သျှမ်းပြည်တောင်ပိုင်း ကျေးသီးမြို့နယ် မိုင်းနန်းကျေးရွာအုပ်စု ဝမ်းအစ်ကျေးရွာ RCSSနှင့် SSPP တိုက်ပွဲကြား အမျိုးသမီးတစ်ဦး ကျည်ထိမှန်ခဲ့ကြောင်း စုံစမ်းသိရသည်။
ဖြစ်စဉ်မှာ ဇူလိုင် ၇ ရက် နေ့လည်ပိုင်းတွင် လယ်ယာသွားရောက်အလုပ်လုပ်နေသည့် အသက် (၅၀) အရွယ်ရှိ နန်းနွမ်းသည် သျှမ်းတပ် (၂)တပ် တိုက်ပွဲကြောင့် သူမ၏ တင်ပါး ကျည်းထိမှန်ခဲ့ကြောင်း စစ်ဘေးရှောင် ကူညီပေးနေသည့် အမျိုးသား တစ်ဦးက ပြောသည်။
“ အဲ့နေ့ က နန်းနွမ်း က လယ်သွားကြည့်တာ။ လယ်သွားကြည့်တဲ့ချိန်မှာတော့ တိုက်ပွဲမဖြစ်ဘူးပေါ့။ လယ်ထဲရောက်ပြီးမှ သူတို့ သျှမ်းတပ် (၂)တပ် တိုက်ပွဲဖြစ်တာ။ အဲ့မှာ နန်းနွမ်း ရဲ့ တင်ပါး ကျည်ထိသွားတယ်” ဟု ၎င်း ကဆိုသည်။
ကျည်ဆံထိမှန်းခံရသည့် အမျိုးသမီးကို လက်ရှိတွင် မည်သည်ဆေးရုံတွင် ဆေးကုသနေရသည့်ကို အတိအကျ မသိရသေးပေ။
“ စဖြစ်တော့ သူတို မိုင်းနောင်ဆေးရုံးခေါ်သွားတယ်။ မိုင်းနောင်က ဆရာဝန်မရှိတော့ ကျေးသီး။ ကျနော် ကျေးသီး လိုက်သွားကြည့်တော့ ခိုလမ်ဆေးရုံကို ပို့လိုက်ပြီးလို့ပြောတယ်။ ကျနော်တို့လည်း အခုချိန်ထိ ဘယ်မှာရှိနေတာလဲ တော့ တိကျမသိရသေးဘူး” ဟု အထက်ပါ ပုဂ္ဂိုလ်က ပြောသည်။
အလားတူ ဇူလိုင် ၄ ရက်နေ့တွင် အသက် (၃၀) စိုင်းစံအောင်သည်လည်း လယ်သွားကြည့်ချိန်တွင် သေနတ် ပစ်ခံခဲ့ရ ကြောင်းသိရသည်။
အဆိုပါ စိုင်းစံအောင်သည် လက်ရှိတွင် မည်သည်ဆေးရုံးတွင် ဆေးကုသမှုခံယူနေသည်ကို မသိရှိရကြောင်း စစ်ရှောင်ကူညီပေးနေသည့် သူက ဆိုသည်။
“ သူကို ဘယ်နားခေါ်သွားကုလဲတော့မသိရဘူး။ ပြန်လာတာလည်း မတွေ့ရသေးဘူး။ ဝမ်းဟိုင်ကိုခေါ်သွားတယ်လို့ ပြောပေမယ့် သတင်းတော့ဘာမှ မကြားရသေးဘူး” ဟု စစ်ရှောင် ကူညီပေးနေသည့်သူက ပြောသည်။
ကျေးသီးမြို့နယ်တွင် သျှမ်းပြည်ပြန်လည်ထူထောင်းရေးကောင်စီ RCSS/SSA နှင့် သျှမ်းပြည်တိုးတက်ရေးပါတီ SSPP/SSA တို့တိုက်ပွဲကြောင့် ကျညထိမှန်သူ (၂)ဦးရှိခဲ့ပြီး၊ စစ်ဘေးရှောင် ( ၂၅၀၀) ကျော် ထွက်ပြေးတိမ်းရှောင်နေရသည်။
