံခင်း ကျေးရွာ ဒေသခံတချို့ ပြန်သွားကြတယ်၊ နမ့်အွန်နဲ့ တခြားရွာက ဒေသခံတွေတော့ မပြန်နိုင်သေးဘူး၊ သူတို့ဒေသမှာက ခုထိ လက်နက်ကိုင်တွေ စစ်ရေးတင်းမာတဲ့ နေရာဆိုတော့ မပြန်ရဲသေးဘူး၊ ကျောက်မဲ နဲ့ သီပေါ မြို့နယ်အစပ်မှာပါ” ဟု စစ်ရှောင်များကို ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲ – သီပေါမြို့နယ် အစပ်တွင် တိုင်းရင်းသားလက်နက်ကိုင်တပ်တွေဖြစ်သည့် RCSS/SSA နှင့် တပ်ပေါင်းစုတို့ တိုက်ပွဲပြင်းထန်ခဲ့မှုကြောင့် ပြီးခဲ့သည့် ဇန်နဝါရီ ၉ ရက်နေ့ကတည်းက သီပေါ ဘော်ကြိုဘုန်းကြီးကျောင်းသို့ တိမ်းရှောင်ထွက်ပြေးခဲ့ရတာဖြစ်သည်။
ထိုမြို့နယ်နှစ်ခု အစပ်တွင် တိုင်းရင်းသားလက်နက်ကိုင်တပ်အချင်းချင်း စစ်ရေးတင်းမာနေဆဲဖြစ်သည့်အတွက် ကျောက်မဲမြို့ရှိ စစ်ဘေးရှောင်များ နေရပ်သို့ မပြန်နိုင်သေးသည့်အပြင် စစ်ဘေးတိမ်းရှောင်ရသည့် ဒေသခံပြည်သူ နေ့စဉ်တိုးလာနေဆဲဖြစ်ကြောင်း စစ်ရှောင်ကူညီသူများထံမှ သိရသည်။
Leave a Comments