သျှမ်းတောင် အေးသာယာမြို့ မှ အမျိုးသားဒီမိုကရေစီ အဖွဲ့ချုပ် (NLD )ပါတီဝင် တစ်ဦးဖြစ်သည့် အသက် ၆၀ ရှိ အမျိုးသမီးတစ်ဦးကို စစ်ကောင်စီ မှ ဖမ်းဆီးခေါ်ဆောင်သွားကြောင်း စုံစမ်းသိရသည်။
ယမန်နေ့ည ၁၀ နာရီဝန်းကျင်တွင် တောင်ကြီးမြို့နယ် အေးသာယာမြို့ ရပ်ကွက် (၁၀) မှာ နေထိုင်သူ အမျိုးသားဒီမိုကရေစီအဖွဲ့ချုပ် (NLD) ပါတီဝင် ရပ်ကျေးဥက္ကဌ ဒေါ်သန်းသန်းအေးကို စစ်ကောင်စီ တပ်သား ၂၀ ခန့်က ကားဖြင့် လာရောက်ဖမ်းဆီး သွားကြောင်းသိရပါသည်။
“စစ်တပ်ကအာဏာသိမ်းပြီးနောက် နိုင်ငံရေး လှုပ်ရှားမှု ဘာမှမရှိတော့ဘူး၊ ပြီးတော့ ဒီအသက်အရွယ်နဲ့ကျန်းမာရေး မကောင်းတဲ့ အမျိုးသမီးကို သူတို့ ဖမ်းစရာအကြောင်းမရှိဘူး၊ သူ့ကို ဘာကြောင့်ဖမ်းသွားမှန်း မသိရဘူး” ဟု အေးသာယာမြို့ NLD မှ တာဝန်ရှိသူ တစ်ဦးက သျှမ်းသံတော်ဆင့်ကိုပြောသည်။
အဆိုပါ ဖမ်းဆီးခံရသည့် NLD ရပ်ကျေးဥက္ကဋ္ဌဒေါ်သန်းသန်းအေးသည် အသက် ၆၀ ဝန်းကျင် ရှိနေပြီးကျန်းမာရေးလည်း မကောင်းသောကြောင့် အများသူငှာကဲ့သို့ ထွက်ပြေးတိမ်းရှောင်ခြင်းများ မပြုနိုင်သဖြင့် ဖမ်းဆီးခံရခြင်းဖြစ်ကြောင်း သိရသည်။
လက်ရှိတွင် ဒေါ်သန်းသန်းအေးကို စစ်ကောင်စီတို့က ဘယ်နေရာမှာ ဖမ်းဆီးသွားကြောင်း မသိရသေးကြောင်း သိရသည်။
ဒေါ်သန်းသန်းအေး ဖမ်းဆီးခံရသည့် ကိစ္စနှင့် ပက်သက်ပြီး အေးသာယာမြို့ NLD ပါတီမှ တာဝန်ရှိသူတစ်ဦးက”လူမှုရေးကိစ္စတွေကို NLD ပါတီဝင် အနေနဲ့ တက်တက်ကြွကြွဆောင် ရွက်တတ်တဲ့ အသက်အရွယ်ရပြီးကျန်းမာရေးမကောင်းတဲ့ အမျိုးသမီးကို ဖမ်းဆီးထိန်းသိမ်းတာ စိတ်မကောင်းဖြစ်ရပါတယ်” ဟု သျှမ်းသံတော်ဆင့်ကိုပြောသည်။
စစ်တပ်မှ အာဏာသိမ်းပြီးနောက် တောင်ကြီးမြို့နှင် အေးသာယာမြို့ရှိ NLD ပါတီဝင်များကို စစ်ကောင်စီတို့မှမကြာခဏ လာရောက်ရှာဖွေခြင်း ဖမ်းဆီးခြင်း တို့ရှိနေကြောင်းလည်း အေးသာယာမြို့ ပြည်သူတစ်ဦးက သျှမ်းသံတော်ဆင့်ကိုပြောသည်။
Leave a Comments