သျှမ်းပြည်အရှေ့ပိုင်း မိုင်းတုံမြို့ ထုံးဘိုရပ်ကွက်ရှိ NLD ပါတီရုံးကို စစ်ကောင်စီလက်အောက်ခံ မြို့နယ် ထွေအုပ်ရုံးက လာရောက်ချိတ်ပိတ်သွား သည်ဟု စုံစမ်းသိရသည်။
ယမန်နေ့ (ဒီဇင်ဘာလ ၁၁ ရက်) နံနက်ပိုင်းအချိန်တွင် မိုင်းတုံမြို့ ထုံးဘိုရပ်ကွက်ရှိ အမျိုးသားဒီမိုကရေစီအဖွဲ့ချုပ် (NLD ပါတီ) ရုံးကို စစ်ကောင်စီ၏ အမိန့်ကြောင့် မြို့နယ်ထွေအုပ်ရုံးက ၎င်းရုံးကို လာရောက်ချိတ်ပိတ်လိုက်သည်ဟု ဒေသခံတစ်ဦးက သျှမ်းသံတော်ဆင့်ကို ပြောသည်။
အဆိုပါ မိုင်းတုံမြို့သို့ ပြီးခဲ့သည့် (ဒီဇင်ဘာလ ၁၀ ရက်) တွင် ကျိုင်းတုံမြို့အခြေစိုက် တြိဂံဒေသ တိုင်းစစ်ဌာနချုပ် တသခ တိုင်းမှူးက လာရောက်စစ်ဆေးခဲ့ကာ မြို့ပေါ်ရှိ NLD ပါတီ ရုံးခန်းကိုလည်း ချိတ်ပိတ်ခိုင်းလိုက်ပြီး တိုင်းမှူးမှာ နားကောင်းမူးဒေသဘက်ကို ဆက်လက်သွားရောက်ခဲ့သည်ဟု ဒေသခံများက ပြောသည်။
“NLD ရုံးကို သန့်ရှင်းရေး လုပ်ပေးတဲ့သူဆီ မြို့နယ်အုပ်ချုပ်ရေးမှူးအဖွဲ့က သော့တောင်းယူသွားတယ်။ ပြီးတော့ အထဲဝင်ကြည့်ပြီး ချိတ်ပိတ်သွားတာပဲ။ သော့လည်း သူတို့ပဲ ယူသွားတာ” ၎င်းဒေသခံ အမျိုးသမီးက သျှမ်းသံတော်ဆင့်ကို ပြောဆိုသည်။
ပြီးခဲ့သည့် ၂၀၂၂ ခုနှစ်တွင် မိုင်းတုံမြို့နယ် အုပ်ချုပ်ရေးမှူး ဦးလွင်မှူးသည် ၎င်းပါတီကို တရားစွဲပြီး မြို့၏ NLD ပြည်သူ့လွှတ်တော် ကိုယ်စားလှယ်ဟောင်းကို စစ်ကောင်စီက ဖမ်းဆီးကာ ထောင်ဒဏ် ၂ နှစ် ချမှတ်ခံရပြီး ကျန်အဖွဲ့ဝင် ၆ ဦးကိုလည်း အခြားအဖွဲ့အစည်းကို ထောက်ပို့သည့် သတင်းကြောင့် ထောင်ဒဏ် ၁၅ ခန့် ချမှတ်ခံလိုက်ရသည်ဟု ဒေသခံ အမျိုးသားတစ်ဦးက ဆက်ပြောသည်။
၂၀၂၁ ခုနှစ် စစ်အာဏာသိမ်းပြီးနောက်တွင် NLD ဆိုင်းဘုတ်ကိုလည်း ဖြုတ်ချခဲ့ပြီး ယခင် ရုံးကိုလည်း ချိတ်ပိတ်ခံလိုက်ရသည်ဟု သိရသည်။
“၂၀၂၂ ခုနှစ်တုန်းက NLD ပြည်သူ့လွှတ်တော်ဟောင်းကို စစ်တပ်က ဖမ်းပြီး ထောင်ဒဏ် ၂နှစ် ချလိုက်တယ်။ ပြီးတော့ အဖွဲ့ဝင် ၆ ဦးကိုလည်း အခြားသော အဖွဲ့အစည်းကို ထောက်ပို့တယ်ဆိုပြီး ထောင်ဒဏ် ၁၅ နှစ် ချလိုက်တယ်။ အာဏာသိမ်းတဲ့ချိန်ကလည်း ရုံးက ဆိုင်းဘုတ်ကို ဖြုတ်ချလိုက်တယ်၊ ခုလည်း ထပ်လာပိတ်သွားတယ်”ဟု ဖြစ်စဉ်သိရှိသူ ၎င်းဒေသခံအမျိုးသားက ပြောသည်။
အလားတူ ၂၀၂၄ ခုနှစ် မေလ (၂၉) ရက်တွင်လည်း မိုင်းဖြတ်မြို့၊ ဈေးတန်းရပ်ကွက်ရှိ မြို့မဈေးသို့ အမျိုးသားဒီမိုကရေစီအဖွဲ့ချုပ် NLD ပါတီတံဆိပ်ပါ အင်္ကျီဝတ်ဆင်လာသည့် လူငယ်များကို ဖမ်းဆီးရန်အတွက် စစ်ကောင်စီလက်အောက်ခံ ရဲတပ်ဖွဲ့က မြို့ပေါ်ရပ်ကွက်များတွင် ပိုက်စိပ်တိုက် လိုက်လံရှာဖွေခဲ့ကြောင်း သိရသည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments