သျှမ်းပြည်မြောက်ပိုင်း နမ့်ခမ်းမြို့နယ်အတွင်း TNLA တပ်ဖွဲ့မှ အခွန် (ဆက်ကြေး) ကောက်ခြင်းနှင့် ပတ်သက်ပြီး သျှမ်းပြည် သံဃာနှင့် ပြည်သူငြိမ်းချမ်းရေး ပူးပေါင်းဆောင်ရွက်ရေး ကော်မတီ ရွှေလီမြစ်ဝှမ်း အဖွဲ့ခွဲက SSPP တပ်ဖွဲ့ထံ ညှိနှိုင်းဖြေရှင်းပေးရန် တောင်းဆိုထားကြောင်း စုံစမ်းသိရသည်။

တအာင်း(ပလောင်) လွတ်မြောက်ရေး တပ်မတော် (TNLA) နှင့် သျှမ်းပြည်တိုးတက်ရေးပါတီ (SSPP) တို့သည် မဟာမိတ်များ ဖြစ်ကြသည့်အတွက် နမ့်ခမ်းမြို့မဈေးအတွင်း ဆက်ကြေးကောက်ခြင်းနှင့် ပတ်သက်ပြီး ဆွေးနွေးညှိနှိုင်းဖြေရှင်းပေးရန် တောင်းဆိုထားကြောင်း သိရသည်။

“ကျနော်တို့အနေနဲ့တော့ ဒီကိစ္စတွေကို SSPP ဖြေရှင်းပေးဖို့ တောင်းဆိုတယ်။ ဘာကြောင့်လဲဆိုတော့ SSPP နဲ့ TNLA တို့က မဟာမိတ်တွေဖြစ်ကြတယ်။ ဒါကြောင့် ကျနော်တို့လဲ SSPP ဘက်က ဖြေရှင်းပေးနိုင်မယ်လို့ မျှော်လင့်တယ်” ဟု နမ့်ခမ်းမြို့မဈေးအတွင်း ဈေးသည် စိုင်းခမ်းဆိုင် က သျှမ်းသံတော်ဆင့် ကို ပြောသည်။

TNLA တပ်ဖွဲ့မှ နမ့်ခမ်းမြို့မဈေးအတွင်း ဆက်ကြေး ကောက်သဖြင့် ဈေးသူဈေးသားများ များစွာ အခက်ခဲရှိသည့်အတွက် ဈေးသူဈေးသားများက သျှမ်းပြည် သံဃာနှင့် ပြည်သူငြိမ်းချမ်းရေး ပူးပေါင်းဆောင်ရွက်ရေး ကော်မတီ ရွှေလီမြစ်ဝှမ်း အဖွဲ့ခွဲများနှင့် အစည်းအဝေးပြုလုပ်ပြီး ၎င်းတို့အဖွဲ့မှနေပြီး SSPP ထံ ဒီဇင်ဘာ (၁၄) ရက်စွဲဖြင့် စာတင်ထားကြောင်း စုံစမ်းသိရှိရသည်။

“ခုချိန်ထိတော့ ဘာမှ အကြောင်းကြားလာတာ မရှိသေးဘူး။ ကျနော်တို့လဲ အရမ်းခက်ခဲနေတယ်။ လာကောက်တာလဲ သောင်းဂဏန်း မဟုတ်ပဲ သိန်းဂဏန်း ဖြစ်နေတော့ အရမ်းများတယ်။ ဈေးသည်တွေက ဘာမှ သိပ်မရောင်းရဘူး။ တစ်ခါတစ်လေကောက်ရင် ဘာမှမဖြစ်ဘူး။ ဒါက ရေရှည်ဖြစ်တဲ့အတွက် ကျနော်တို့အတွက်လဲ ခက်ခဲတယ်။ အခြေခံလူတန်းစားတွေပဲဖြစ်တဲ့အတွက် ကျနော်တို့အတွက် အခက်အခဲ အရမ်းဖြစ်တယ်” ဟု နမ့်ခမ်းဒေသခံ ဈေးသည်အမျိုးသား တစ်ဦးက ပြောသည်။

နမ့်ခမ်းမြို့မဈေးကြီးအတွင်း TNLA လက်နက်ကိုင်တပ်ဖွဲ့မှ ဈေးဆိုင်များအား အတင်းအဓမ္မ ဆက်ကြေးကောက်ခံ ခြိမ်းခြောက်မှုများ ပြုလုပ်သဖြင့် ဒီဇင်ဘာ (၁၃) မှ (၁၇) ရက်ထိ ဈေးသူ ဈေးသားများက ဈေးပိတ်ထားပြီး ဆန္ဒထုတ်ဖော်ခဲ့ကြောင်း သိရသည်။

နမ့်ခမ်းမြို့သည် TNLA တပ်ဖွဲ့ထံ ဆက်ကြေး ပေးဆောင်ရသည့်အပြင် KIA တပ်ဖွဲ့ နှင့် SSPP တပ်ဖွဲ့ တို့ထံ ဆက်ကြေး ပေးဆောင်ခဲ့ရကြောင်း သိရှိရသည်။