သျှမ်းပြည်မြောက်ပိုင်း နမ္မတူမြို့နယ်၏ ကျေးလက်ဒေသတွင် လက်ရှိတိုက်ပွဲများငြိမ်နေပြီဖြစ်သောကြောင့် နမ္မတူရောက် စစ်ဘေးရှောင် ၈၀၀ မှာနေရပ်သို့ပြန်နိုင်ကြပြီဖြစ်ကြောင်းသိရသည်။
နမ္မတူမြို့နယ် မန်စံ အုပ်စု ဘုန်းကြီးကျောင်းများတွင် ရောက်ရှိခိုလှုံနေသော ပန်လုံအုပ်စု ပန်ဆော့အုပ်စု မိုင်းမုအုပ်စုမှ စစ်ဘေးရှောင် များမှာ သြဂုတ်လ ၈ ရက်နှင့် ၉ ရက်နေ့တို့တွင် နေရပ်ပြန်ကုန်ကြပြီဖြစ်ကြောင်း သိရသည်။
နမ္မတူမြို့နယ် စစ်ဘေးရှောင်များကူညီရေးအဖွဲ့မှ စိုင်းဘဉာဏ်က – မြောက်ပိုင်းမဟာမိတ်တပ်ဖွဲ့တွေ မိုင်းရင်ဘက်ကိုဆုတ်သွားပြီကြားတယ်။ ပစ်ခတ်သံလည်းငြိမ်သွားပြီဖြစ်တဲ့အတွက်ရွာသားများ နေရပ်ပြန်ကြပါပြီ။ – ဟု သျှမ်းသံတော်ဆင့်အားပြောသည်။
ဇူလိုင်လအတွင်းက နမ္မတူမြို့အနောက်မြောက်ဘက်ရှိ အထက်ဖော်ပြပါ အုပ်စုများတွင် အစိုးရတပ်၊ မြောက်ပိုင်းမဟာမိတ်တပ်ဖွဲ့နှင့် သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော်အကြားဖြစ်ပွါးသောတိုက်ပွဲများကြောင့် ဒေသခံရွာသားများမှာ မန်စံအုပ်စုဘုန်းကြီးကျောင်းများသို့လည်းကောင်း တိမ်းရှောင်နေခဲ့ကြသည်။ လယ်ယာဆင်းချိန် လုပ်ငန်းခွင်ဝင်ချိန်ဖြစ်သဖြင့် ရွာသားတချို့မှာ ယခင်အပတ်ကတည်းက နေရပ်အသီးသီးပြန်သွားကြသော်လည်း သက်ကြီးပိုင်း၊ ကလေးနှင့် အမျိုးသမီးများမှာမူ ယခုမှသာ နေရပ်ပြန်သွားခဲ့ကြောင်းသိရပါသည်။
