သျှမ်းမြောက် သီပေါမြို့နယ် ဘော်ကြိုကျေးရွာ ဘော်ကြိုဘုရားကြီးတွင် ရောက်ရှိခိုလှုံနေသည့် စစ်ဘေးရှောင် ၃၀၀ ကျော်အတွက် စားနပ်ရိက္ခာ လိုအပ်နေကြောင်း သိရသည်။
ထိုစစ်ဘေးရှောင်များသည် ပြီးခဲ့သည့် ရက်ပိုင်းက ကျောက်မဲနှင့် သီပေါမြို့နယ်ထိစပ်နေသည့် ကျေးရွာအနီးဖြစ်ပွားသည့် တိုင်းရင်းသား လက်နက်ကိုင်အချင်းချင်း တိုက်ပွဲကြောင့် ထွက်ပြေး တိမ်းရှောင်ခဲ့ရသူများဖြစ်ကြောင်း သိရသည်။
“သူတို့တွေက အလောတကြီး ထွက်ပြေးလာရတဲ့သူတွေဆိုတော့ အနွေးထည်တွေ၊ စောင်တွေလိုတယ်၊ အခုက ဆောင်းရာသီဆိုတော့ အဲ့တာတွေလိုတယ်၊ စားသောက်ဖို့လည်း လိုတာပေါ့၊ အမျိုးသမီးတွေ ကလေးတွေလည်း များတယ်၊ ကလေးအဝတ်တွေလည်း လိုနေတယ်” ဟု စစ်ရှောင်များကို ကူညီနေသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုစစ်ရှောင်များသည် သီပေါမြို့နယ် ကျင်သီကျေးရွာအုပ်စုအတွင်းမှ ဒေသခံများဖြစ်ကြောင်း သိရသည်။
ထို့အပြင် ကျေးရွာအတွင်း ပိတ်မိနေသည့် ဒေသခံများလည်း ရှိနေသေးကြောင်း အထက်ပါ အမျိုးသားက ပြောသည်။
“ရွာမှာ ပိတ်မိနေတဲ့သူတွေ မထွက်လာနိုင်တဲ့ သူတွေလည်း ရှိသေးတယ်၊ ကျနော်တို့လည်း အဲ့ထိ မသွားကူနိုင်ဘူး၊ လမ်းတွေလည်း ပိတ်ထားတယ်၊ တချို့က ရွာကနေ ထွက်ပြေးသွားပေမယ့် ဒီစစ်ရှောင်စခန်းကို ရောက်မလာတဲ့သူတွေလည်း ရှိတယ်၊ တချို့က ရွာကနေ ထွက်လာနိုင်ပြီ၊ ဒီနေ့ မနက် ၃၀ ကျော် ထပ်ရောက်လာတယ်” ဟု ၄င်းက ပြောသည်။
သီပေါမြို့နယ်တွင် ပြီးခဲ့သည့် ၂၀၂၁ ခုနှစ်အတွင်းကလည်း တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားမှုကြောင့် ဒေသခံ ရာချီ ထွက်ပြေးတိမ်းရှောင်ခဲ့ရသည်။
ထို့အပြင် သီပေါမြို့နယ် ချောင်းဆုံကျေးရွာမှ ဒေသခံပြည်သူများ၏ နေအိမ်(၆)အိမ်ခန့်လည်း လက်နက်ထိမှန်ပျက်စီးခဲ့ရပြီး နေရပ်မပြန်နိုင်သေးသည့် ဒေသခံများလည်း ရှိနေသေးကြောင်း သိရသည်။
သျှမ်းပြည်တွင်း တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားမှု အမြန်ဆုံး အဆုံးသတ်ရန် ဒေသခံပြည်သူများ၊ သံဃာတော်များ တောင်ဆိုမှုပြုလုပ်နေသော်လည်း တိုက်ပွဲဖြစ်ပွားမှုမှာ ရပ်တန့်ခြင်း မရှိသေးပေ။
“ဖြစ်နိုင်ရင်တော့ တိုက်ပွဲကို မဖြစ်စေချင်တော့ဘူး၊ ထိုးစစ်ဆင်နေတာတွေ၊ ပစ်ခတ်နေတာတွေကို မလုပ်စေချင်တော့ပါဘူး၊ ပြည်သူတွေ နေရပ်ပြန်နိုင်ဖို့ကို စဉ်းစားပေးစေချင်တယ်၊ ပြည်သူကို စောင့်ရှောက်ပေးကြဖို့ လေးလေးနက်နက်တောင်းဆိုပါတယ်” ဟု သျှမ်းပြည် သံဃာနှင့်ပြည်သူ ငြိမ်းချမ်းရေး ပူးပေါင်းဆောင်ရွက်ရေး ကော်မတီမှ အရှင် ခေမိဿရ က မိန့်ကြားထားသည်။
