သျှမ်းမြောက် မူဆယ်မြို့နယ် နန်းတော်ဂိတ်ပေါက်တွင် ယနေ့ (အောက်တိုဘာ ၁၄ ရက်)တွင် တရုတ်ပြည်မှ ပြန်ဝင်လာသူ (၃၀၀)ကျော်ရှိခဲ့ကြောင်း သတင်းရရှိသည်။
ယမန်နေ့ (အောက်တိုဘာ ၁၃)ရက်နေ့တွင်လည်း ပြည်တော်ပြန် (၃၀၀)ကျော်ရှိပြီး ယနေ့ ထပ်မံဝင်ရောက်ခဲ့တာဖြစ်ကြောင်း ပြည်တော်ပြန်များကို ကူညီရေးဆောင်ရွက်နေသည့်အဖွဲ့ထံမှ သိရသည်။
“ဒီနေ့ထပ်ဝင်လာတာ (၃၀၀)ကျော်၊ မနေ့ကလည်းဝင်တယ်၊ ကျနော်တို့ကတော့ ဒီ ဝင်လာတဲ့သူတွေ ပြန်ဖို့အတွက် ကူညီတာပေါ့၊ တချို့ လမ်းစရိတ်မရှိတာတွေလည်း ရှိနေတယ် ဆိုတော့ ထောက်ပံ့ပေး ရတယ်၊ ဆယ်သွယ်ပေးရတာပေါ့၊ ကျယ်ကောင်၊ ရွှေလီမှာ နေတဲ့သူတွေပါ” ဟု လူသားချင်းစာနာ ထောက်ထားမှု အကူအညီပေးရေးကွန်ယက်မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။
ယနေ့ ထပ်မံဝင်ရောက်လာသူများမှာ ကျား (၁၇၃)ဦး၊ မ (၁၃၉)ဦး စုစုပေါင်း (၃၁၂)ဦး ရှိကြောင်းသိရသည်။
ပြီးခဲ့သည့် ဇူလိုင်လ (၂၆)ရက်နေ့မှစပြီး တရုတ်ပြည်ဘက်က မြန်မာနိုင်ငံသားများကို တရားဝင် ပြန်ခွင့်ပြုထားခဲ့ကာ (၂)လကျော် ကာလအတွင်း မူဆယ်မြို့နယ် နန်းတော်ဂိတ်ပေါက်မှ ပြည်တော်ပြန် ဝင်ရောက်လာသူ (၁၂၈၂၆)ဦး ရှိခဲ့ကြောင်း သိရှိရသည်။
Leave a Comments