NLD ပါတီ နာယက၊ တပ်မတော် ကာကွယ်ရေး ဦးစီးချုပ်ဟောင်း သူရဦးတင်ဦး သည် ရန်ကုန် ဆေးရုံကြီးတွင် တက်ရောက် ကုသနေစဥ် ယနေ့ (ဂျွန်လ ၁ ရက်) တွင် ကွယ်လွန် သွားသည်ဟု မိသားစုနှင့် နီးစပ်သူက ပြောသည်။
ဗိုလ်ချုပ်ကြီးဟောင်းဖြစ်သူ သူရဦးတင်ဦး သည် ယနေ့ မနက် ၈ နာရီ ၅၀ မိနစ် ဝန်းကျင်တွင် ကွယ်လွန်သွားပြီး လာမည့် ဇွန်လ ၅ ရက်နေ့၊ ဗုဒ္ဓဟူးနေ့တွင် သဂြိုဟ်မည်ဟု သိရသည်။
“အမျိုးသား ဒီမိုကရေစီအဖွဲ့ချုပ်နာယကကြီး၊ ဦးတင်ဦး (အသက်၉၈နှစ်) သည် ယနေ့မနက် (၈:၄၅) တွင် ကွယ်လွန်အနိစ္စ ရောက်သွားပါသည်။ ရုပ်ကလပ်ကို အမှတ်(၃၀) ဗောဓိရိပ်သာလမ်း ဗဟန်းမြို့နယ် နေအိမ်၌ထားရှိပြီး ၅ရက်နေ့ ဗုဒ္ဓဟူးနေ့တွင်ရုပ်ကလာပ်ကို ဂူသွင်း သဂြိုလ်မည် ဖြစ်ပါသည်။ အချိန်ကို ထပ်မံအသိပေးပါမည်” ဟု ၈၈ မျိုးဆက် ဦးမြအေး က ၎င်း၏ လူမှုကွန်ရက်တွင် ရေးသားထားသည်။
ကွယ်လွန်ချိန်တွင် အသက် ၉၈ နှစ်ရှိပြီ ဖြစ်သည့် သူရဦးတင်ဦး သည် ၁၉၄၇ ခုနှစ်မှ ၁၉၇၆ ခုနှစ် အထိ တပ်မတော် ကာကွယ်ရေး ဦးစီးချုပ် အဖြစ် တာဝန်ထမ်းဆောင်ခဲ့ပြီး အာဏာရှင် ဦးနေဝင်း က ရာထူးမှ အနားပေးခဲ့ခြင်း ဖြစ်သည်။
၁၉၈၈ ခုနှစ် NLD ပါတီ စတင်တည်ထောင်ရာတွင် ပါဝင်ခဲ့ပြီး ၁၉၈၉ ခုနှစ်၊ ဒီဇင်ဘာလ အထိ တစ်နှစ်ကြာ ပါတီ ဥက္ကဌ အဖြစ် တာဝန်ယူခဲ့ကာ နာယက အဖြစ် ကွယ်လွန်ချိန်အထိ တာဝန် ထမ်းဆောင်ခဲ့သည်။
ဇေယျကျော်ထင်နှင့် သူရဘွဲ့ ရရှိခဲ့သူ ဦးတင်ဦး ၏ နာရေး အခမ်းအနား ထောင်ကျနေသည့် NLD ပါတီ ဥက္ကဌ ဒေါ်အောင်ဆန်းစုကြည် တက်ရောက်ခွင့်ရမရ ဆိုသည်မှာမူ စောင့်ကြည့်ရမည် ဖြစ်ကြောင်း ဝါရင့် NLD ပါတီဝင် တစ်ဦးက သုံးသပ်သည်။
Leave a Comments