သျှမ်းပြည်မြောက်ပိုင်း နမ္မတူမြို့ပေါ်ရှိ သတ္တုတွင်း ဝန်ထမ်းအိမ်ရာတွင်နေထိုင်သူများကို တအာင်းအမျိုးသားလွတ်မြောက်ရေးတပ်မတော် (TNLA) က ဖယ်ရှားရန် ညွှန်ကြားထားသောကြောင့် နှစ်ရှည်လများ အခြေချနေထိုင်လာသည့် အငြိမ်းစားဝန်ထမ်းများနှင့် မိသားစုဝင်များမှာ အခက်အခဲနှင့် ကြုံတွေ့နေရကြောင်း စုံစမ်းသိရသည်။

နမ္မတူမြို့ သတ္တုတွင်းရပ်ကွက် (၄) ရှိ ဝန်ထမ်းအိမ်ရာများတွင် နေထိုင်သူများကို TNLA အုပ်ချုပ်ရေးအဖွဲ့က ဖယ်ရှားပေးရန် ညွှန်ကြားထားခြင်းဖြစ်ပြီး လက်ရှိတွင် အိမ်ခြေ ၁၀ အိမ်ထက်မနည်း စတင်ဖယ်ရှားခံနေရကြောင်း နမ္မတူမြို့ခံ အမျိုးသားတစ်ဦးက ပြောသည်။

“အခုလက်ရှိ အုပ်ချုပ်စီမံနေတဲ့ TNLA တွေက ဖယ်ရှားခိုင်းတာ။ ဘာကြောင့် ဖယ်ရှားခိုင်းတာလဲဆိုတာ ခိုင်မာတဲ့ အကြောင်းပြချက် မရှိဘူး။ ကနဦးတုန်းကတော့ ဒီမှာနေတဲ့သူတွေအတွက် အန္တရာယ်ရှိတယ်လို့ ပြောပေမဲ့ အခုကတော့ ဖယ်ရှားရမယ်ပဲ ပြောနေတယ်” ဟု ၎င်းက ပြောသည်။

အဆိုပါ ရပ်ကွက်တွင် အိမ်ခြေ ၁,၀၀၀ ခန့်ရှိပြီး နေထိုင်သူအများစုမှာ ဗြိတိသျှခေတ်ကတည်းက ကျော်ကြားခဲ့သည့် နမ္မတူဘော်တွင်း သတ္တုတွင်းလုပ်ငန်းတွင် လုပ်ကိုင်ခဲ့ကြသည့် ဝန်ထမ်းဟောင်းများ၊ အငြိမ်းစားယူထားသူများနှင့် မိသားစုဝင်များ ဖြစ်ကြသည်။

၎င်းတို့သည် အစိုးရလက်ထက်မှစ၍ ယခု TNLA အုပ်ချုပ်သည့်တိုင်အောင် အဆိုပါနေရာတွင် ဘိုးဘွားစဉ်ဆက် အခြေချနေထိုင်လာကြသူများ ဖြစ်ကြောင်း သိရသည်။

ယခုကဲ့သို့ ဝန်ထမ်းအိမ်ရာများ ဖယ်ရှားခိုင်းမှုကြောင့် နှစ်ရှည်လများ နေထိုင်လာသူများ၏ လူမှုစီးပွားဘဝကို ရိုက်ခတ်စေကြောင်း ဒေသခံများက ပြောသည်။

“ဘိုးဘွားလက်ထက်ကတည်းက နေလာခဲ့ကြတာ။ ကိုယ်ပိုင် တစ်နိုင်တစ်ပိုင် စိုက်ပျိုးထားတဲ့ ဒညှင်းပင်၊ ထောပတ်ပင်တွေက ကျနော်တို့တွေအတွက် အသက်မွေးဝမ်းကျောင်းပဲ။ အခုလို ရုတ်တရက်ကြီး ဖယ်ရှားခိုင်းတော့ ဘယ်သူမှ မကျေနပ်ကြဘူး။ သံယောဇဉ်တွေလည်း ရှိနေတာလေ” ဟု ၎င်းက ထပ်လောင်းပြောသည်။

နမ္မတူမြို့သည် ၂၀၂၃ ခုနှစ်ကုန်ပိုင်း “၁၀၂၇ စစ်ဆင်ရေး” အတွင်း TNLA က တိုက်ခိုက်သိမ်းပိုက်ခဲ့သည့် မြို့များအနက် တစ်မြို့ဖြစ်သည်။

TNLA သည် “၁၀၂၇ စစ်ဆင်ရေး” ဖြင့် ၂၀၂၃ ဒီဇင်ဘာလအတွင်းက မြို့အနောက်ဘက် ၁၄ မိုင်အကွာရှိ ဘော်တွင်းကိုပါ သိမ်းပိုက်ခဲ့သည်။

မြို့သိမ်းတိုက်ပွဲများအပြီး TNLA က နယ်မြေစိုးမိုးရေးနှင့် အုပ်ချုပ်ရေး ယန္တရားများကို စတင်ထူထောင်လာစဉ် ၂၀၂၄ ခုနှစ် ဧပြီလဆန်းကတည်းက နမ္မတူမြို့ သတ္တုတွင်းရပ်ကွက် (၄) ရှိ အစိုးရအိမ်ရာများတွင် နေထိုင်သည့် ပင်စင်စားနှင့် ကုမ္ပဏီဝန်ထမ်းများကို ၁၀ ရက်အတွင်း နေရာပြောင်းရွှေ့ပေးရန် TNLA က အတင်းအကြပ် ဖိအားပေးခဲ့သည်။

ထိုစဉ်က ဖယ်ရှားခိုင်းမှုသည် လုံခြုံရေးစိုးရိမ်မှုကြောင့်ဟု TNLA သတင်းနှင့် ပြန်ကြားရေးဌာနက သျှမ်းသံတော်ဆင့်ကို ပြောဆိုထားသော်လည်း ယခု ဖယ်ရှားမှုမှာ ဝန်ထမ်းအိမ်ရာများ၌ ပလောင်လူမျိုးများကို ထားရှိရန် လုပ်ဆောင်နေကြောင်း သတင်းများ ထွက်ပေါ်နေသည်။

အဆိုပါ ဝန်ထမ်းအိမ်ရာများကို TNLA က ဖယ်ရှားခိုင်းခြင်းနှင့် ပတ်သက်ပြီး သျှမ်းသံတော်ဆင့်က TNLA သတင်းနှင့် ပြန်ကြားရေးဌာနသို့ ဆက်သွယ်မေးမြန်းရန် ကြိုးစားခဲ့သော်လည်း ဆက်သွယ်၍ မရသေးပေ။