မိုင်းကိုင်စစ်ရှောင် (၂၀၀၀)ကျော်အတွက် စားနပ်ရိက္ခာ နှင့် ကိုဗစ်-၁၉ ကာကွယ်ရေးပစ္စည်းများ လိုအပ်နေ

0

သျှမ်းပြည်တောင်ပိုင်း မိုင်းကိုင်မြို့နယ်အတွင်း တိုက်ပွဲတင်းမာမှုကြောင့် စစ်ရှောင် (၂၀၀၀)ကျော် စားနပ်ရိက္ခာနှင့် ကိုဗစ်-၁၉ ကာကွယ်ရေးပစ္စည်းများ လိုအပ်နေကြောင်း စုံစမ်းသိရှိရသည်။

ယနေ့ ဇန်နဝါရီ (၁၂)ရက်ထိ နှစ်ဘက် စစ်ရေးတင်းမာမှုရှိပြီး လက်နက်ကြီးသံများလည်း ကြားနေရသဖြင့် စစ်ရှောင်များ နေ့တိုင်းနီးပါး ရောက်ရှိလာပြီး စားနပ်ရိက္ခာများ၊ ကလေး နို့မှုန့်များနှင့် ကိုဗစ် – ၁၉ ကာကွယ်ရေး ပစ္စည်းများ အရေးပေါ် လိုအပ်နေကြောင်း စစ်ရှောင်များကို ကူညီပေးနေသူများက ပြောဆိုကြသည်။

“လိုအပ်တာတော့အကုန်လိုအပ်နေတယ်။ စားနပ်ရိက္ခာက မပြည့်စုံသေးဘူး။ ဆောင်းတွင်းရောက်တော့ စောင်တွေ တဲလုပ်ဖို့ မိုးကာတွေလည်း လိုအပ်နေတယ်။ နှာခေါင်းစည်း (Mask)တို့ လက်ဆေးရည်တို့တော့ သိပ်မရှိသေးဘူး” ဟု စစ်ရှောင်များကို ကူညီပေးနေသူ အသက် ၃၀ ကျော်ရှိ အမျိုးသားတစ်ဦးက ပြောသည်။

စစ်ဘေးတိမ်းရှောင်လာသည့် ဒေသခံများထဲမှ ရက်သား ကလေးငယ်အပါအဝင် ကလေးငယ် အများအပြားရှိသဖြင့် ဖြည့်စွက် အာဟာရနို့မှုန့်များလည်း လိုအပ်နေကြောင်း သိရသည်။

“ကလေးငယ်တွေရဲ့ အနွေးထည်တွေ အာဟာရနို့မှုန့်တွေလည်း လိုအပ်တယ်။ တချို့ ကလေးက (၅)ရက်သားပဲ ရှိသေးတယ် ထွက်ပြေးလာရပြီ” ဟု မိုင်းကိုင်ဒေသခံ အမျိုးသားတစ်ဦးက ပြောသည်။

တိုင်းရင်းသားလက်နက်ကိုင် တိုက်ပွဲအချင်းချင်းကြောင့် မိုင်းကိုင်မြို့နယ်အတွင်းရှိ ကျေးရွာဒေသခံများသည် မြို့ပေါ်သို့ ထွက်ပြေးတိမ်းရှောင်လာကြပြီး တချို့ စစ်ရှောင်များသည် လဲချားမြို့နယ်အထိ ထွက်ပြေးတိမ်းရှောင်ခဲ့ရကြောင်း သိရသည်။

Leave a Comments