သျှမ်းပြည်တောင်ပိုင်း ဟိုပုံးမြို့နယ်ရှိ လူငယ်များသည် စစ်အာဏာရှင်ကို ဆန့်ကျင်သည့်အနေဖြင့် CDM ပြုလုပ်သည့် ဝန်ထမ်းများကို လစဉ်ထောက်ပံ့ကြေး ပေးရာမှာ ယခုလမှ စတင်ပြီး ထောက်ပံ့ပေးမည့် ပမာဏ လျော့နည်းသွားမည်ဖြစ်ကြောင်း စုံစမ်းသိရှိရသည်။
ဇွန်လ မှ စတင်ပြီး ဟိုပုံးလူငယ်များ က CDM ပြုလုပ်သည့် ဝန်ထမ်း (၁၀) ဦးအထက်ကို လစဉ် ထောက်ပံ့ငွေ (၅၀၀၀၀) ကျပ်ပေးပြီး ယခု စက်တင်ဘာလမှ စတင်ပြီး (၄၀၀၀၀) ကျပ်ဖြင့်သာ ထောက်ပံ့ပေးသွားနိုင်မည် ဖြစ်ကြောင်း CDM ထောက်ပံ့ပေးသူတစ်ဦး ကပြောသည်။
“ကျနော်တို့ CDM တွေကို လစဉ်ထောက်ပံ့ပေးတာပါ။ လစဉ် ၅ သောင်းကျပ် ထောက်ပံ့ပေးတယ်။ ဒီလတော့ တစ်ယောက်ကို ၄ သောင်းပဲ ပေးနိုင်တော့တယ်။ အလှူငွေတွေနဲ့ပဲ အားကိုးရတော့ နောက်လဆို ထောက်ပံ့ပေးနိုင်ဖို့ မဖြစ်နိုင်တော့ဘူး။ အဲ့အတွက်လည်း စိတ်မကောင်းဖြစ်ရတယ်” ဟု CDM များကို ကူညီထောက်ပံ့ပေးနေသည့် သူတစ်ဦးက ပြောသည်။
အဆိုပါ CDM များကို လှူနေသည့် ငွေများသည် အလှူငွေဆိုတာလည်း မြို့ခံတွေ လှူတာမဟုတ်ကြောင်း နိုင်ငံခြားရောက် ပြည်သူများ၏ ကူညီထောက်ပံ့မှုများဖြစ်ကြောင်း CDM များကို ထောက်ပံ့ပေးနေသည့် သူ တစ်ဦးကပြောသည်။
အောက်တိုဘာလမှ စတင်ပြီး CDM ပြုလုပ်သည့် ဝန်ထမ်းများကို ထောက်ပံ့ပေးနိုင်မည်မဟုတ်ကြောင်း၊ လစဉ်ထောက်ပံ့ပေးနိုင်မည့် ငွေအင်အား မလုံလောက်ကြောင်း ၎င်းကဆက်ပြောသည်။
“လစဉ် ဆယ်ယောက်ကျော်ကို အလှည့်ကျပေးသွားတယ်။ ၄ လရှိပြီ။ အကုန်လုံး ရအောင်လုပ်ပေးချင် ပေမယ့်လည်း ငွေအင်အားမတတ်နိုင်တော့ စိတ်မကောင်းဖြစ်ရပါတယ်။ အလှူရှင်တွေ လွဲလာပြီဆိုရင် ချက်ချင်း ပြန်လည်ဝေငှပေးတာပါ။ လက်ထဲ မထားပါဘူး။” ဟု ထောက်ပံ့ပေးသူ တစ်ဦးကပြောသည်။
ဖေဖော်ဝါရီ (၁) ရက်နေ့မှစတင်ပြီး စစ်တပ်မှ နိုင်ငံတော်ကို အာဏာသိမ်းပြီးနောက် အာဏာရှင်ကို ဆန့်ကျင် ဆနပြသည့်အနေဖြင့် သက်ဆိုင်ရာ ဌာနဆိုင်ရာ ဝန်ထမ်းများက CDM ပြုလုပ်ပြီး စစ်အာဏာရှင်ကို ဆန့်ကျင် ဆန္ဒပြခဲ့သည်။