သျှမ်းပြည်မြောက်ပိုင်း ကျောက်မဲမြို့နယ် ပန်ဖြတ်ကျေးရွာ နှင့် ပန်ကွမ်ကျေးရွာ အနီးတဝှိက် တိုက်ပွဲဖြစ်ပွားပြီး နေအိမ် (၂) အိမ် လက်နက်ကြီးထိသွားကြောင်း စုံစမ်းသိရသည်။
RCSS/SSA နှင့် မြောက်ပိုင်း မဟာမိတ်တို့သည် သြဂုတ် (၁၁)ရက် မှ စတင်ကာ ယနေ့ထိ တိုက်ပွဲပြင်းထန်ပြီး ပန်ကွမ် ကျေးရွာ အနီးတဝှိက် တွင် နေအိမ် နေအိမ် (၂) အိမ်လက်နက်ကြီး ထိမှန်သွားခဲ့ပြီး ယမန်နေ့ (သြဂုတ် ၁၇)ရက်တွင် အရပ်သားတစ်ဦး ထိခိုက်ဒဏ်ရာရခဲ့ကြောင်း ပန်ကွမ်ရွာဟောင်း ဒေသခံ တစ်ဦးက သျှမ်းသံတော်ဆင့် ကို ပြောသည်။
“ သြဂုတ် (၁၁)ရက် မှာ တအိမ်ထိတယ်။ သြဂုတ် (၁၆)မှာ တအိမ်ထိတယ်။ အဲ့ချိန်တုန်းကတော့ လူတွေ မရှိဘူး။ အားလုံးက စစ်ရှောင်နေကြတာ။ မနေ့ (သြဂုတ် ၁၇)ရက် မှာတော့ အရပ်သားတယောက် ကျည်ထိ တယ်” ဟု ဒေသခံ တစ်ဦးက ပြောသည်။
အဆိုပါ ကျည်ထိသည့်အိမ်သည် တလုံး မှာ ရွာလယ်ခေါင်တွင်ရှိပြီး၊ တလုံးမှာ ရွာထိပ်တွင်ရှိကြောင်း သိရသည်။
ယနေ့ (သြဂုတ် ၁၈)ရက်ထိ တိုင်းရင်းသားလက်နက်ကိုင် အချင်းချင်း တိုက်ပွဲ ဆက်လက်ဖြစ်ပွားနေ သေးကြောင်း သိရသည်။
“ ဒီနေ့ မနက်လည်း တိုက်ပွဲသံ ကြားရတယ်။ မိုးရွာအရမ်းရွာလို့ထင်တယ်။တိုက်ပွဲ သိပ်မပြင်းထန်ဘူး” ဟု ပန်ကွမ် ရွာဟောင်း ဒေသခံ တစ်ဦး က သျှမ်းသံတော်ဆင့် ကိုပြောသည်။
သြဂုတ် (၁၁) ရက်နေ့က ပန်ကွမ်၊ ပန်ဖြတ်ကျေးရွာအနီး နှစ်ဖက် တိုက်ပွဲဖြစ်ပွားမှုကြောင့် ဒေသခံပြည်သူများ ကျောက်မဲမြို့ပေါ်နှင့် နီးစပ်ရာ ကျေးရွာတို့ ထွက်ပြေးတိမ်းရှောင်ခဲ့ရကြောင်း သိရသည်။
“တိုက်ပွဲကြောင့်လည်း ပန်ကွမ်ရွာသစ် က ဒေသခံတွေ ကျောက်မဲဘက် ပြေးသွားတယ်လို့တော့ ကြားတယ်။ ကျနော်တို့ရွာတော့ မပြေးဘူး။” ဟု ပန်ကွမ်ရွာဟောင်း ဒေသခံ တစ်ဦးကပြောသည်။
ကျောက်မဲမြို့နယ်ရှိ စစ်ရှောင်စခန်း (၃) ခုဖြစ်သော နမ့်ဆော့ကျေးရွာ ၊ မိုင်းတင်းကျေးရွာ နှင့် ကြူရှောကျေးရွာ ဘုန်းကြီးကျောင်းမှာရှိသည့် စစ်ရှောင် (၄၀၀) ကျော်သည် စားနပ်ရိကာနှင့် အမျိုးသမီးသုံးပစည်များ ထီးနှင့် မိုးကာများ လိုအပ်နေကြောင်း စစ်ရှောင်များကို ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဇူလိုင်လကတည်းက သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် မြောက်ပိုင်းမဟာမိတ် တို့ တိုက်ပွဲဖြစ်ပွားမှုကြောင့် ဒေသခံ (၁၀၀၀) ကျော် ထွက်ပြေးတိမ်းရှောင်နေရပြီး စားနပ်ရိကာနှင့် အသုံးဆောင်းပစည်းများ လိုအပ်နေကြောင်း သိရှိရသည်။
