ဒေါ်အောင်ဆန်းစုကြည်၏ အသက်အန္တရာယ်ရှိစေရန် စစ်ကောင်စီက ရည်ရွယ်ဖန်တီးနေကြောင်း အမျိုးသားဒီမိုကရေစီအဖွဲ့ချုပ် (NLD ) က ယနေ့ (စက်တင်ဘာ ၁၄) ရက် ရက်စွဲဖြင့် ထုတ်ပြန်ပြောဆိုလိုက်သည်။

.

ဒေါ်အောင်ဆန်းစုကြည်ကို စစ်ကောင်စီက ဥပဒေမဲ့ မတရား ဖမ်းဆီးထိန်းသိမ်းခြင်းသည် ၎င်းတို့ ဆက်လက်ရပ်တည်နိုင်ရေးအတွက် ကြားခံ တစ်ဦးအဖြစ် ပြန်ပေးဆွဲထားသလို လျှို့ဝှက်ထားသော နေရာများတွင် နိုင်ငံရေး အကျဥ်းသားတစ်ဦးရပိုင်ခွင့် အခွင့်အရေးကို မျှမပေးဘဲ ချုပ်နှောင်ထားသည်။

ထိုမျှမက လုံလောက်သော ကျန်းမာရေး စောင့်ရှောက်မှု မရရှိသည့်အပြင် ကျန်းမာရေး နှင့် ညီညွတ်သော အစားအစာ နှင့် နေရာထိုင်ခင်းတို့ကို သင့်တင့်မျှတအောင် ဆောင်ရွက်မထားဘဲ အသက်အန္တရာယ်ရှိစေရန် ရည်ရွယ်ဖန်တီးထားသည့် အတွက် NLD အနေဖြင့် စိုးရိမ်ကြောင်း၊ ဒေါ်အောင်ဆန်းစုကြည်၏ ကျန်းမာရေး တစုံတရာ ချို့ယွင်းမှု သာမက အသက်အန္တရာယ်ကိုပါ ထိခိုက်မှု ဖြစ်ပေါ်လာပါက အာဏာသိမ်း စစ်ကောင်စီတွင်သာ တာဝန်ရှိကြောင်း NLD ထုတ်ပြန်ချက်တွင် ရေးသားထားသည်။

ဒေါ်အောင်ဆန်းစုကြည်သည် ၁၉၈၈ ခုနှစ်မှ စတင်ပြီး မြန်မာပြည်သူလူထု၏ အကျိုးစီးပွား နှင့် ဒီမိုကရေစီရေးအတွက် အခက်ခဲ အကြပ်အတည်း ပေါင်းစုံကြားမှ ယုံကြည်ချက်ရှိရှိ လုပ်ဆောင်လာခဲ့တာ ၃၅ နှစ်တိုင်ခဲ့ပြီဖြစ်သည်။

ထို့ပြင် အသက်အရွယ်အားဖြင့် (၇၈) နှစ် အရွယ်ရှိလာပြီ ဖြစ်သဖြင့် ကျန်းမာရေးကို အထူးအလေးထားရမည့် အရွယ် ဖြစ်သည်။

“ ဥပဒေမဲ့ မတရားဖမ်းဆီးထားပြီး ဥပဒေ လုပ်ထုံးလုပ်နည်းများနဲ့ အညီ ပြည်လည်ခုခံချေပခွင့်ကောင်းမွန်စွာမရရှိတဲ့အပြင်၊ အများလူထုရှေ့မှောက်မှာ ပွင့်လင်းမြင်သာ တရားစီရင်ရေးစနစ်ကို လုံးဝမကျင့်သုံးဘဲ လူထုမျက်ကွယ်မှာ မတရားပြစ်ဒဏ် ချမှတ်ခံထားရပါတယ်” လို့ NLD ထုတ်ပြန်ချက်တွင် ထည့်သွင်းရေးသားထားသည်။

ထို့အပြင် မတရားပြစ်ဒဏ်များ ချမှတ်ခံထားရသော်လည်း မြန်မာပြည်သူလူထုသာမက နိုင်ငံတကာ ခေါင်းဆောင်များကပါ ဒေါ်အောင်ဆန်းစုကြည်သည် ပြစ်ဒဏ်များကို လုံးဝမကျူးလွန်ကြောင်း ယုံကြည်ထားကြသည်ဟု NLD က ပြောဆိုလိုက်သည်။