သျှမ်းပြည်တောင်ပိုင်း မိုင်းကိုင်မြို့နယ် ဟမ်းငိုင်းကျေးရွာအုပ်စုအတွင်း ဒေသခံ ရွာသားတစ်ဦး မိုင်းနင်းမိပြီးသေဆုံးကာ ယနေ့ချိန်ထိ အလောင်းသွားမကောက်ရသေးကြောင်း စုံစမ်းသိရှိရသည်။
ထိုမိုင်းနင်းမိပြီး သေဆုံးသွားသည့် အလောင်းကို ဇန်နဝါရီ (၅)ရက်တွင် မိုင်းကိုင်မြို့နယ် ဟမ်းငိုင်းကျေးရွာအုပ်စု လွယ်ဆိုင်းကျေးရွာအနီးရှိ လယ်ဟောင်းထဲ တွေ့ရှိခဲ့ကြောင်း လွယ်ဆိုင်းကျေးရွာဒေသခံ တစ်ဦးက ပြောသည်။
“ဒီနေ့ထိ ဘယ်သူမှ သူ့အလောင်းကို မသွားယူရဲကြသေးဘူး။ မြေမြုပ်မိုင်းတွေ ထပ်နင်းမိမှာကြောက်လို့ သူ့အလောင်းတော့ အကုန်ပျက်စီးကုန်ပြီ။ ယင်ကောင်တွေလဲ အုံနေပြီ” ဟု လွယ်ဆိုင်းကျေးရွာဒေသခံ အမျိုးသား တစ်ဦးက ပြောသည်။
အဆိုပါ အမျိုးသားသည် အသက် (၄၅)နှစ်အရွယ် စိုင်းကျော်ဖြစ်ပြီး ပြီးခဲ့သည့် ဇန်နဝါရီ (၃)ရက်နေ့က စစ်ရှောင်စခန်းမှ နေအိမ်သို့ ပြန်ကြည့်ရာ ဇန်နဝါရီ (၅)ရက်နေ့မှာ ၎င်း၏ အလောင်းကို တွေ့ရှိခဲ့ရကြောင်း ဒေသခံများက ပြောဆိုကြသည်။
“၃ ရက်နေ့က သူ ရာတော်ကျေးရွာ (စစ်ရှောင်စခန်း)ကနေ သူ့ရွာကို ပြန်တယ်။ ပြန်မရောက်လာလို့ (၅) ရက်နေ့မှာ သူ့အလောင်းကိုပဲ တွေ့တော့တယ်။ သူ မြေမြုပ်မိုင်း နင်းမိတာက (၃) ရက်နေ့ မဟုတ်ရင် (၄) ရက်နေ့ဖြစ်မယ်လို့ထင်တယ်” ဟု သေဆုံးသူနှင့် နီးစပ်သူ တစ်ဦးက ပြောသည်။
မိုင်းကိုင်မြို့နယ်အတွင်း တိုင်းရင်းသားလက်နက်ကိုင် အချင်းချင်း တိုက်ပွဲကြောင့် ပြီးခဲ့သည့် နိုင်ဝင်ဘာ (၃) ရက်နေ့တွင်လည်း အသက် (၁၇)နှစ်အရွယ် ကျွဲကျောင်းသားတစ်ဦး မြေမြုပ်မိုင်း နင်းမိပြီး သေဆုံးခဲ့ကြောင်း သိရသည်။
ပြီးခဲ့သည့် ဇန်နဝါရီ (၄)ရက်နေ့တွင်လည်း မိုင်းကိုင်မြို့နယ်အတွင်းမှာ ဒေသခံ ရွာသား (၃)ဦး မြေမြုပ်မိုင်း နင်းမိပြီး ဒဏ်ရာရရှိခဲ့ရသဖြင့် လက်ရှိချိန်ထိ မိုင်းကိုင်ပြည်သူ့ဆေးရုံတွင် ဆေးကုသမှု ခံယူနေရသည်။
မိုင်းကိုင်မြို့နယ်အတွင်း ၂၀၂၁ ခုနှစ် စက်တင်ဘာလမှ စတင်ပြီး ယနေ့ချိန်ထိ တိုင်းရင်းသားလက်နက်ကိုင်အချင်းချင်း တိုက်ပွဲဖြစ်ပွားမှုကြောင့် နေရပ်စွန့်ခွာသူ အများအပြားရှိကာ လက်ရှိချိန်ထိ မိုင်းကိုင်မြို့ပေါ် တွင် စစ်ဘေးရှောင် (၂၀၀၀)ကျော်ရှိပြီး စားနပ်ရိက္ခာများ လိုအပ်နေကြောင်း သိရသည်။
