သျှမ်းပြည် မူဆယ်မြို့နယ်တွင် အမျိုးသားတစ်ဦး မြေမြုပ်မိုင်းနင်းမိပြီး ခြေထောက်ပြတ် ဒဏ်ရာရရှိ သွားကြောင်း သိရသည်။
သျှမ်းပြည် မူဆယ်မြို့နယ် ပန်ခမ်းရွာ(ပၢင်ႇၶမ်း)နေ အမျိုးသားတစ်ဦးသည် ဘုရားမီးပူဇော်ရန် သုံးပြုသည့် သစ် သွားရှာရာမှ မန့်ဟိုပိုး(မၢၼ်ႈႁူဝ်ပူဝ်း)တွင် ယမန်နေ့ (ဖေဖော်ဝါရီလ ၁၅) ရက် နေ့လည် ၁နာရီဝန်းကျင်တွင် မြေမြုပ်မိုင်းနင်းမိ၍ ခြေထောက်ပြတ်သည့်အထိ ဒဏ်ရာရရှိခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကိုပြောသည်။
“ဟုတ်တယ် သူမိုင်းနင်းမိတာ။သူက အိမ်မှာသူနဲ့သူ့မိန်းမ ပဲရှိတယ်သူအခုဒီလိုဖြစ်တော့ ရှာကျွေးမဲ့ လူမရှိတော့ဘူး။သားသမီးတွေကလည်း ငယ်ငယ်ကတည်းက ဝေးသွားတာ။” ဟု အသက် ၃၀ ဝန်းကျင် ဒေသခံအမျိုးသားတစ်ဦးက ပြောသည်။
ထိုမြေမြုပ်မိုင်းနင်းမိသူအမျိုးသားသည် အသက် ၆၃ နှစ်အရွယ် စိုင်းမောင်ဖြစ်ပြီး ပန်းခမ်းရွာတွင်နေထိုင်ဖြစ်သည်။
လက်ရှိတွင် မူဆယ်မြို့ ဗဟိုဆေးရုံတွင် ဆေးကုသမှုခံယူနေသည်။
ပြီးခဲ့သည့် ဖေဖော်ဝါရီ ၁၁ ရက်တွင်လည်း မူဆယ်မြို့နယ် တိုင်းလုံကျေးရွာ (ဢိူင်ႇတိုင်းလူင်) လွိုင်ကြူလော် (လွႆၵိဝ်ႇလွၵ်) တောင်အနီးတွင် အမျိုးသားတစ်ဦး ထင်းသွားရှာရာမှ မြေမြုပ်မိုင်းနင်းမိ၍ ခြေထောက် နှစ်ဖက် ဖြတ်သွားသည်အထိ ဒဏ်ရာရှိခဲ့ကြောင်း သိရသည်။
ဇန်နဝါရီ နှင့် ဖေဖော်ဝါရီ နှစ်လ အတွင်း မူဆယ်မြို့နယ်တွင် မြေမြုပ်မိုင်းနှင်းမိသူ ၉ ဦး အထိရှိပြီး အမျိုးသား ၈ ဦးနှင့် အမျိုးသမီး တစ်ဦး ဖြစ်ကာ ခြေထောက်ပြတ်သည့်အထိ ဒဏ်ရာရရှိခဲ့ကြ ကြောင်းသိရသည်။
စစ်တပ်အာဏာသိမ်းပြီးနောက်ပိုင်း မြန်မာတစ်ဝှမ်း နေပြည်တော်မှလွဲ၍ တိုင်းနှင့်ပြည်နယ် အသီးသီးတွင် မြေမြုပ်မိုင်းနှင့် ပေါက်ကွဲတတ်သော စစ်အကြွင်းအကျန် ထိခိုက်ဒဏ်ရာရသူ သိသိသာသာတိုးလာနေပြီး မြို့နယ်ပေါင်းတစ်ဝက်ကျော်တွင် မြေမြုပ်မိုင်းအန္တရာယ် ကျရောက်နေပြီဖြစ်ကြောင်း မြေမြုပ်မိုင်း စောင့်ကြည့်လေ့လာအဖွဲ့ Landmine & Cluster Munition Monitor မှ ပြောဆိုထားသည်။
Leave a Comments