စာရေးဆရာမ “မွန်မွန်မြတ်” ရေးသားထားသည့် “Aung San Suu Kyi: The Realities of Power in Burma’s Authoritarian Legacy” အမည်ရ စာအုပ်သစ် မိတ်ဆက်ပွဲ ကို ယမန်နေ့ (စက်တင်ဘာ ၁၀)ရက်တွင် ချင်းမိုင်မြို့ Payap တက္ကသိုလ်၌ ကျင်းပခဲ့သည်။

အဆိုပါ စာအုပ်သည် ဒေါ်အောင်ဆန်းစုကြည်၏ မြန်မာ့နိုင်ငံရေးလောကထဲ စတင်ဝင်ရောက်လာသည့်အချိန်မှစပြီး အစိုးရ တာဝန်ယူခဲ့သည့် ကာလ နှင့် လက်ရှိ အချိန်ထိ ဖြတ်သန်းနေရသည့် နိုင်ငံရေးခရီးစဉ် အကြောင်းနှင့် အာဏာရှင် အမွေဆိုး၏ အကန့်အသတ်ကြား ရုန်းကန်ခဲ့ရသည့် အခြေအနေ ကို ခြုံငုံဆန်းစစ်ထားသည်။

ထိုစာအုပ်ကို နှစ်ပေါင်း ၁၀နှစ်ကျော် အချိန်ယူ ပြုစုရေးသားထားသည့် စာအုပ်ဖြစ်ကြောင်း စာရေးသူက တက်ရောက်လာသည့် ပရိသတ်များကို ပြောသည်။

စာအုပ်ပြုစုရာတွင် ဒေါ်အောင်ဆန်းစုကြည်၏ နိုင်ငံရေး အတွေးအခေါ် (Political Philosophy) သည် အုပ်ချုပ်သူနှင့် အုပ်ချုပ်ခံလူတန်းစား အားလုံး အာဏာအမွေဆိုး မှ လွတ်မြောက်ဖို့ “အကြောက်တရား ကင်းရေး” ဆိုသည့် သူ၏ နိုင်ငံရေး အတွေးအခေါ်သည် အနာဂတ် မျိုးဆက်များအထိ ဆက်လက်အရေးပါနေမည်ဟု စာရေးဆရာမ မွန်မွန်မြတ်က ပြောဆိုလိုက်သည်။

စာရေးဆရာမ မွန်မွန်မြတ်သည် မြန်မာနိုင်ငံ၏ လွတ်လပ်ပြီး အမှီအခိုကင်းသည့် စာရေးဆရာမ၊ သတင်းစာဆရာမတဉီးဖြစ်သည်။

ထို့အပြင် “မြတ်”ဆိုသည့် ကလောင်အမည်ဖြင့် ၁၉၈၉ ခုနစ်မှစတင်ကာ မဂ္ဂဇင်းများတွင် ကဗျာများ၊ ဝတ္ထုတို၊ ဝတ္ထုရှည်နှင့် အခန်းဆက် ဝတ္ထုရှည်များကို ရေးသားခဲ့သည်။

၂၀ဝ၃ခုနှစ်တွင် အခြေခံသတင်းစာပညာကို စတင်လေ့လာခဲ့ပြီး ၂၀ဝ၄ခုနှစ်တွင် သတင်းမီဒီယာလောကသို့ စတင်ဝင်ရောက်ခဲ့သည်။ ၂၀ဝ၇ခုနှစ်မှစ၍ ပြင်သစ်သတင်းဋ္ဌာနနှင့် ဘန်ကောက်ပို့စ့် သတင်းစာ အပါအဝင် နိုင်ငံတကာ သတင်းအေဂျင်စီအချို့နှင့် အင်္ဂလိပ်ဘာသာဖြင့်ရေးသားထုတ်ဝေသော သတင်းစာအချို့တွင် သတင်းဆောင်းပါးများ ရေးသားခဲ့သူ တဉီးလည်းဖြစ်သည်။

၂၀၁၂ခုနစ်တွင် သတင်းစာပညာဆိုင်ရာ မဟာဘွဲ့ရယူခဲ့ပြီး၊ ၂၀၁၇- ၂၀၂၃ခုနစ် အထိ ထိုင်းနိုင်ငံ Payap တက္ကသိုလ်တွင် Peace Studies ဌာနတွင် ပါရဂူကို သင်ယူခဲ့သည်။ PhD သုတေသန အဖြစ် “ The Philosophical Foundations of Aung San Suu Kyi’s Political Thought” ကို လေ့လာရေးသားခဲ့သည်။

လက်ရှိတွင်လည်း Payap တက္ကသိုလ် Peace Studies ဌာနတွင် ကတိက အနေဖြင့် တာဝန်ထမ်းဆောင်နေသူလည်း ဖြစ်သည်။