သျှမ်းပြည် တောင်ကြီးခရိုင် ရွာငံမြို့နယ် မြောက်ဘက်ရှိ ကျေးရွာအများစုကို စစ်ကောင်စီတပ်က မကြာခဏ ဝင်ရောက်လာသည့်အတွက်ကြောင့် ဒေသခံများ စိုးရိမ်စိတ်ဖြင့် နေထိုင်နေရကြောင်း စုံစမ်းသိရှိရသည်။
ယခု ၂၀၂၃ ခုနှစ်အတွင်းတွင် စစ်ကောင်စီတပ်ဖွဲ့က ရွာငံမြို့နယ်ထဲ တပင်ပျော်ကျေးရွာအုပ်စုထဲတွင် မကြာခဏ ဝင်ရောက်စစ်ဆေး နေထိုင်လျက်ရှိကြောင်း သိရသည်။
“မကြာမကြာတော့ လာတယ်။ ကျနော်တို့ ရွာက တောကျတယ်။ မြို့နဲ့ဝေးတယ်။ အခုနောက်ပိုင်းတော့ သိပ်မလာဖြစ်တော့ဘူး။ တစ်ခါလာရင် ၁၀ ရက် ကျော်လောက်လာနေသွားတယ်။ ကြောက်တယ်လို့တော့ မရှိဘူး။ စိုးရိမ်စိတ်တော့ ရှိတာပေါ့။ ကျနော်တို့လည်း ဒီတိုင်းပဲနေလိုက်တာ” ဟု တပင်ပျော်ကျေးရွာအုပ်စုတွင်း နေထိုင်သူက ပြောသည်။
အဆိုပါ စစ်ကောင်စီ တပ်ဖွဲ့များသည် ရွာငံမြို့နယ်အတွင်း ကျေးရွာများထဲတွင် နယ်မြေရှင်းလင်းရေးခေါင်းစဉ်ဖြင့် လာရောက်ခဲ့ပြီး ယခုရက်ပိုင်းတွင်လည်း စစ်ကောင်စီက ဒေသခံများကို ဖမ်းဆီးမှုများ ပိုပြုလုပ်လာနေလျက်ရှိကြောင်း သိရသည်။
ပြီးခဲ့သည့် ဧပြီ ၁၅ ရက်တွင် ရွာငံမြို့ရှိ မစု ကို NLD မဲဆွယ်စည်းရုံးရေးတွင် ပါဝင်ထားသည့်အတွက်ကြောင့် ဖမ်းဆီးခေါ်ဆောင်သွားခဲ့ကြောင်း သိရသည်။
“ ကျမတို့တော့ အခု ရွာငံမှာ မနေတော့ဘူး။ စစ်တပ်က ခနခန လာပြီးတော့ လာဖမ်းသွားတာတွေ ရှိတယ်လေ။ ၁၅ ရက်နေ့တုန်းကလည်း ရွာငံမြို့ပေါ်က မစု ကိုလာဖမ်းသွားတယ်တဲ့။ NLD ကာလတုန်းက မဲဆွယ်စည်းရုံးပါလို့ဆိုပြီးဖမ်းသွားတာတဲ့” ဟု ရွာငံမြို့ပေါ်ရှိ အမျိုးသမီးတစ်ဦးက ပြောသည်။
အလားတူ ပြီးခဲ့သည့် ဧပြီ ၂၃ ရက်နေ့တွင်လည်း ရွာငံမြို့နယ် တပင်ကျေးရွာထဲနေထိုင်သည့် ကိုမောင်လေး နှင့် သဖန်းပင်ကျေးရွာတွင် နေထိုင်သည့် ကိုရွှေတိုး တို့သည် စစ်ကောင်စီက NLD မဲဆွယ်စည်းရုံးရေးပါဝင်သည်ဟုဆိုကာ လာရောက် ဖမ်းဆီးသွားခဲ့ကြောင်း သိရသည်။
ရွာငံမြို့နယ်ထဲတွင် ယခုရက်ပိုင်းအတွင်း စစ်ဆေးမှု တင်းကြပ်နေလျက်ရှိပြီး ဖမ်းယူမှုများရှိနေကြောင်း ဒေသခံများထံမှ သိရှိရသည်။
စစ်တပ်အာဏာသိမ်းပြီး ၂ နှစ်တာ ကာလအတွင်း ပြည်သူ (၃,၄၅၉) ဦး သတ်ဖြတ်ခံထားရပြီး ဖမ်းဆီးခံထားရသူ (၂၁,၈၅၀) ဦးရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က မေ ၃ ရက်နေ့ က ထုတ်ပြန်ချက်အရ သိရသည်။
Leave a Comments