သျှမ်းပြည် မူဆယ်မြို့နယ်ရှိ ပန်ဆိုင်း(ကြူကုတ်)မြို့ဘက်တွင် ကိုးကန့်တပ်ဖွဲ့ MNDAA မှ တပ်သားသစ် ထပ်မံကောက်ခံနေပြီး TNLA တပ်သားဟောင်းများကိုပါ လိုက်လံစည်းရုံးနေကြောင်း စုံစမ်းသိရသည်။

ကိုးကန့်တပ်ဖွဲ့ MNDAA ထိန်းချုပ်ထားသည့် မူဆယ်မြို့နယ် ပန်ဆိုင်း(ကြူကုတ်)မြို့နှင့် မုံးကိုးမြို့ရှိ ကျေးရွာများဘက်တွင် ဧပြီလကုန်ပိုင်းမှ စတင်၍ မေလလယ်အထိ MNDAA လက်အောက်ခံ တာဝန်ရှိသူများမှ အုပ်ချုပ်ရေးလုပ်ငန်း ပြန်လည်သုံးသပ်ရန် အစည်းအဝေးများ တောက်လျှောက် ခေါ်ယူခဲ့ကြောင်း သိရသည်။

အဆိုပါအစည်းအဝေးတွင် စည်ပင်သာယာရေးလုပ်ငန်း၊ အိမ်ခြံမြေရောင်းဝယ်ရေး လုပ်ငန်းများကို MNDAA တာဝန်ရှိသူများထံ အသိပေး အကြောင်းကြားရန်နှင့် တပ်သားသစ် ထပ်မံခေါ်ယူမည့်ကိစ္စများကို ပြောဆိုခဲ့ကြောင်း ဒေသခံများက ပြောသည်။

“တစ်အိမ်တစ်ယောက် စစ်သားပြန်ကောက်မယ်လို့ ပြောထားတာ။ ပန်ဆိုင်းဘက်ကတော့ ကိုးကန့်တရုတ်ဆိုရင် အနည်းဆုံးကတော့ တစ်အိမ်တစ်ယောက် MNDAA ထဲ ဝင်ရတယ်။ ကိုးကန့်စစ်သား မလုပ်တဲ့လူတွေ အရင်က အိမ်သိမ်းခံရတာ တကယ်ဟုတ်တယ်။ စည်ပင်ပိုင်းဆိုင်ရာ အလုပ်တွေ၊ အိမ်ခြံမြေ အရောင်းအဝယ်လုပ်ရင် သူတို့ကို ပြောဖို့နဲ့ အရှုပ်အရှင်း ဖြစ်လာရင် ဖြေရှင်းပေးမယ်ဆိုတာမျိုး ပြောတယ်” ဟု အဆိုပါ အစည်းအဝေးသို့ တက်ရောက်ခဲ့သည့် ပန်ဆိုင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် မတ်လအတွင်းကလည်း ပန်ဆိုင်း(ကြူကုတ်)မြို့ရှိ အိမ်ထောင်စုနှင့် လူဦးရေစာရင်းများကို MNDAA ဘက်မှ ထပ်မံစစ်ဆေးခဲ့ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထံ စစ်မှုထမ်းခဲ့ဖူးသူများကို MNDAA ထဲ ဝင်ရောက်ရန် စည်းရုံးပြောဆိုမှုများ ရှိနေကြောင်း ပန်ဆိုင်းဒေသခံများထံမှ သိရသည်။

“ကိုးကန့်တရုတ်ဆိုရင်တော့ MNDAA ထဲ မဖြစ်မနေ ဝင်ရတယ်။ ကချင်ရွာတို့ သျှမ်းရွာတို့ကျတော့ သူတို့သက်ဆိုင်ရာ KIA နဲ့ SSPP ဘက်က ဝင်ထိန်းပေးတာမျိုး ရှိတယ်။ ကွတ်ခိုင်ဘက်မှာ တိုက်ပွဲဖြစ်လို့ ရွာပြန်လာတဲ့ ပလောင်စစ်သားကျတော့ ကိုးကန့်ဘက်က သူတို့ထဲ ဝင်ဖို့ ပြန်လာစည်းရုံးတာရှိတယ်။ လစာများတယ်ဆိုတော့ တချို့လည်း ကိုးကန့်တပ်ထဲ ဝင်သွားတယ်”ဟု ပန်ဆိုင်းဒေသခံ အဆိုပါအမျိုးသားက ဆက်ပြောသည်။

ပြီးခဲ့သည့် မတ်လအတွင်း ကွတ်ခိုင်မြို့နယ်တွင် ဖြစ်ပွားခဲ့သည့် TNLA နှင့် MNDAA ကြား စစ်ရေးပဋိပက္ခပြီးနောက် ထွက်ပြေးပုန်းအောင်းခဲ့သည့် TNLA တပ်သားများကို လက်နက်အပ်နှံရန်နှင့် ဆေးဝါးကုသမှုခံယူရန် MNDAA ဘက်မှ လိုက်လံစည်းရုံးခဲ့ကြောင်း ကွတ်ခိုင်ဒေသခံများက ပြောသည်။