သျှမ်းပြည် မူဆယ်မြို့နယ်တွင် အွန်လိုင်းကျားဖြန့် လုပ်ကိုင်သည့် နေရာများကို စစ်ကောင်စီက ဝင်ရောက်စီးနင်းခဲ့ကြောင်း စုံစမ်းသိရသည်။
မတ်လ ၂၇ ရက် ညပိုင်းမှ စတင်ပြီး မူဆယ်မြို့ရှိ ဆင်ဖြူအိမ်ရာနှင့် စွမ်စော်ရပ်ကွက်တို့တွင် ဖွင့်လှစ်ထားသော အွန်လိုင်းကျားဖြန့် ငွေလိမ်ဂိုဏ်း လုပ်ကိုင်သည့် နေရာများကို စစ်ကောင်စီတပ်က အင်အားသုံးပြီး ဝင်ရောက်ဖမ်းဆီးခဲ့ကြောင်း မူဆယ်ဒေသခံများက ပြောသည်။
“ရှေ့တစ်ရက်က ကျားဖြန့်ဝိုင်းတွေ လိုက်ဖမ်းတာ ဟုတ်တယ်။ ဆင်ဖြူအိမ်ရာ၊ ဆင်ဖြူဂိတ်၊ စွမ်စော်၊ မင်္ဂလာမူဆယ် ဒီဘက်တွေမှာ အများကြီး ဖမ်းတာ။ တရုတ်ရဲ လာဖမ်းလို့ လောပန်းတွေလည်း ထွက်ပြေးကုန်ပြီပြောတယ်။ လုံခြုံရေးကတော့ ပြည်သူ့စစ်တွေ ယူပေးတာ။ ဘယ်နှနေရာလည်းဆိုတာ သေချာတော့ ပြောလို့မရဘူး”ဟု မူဆယ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အွန်လိုင်းကျားဖြန့် လောင်းကစားဝိုင်းများသည် စစ်ကောင်စီလက်အောက်ခံ လုံထန်၊ မြို့မ၊ ပန်းဆေး၊ မော်ဆောင်း၊ ကောင်းခါး ဧက ၄၀ ဦးမြင့်ရွှေ နှင့် မန်ဂျယ် စသည့် ပြည်သူ့စစ်အဖွဲ့များ၏ နယ်မြေအတွင်း ဖွင့်လှစ်ထားသည့်အပြင် ၎င်းတို့က လုံခြုံရေး ယူပေးထားပြီး ကိုယ်ကျိုးစီးပွားအတွက် ပူးပေါင်းလုပ်ကိုင်နေကြကြောင်း မူဆယ်ဒေသခံများထံမှ သိရသည်။
မူဆယ်မြို့ စစ်ကောင်စီက အွန်လိုင်းကျားဖြန့် လောင်းကစားဝိုင်းများကို မတ်လ ၂၇ ရက် ညအချိန်က ဝင်ရောက်ဖမ်းဆီးခဲ့ရာတွင် မြန်မာနိုင်ငံသားအပြင် တရုတ်နိုင်ငံသား အများအပြားလည်း ဖမ်းဆီးခံရပြီး အရေအတွက် မည်မျှဖမ်းဆီးခံရကြောင်းကို မသိရှိရသေးကြောင်း မူဆယ်ဒေသခံများက ပြောသည်။
“သူတို့လောပန်းတွေကို တရုတ်ရဲဖမ်းသွားရင်တော့ စစ်ကောင်စီက ထုံးစံအတိုင်း ဖမ်းပြီးရင် ငွေညှစ်မှာပေါ့။ ခိုးကြောင်ခိုးဝှက် လုပ်နေတာ အများကြီးလေ။ စစ်တပ်နဲ့လည်း ပေါင်းလုပ်စားနေတာပဲ။ ဒီဟာတွေအကုန်လုံးက လိုင်းကြေးတွေ ပေးထားပြီး လုပ်ကြတာ။ စစ်တပ်က သူတို့ဖမ်းချင်ရင် ချက်ချင်း ဝင်ဖမ်းလို့ရတာပဲ”ဟု မူဆယ်မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။
မူဆယ်မြို့တွင် ဖွင့်လှစ်လုပ်ကိုင်နေသည့် အွန်လိုင်းကျားဖြန့်ဂိုဏ်း ခေါင်းဆောင်များကို တရုတ်ရဲတပ်ဖွဲ့က လာရောက်ဖမ်းဆီးကြောင်း ဒေသခံများက ပြောဆိုနေသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ရန် ဆက်လက်စုံစမ်းနေသည်။
မူဆယ်မြို့နယ်တွင် ပြည်သူ့စစ်များ၏ လုံခြုံရေးဖြင့် ယခင်က ပေါ်ပေါ်ထင်ထင် ဖွင့်လှစ်ခဲ့သည့် အွန်လိုင်းကျားဖြန့် လောင်းကစားရုံများသည် “၁၀၂၇ စစ်ဆင်ရေး” စတင်ပြီးနောက် စစ်ရေးဖိအားများကြောင့် နေရာပြောင်းရွှေ့ ဖွင့်လှစ်လာသည်။
ကိုးကန့်ဒေသမှ အွန်လိုင်းကျားဖြန့် လုပ်ငန်းများအတွက် တာဝန်ရှိသူများကို တရုတ်က ဖမ်းဝရမ်းထုတ်ပြီး စစ်ကောင်စီက လွှဲပြောင်းပေးခဲ့သော်လည်း မူဆယ်မြို့တွင် ၎င်းကျားဖြန့်လုပ်ငန်းများ ပြန်လည်ပတ်နေကြောင်း မူဆယ်ဒေသခံများက ပြောသည်။
အလားတူ ဖေဖော်ဝါရီလ ၂၃ ရက်ကလည်း ထိုင်း-မြန်မာ နယ်စပ်ရှိ တာချီလိတ်မြို့တွင် စစ်ကောင်စီတပ်က 1G1 ဟိုတယ်အနီးရှိ အွန်လိုင်းလောင်းကစားလုပ်ငန်း နေရာကို ဝင်ရောက်စီးနင်းခဲ့ရာ နိုင်ငံခြားသား အပါအဝင် မြန်မာလူငယ် စုစုပေါင်း (၆၈၉) ဦး ဖမ်းဆီးခံရပြီး ၎င်းတို့ကို အာမခံဖြင့် ပြန်လွှတ်ပေးခဲ့ကြောင်း သိရသည်။
Leave a Comments