မြန်မာနိုင်ငံတွင် ဖြစ်ပွားနေသော လက်နက်ကိုင်ပဋိပက္ခများနှင့် တရားဥပဒေစိုးမိုးရေး ပျက်ပြားနေသည့် အခြေအနေကို အခွင့်ကောင်းယူ၍ မူးယစ်ဆေးဝါးထုတ်လုပ်မှုနှင့် အွန်လိုင်းငွေလိမ်လည်မှု (ကျားဖြန့်) လုပ်ငန်းများ ပေါင်းစည်းထားသည့် ရာဇဝတ်မှုစီးပွားရေးအသစ်တစ်ခု အခြေစိုက် အားကောင်းလာနေကြောင်း ကုလသမဂ္ဂ မူးယစ်ဆေးဝါးနှင့် ပြစ်မှုဆိုင်ရာရုံး (UNODC) က သတိပေးလိုက်သည်။

ဇွန်လ ၁၂ ရက်က ထုတ်ပြန်သော UNODC ၏ အစီရင်ခံစာအရ မြန်မာနိုင်ငံသည် ဒေသတွင်း ဓာတုမူးယစ်ဆေးဝါး ထုတ်လုပ်မှု၏ အချက်အချာဖြစ်လာရုံသာမက ထိုမူးယစ်ဆေး ထုတ်လုပ်သည့် လုပ်ငန်းများနှင့် ကျားဖြန့်လုပ်ငန်းများသည် အခြေခံအဆောက်အအုံ၊ လုံခြုံရေးနှင့် ငွေကြေးကွန်ရက်များကို အတူတကွ မျှဝေသုံးစွဲလာကြကြောင်း ဖော်ပြထားသည်။

“မူးယစ်ဆေးဓာတ်ခွဲခန်းတွေနဲ့ ကျားဖြန့် (အွန်လိုင်းငွေလိမ်) လုပ်ငန်းတွေ တစ်နေရာတည်းမှာ အတူရှိနေတာဟာ တိုက်ဆိုင်မှု မဟုတ်ပါဘူး။ ဒါဟာ သူတို့နောက်ကွယ်က ငွေကြေးစိုက်ထုတ်ပေးသူတွေ၊ သယ်ယူပို့ဆောင်ရေး လမ်းကြောင်းတွေနဲ့ ဥပဒေစိုးမိုးရေး အလှမ်းမမီတဲ့ နယ်မြေတွေကို အတူတူ မျှဝေသုံးစွဲနေကြတာကို ပြနေတာပါ”ဟု UNODC ၏ ဒေသဆိုင်ရာ ကိုယ်စားလှယ် Delphine Schantz က ပြောကြားသည်။

အစီရင်ခံစာအရ သျှမ်းပြည်မြောက်ပိုင်းတွင် စက်မှုအဆင့်မီ မက်သဖက်တမင်း ဓာတ်ခွဲခန်းများနှင့် ၁ ကီလိုမီတာခန့်အကွာတွင် ကျားဖြန့်လုပ်ငန်းများကို တွေ့ရှိခဲ့ရပြီး၊ ယင်းသည် တရားမဝင် စီးပွားရေးလုပ်ငန်းများ အချင်းချင်း အပြန်အလှန် အမှီသဟဲပြုကာ ကြီးထွားလာနေသည့် လက္ခဏာဖြစ်ကြောင်း ဆိုသည်။

မြန်မာနိုင်ငံ၏ ပရမ်းပတာ အခြေအနေကြောင့် မူးယစ်ဆေးဝါး ထုတ်လုပ်မှုမှာ စံချိန်တင် မြင့်တက်နေပြီး စျေးကွက်အတွင်း စျေးနှုန်းများ သိသိသာသာ ကျဆင်းနေသည်။

၂၀၂၅ ခုနှစ်အတွင်း မက်သဖက်တမင်း ၁ ဂရမ်လျှင် ၅ ဒသမ ၅၅ ဒေါ်လာအထိ စျေးကျသွားခြင်းမှာ ထုတ်လုပ်မှုပမာဏ အဆမတန် များပြားနေခြင်းကို ပြသနေကြောင်း UNODC က ထောက်ပြသည်။

တစ်နှစ်တည်းမှာပင် အရှေ့တောင်အာရှတစ်လွှား မက်သဖက်တမင်း ၃၄၉ တန်နှင့် ကတ်တမင်း ၅၂ ဒသမ ၅ တန် စံချိန်တင် ဖမ်းဆီးရမိခဲ့ရာ ယင်းပမာဏ အများစုမှာ မြန်မာနိုင်ငံမှ လာခြင်း ဖြစ်သည်။

မြန်မာနိုင်ငံအတွင်း လက်နက်ကိုင်ပဋိပက္ခများ အရှိန်အဟုန်ပြင်းစွာ ဖြစ်ပွားလျက်ရှိခြင်းနှင့် အုပ်ချုပ်သူအစိုးရ၏ နယ်မြေစိုးမိုးမှု အားနည်းလာခြင်းတို့ကြောင့် ရာဇဝတ်မှုနှိမ်နင်းရေးထက် စစ်ရေးဆိုင်ရာ ကိစ္စရပ်များကိုသာ ဦးစားပေး ဆောင်ရွက်နေရသည့် အခြေအနေဖြစ်ရာ၊ ယင်းအချက်သည် နိုင်ငံဖြတ်ကျော် ရာဇဝတ်ဂိုဏ်းများအတွက် မြန်မာနိုင်ငံအား လုံခြုံစိတ်ချရသော ခိုလှုံရာ ဖြစ်သွားစေသည်ဟု နိုင်ငံတကာပဋိပက္ခလေ့လာရေးအဖွဲ့ (ICG) မှ Richard Horsey က သုံးသပ်ထားပါသည်။

ထို့ပြင် အီတိုမီဒိတ် (Etomidate) ဟုခေါ်သော မေ့ဆေးတစ်မျိုးကို မူးယစ်ဆေးအဖြစ် ထုတ်လုပ်ကာ Vape များအတွင်း ထည့်သွင်းရောင်းချသည့် အန္တရာယ်သစ်မှာလည်း မြန်မာနိုင်ငံနှင့် အိမ်နီးချင်းနိုင်ငံများတွင် လျင်မြန်စွာ ပျံ့နှံ့လာနေသည်။

ထိုကဲ့သို့ မူးယစ်ဆေးဝါး၊ ဆိုက်ဘာရာဇဝတ်မှုနှင့် တရားမဝင် ငွေကြေးစီးဆင်းမှုများ ပေါင်းစည်းလာခြင်းသည် မြန်မာနိုင်ငံအတွက်သာမက တစ်ဒေသလုံး၏ လုံခြုံရေးနှင့် တည်ငြိမ်ရေးကို ကြီးမားစွာ ခြိမ်းခြောက်နေပြီဖြစ်ကြောင်း UNODC အစီရင်ခံစာက သတိပေးထားသည်။