သျှမ်းပြည်တောင်ပိုင်း ကျေးသီးမြို့ စစ်ဘေးရှောင်စခန်း အထိ သေနတ်သံကြားနေရသဖြင့် စစ်ရှောင်များ စိုးရိမ်ထိတ်လန့် နေကြောင်း စုံစမ်းသိရသည်။
ပြီးခဲ့သည့် ဇွန်လ ၁ ရက်မှ စတင်ပြီး ယနေ့အချိန်ထိ သျှမ်းပြည်တောင်ပိုင်း ကျေးသီးမြို့ရှိ လွယ်ဟွန်းတောင်ကြော တစ်လျှောက် တိုက်ပွဲဖြစ်ပွားသည့် သျှမ်းပြည်တိုးတက်ရေးပါတီ (SSPP/SSA) နှင့် သျှမ်းပြည်ပြန်လည် ထူထောင်ရေး ကောင်စီ (RCSS/SSA ) တို့သည် စစ်ဘေးရှောင်စခန်း အနီးတွင် ပစ်ခတ်မှုကြောင့် စစ်ရှောင်များ စိုးရိမ်ထိတ်လန့် နေကြောင်း သိရသည်။
“ ကျနော်တို့ စစ်ရှောင်တွေ နေတဲ့နေရာထိတောင် သေနတ်သံကြားနေရတယ်။ လွယ်ဟွန်းတောင် နားက စစ်ရှောင်တွေနေတဲ့ နမ့်အုပ်ဘုန်းကြီးကျောင်းထိ လက်နက်ကျတယ်။ သေနတ်သံက ဆက်တိုက်ကြားရတော့ စိုးရိမ်စိတ်က ရှိနေတုန်းပဲ” ဟု စစ်ဘေးရှောင် တစ်ဦး က သျှမ်းသံတော်ဆင့်ကို ပြောသည်။
လွယ်ဟွန်းတောင် အနီးရှိ စစ်ဘေးရှောင်များနေထိုင်သည့် နမ့်အုပ်ဘုန်းကြီးကျောင်း ကို ဇွန် (၇)ရက် တွင် လက်နက်ကြီး (၂)လုံးကျခဲ့ပြီး၊ ထိုအနီးပတ်ဝန်းကျင်တွင်လည်း သေနတ်သံများ ယနေ့ထိ ဆက်တိုက်ကြားနေရသဖြင့် စစ်ရှောင်တချို့က ကျေးသီးမြို့ပေါ် တိမ်းရှောင်နေရကြောင်း လည်း သတင်းရရှိသည်။
“ စစ်ဘေးရှောင်တွေနေတဲ့နေရာတောင် လုံခြုံမှုမရှိတော့ဘူး။ တိုက်ပွဲဖြစ်တဲ့နေရာနဲ့နီးတော့ ကြောက်နေရတယ်။ တချို့ကျေးသီးမြို့ပေါ် ဆွေမျိုးတွေရှိတဲ့သူဆိုရင် မြို့ပေါ်ပြောင်းသွားကြပြီ” ဟု ကျေးသီး စစ်ဘေးရှောင်များကို ကူညီပေးနေသူ တစ်ဦးက သျှမ်းသံတော်ဆင့် ကို ပြောသည်။
ထို့အပြင် စစ်ဘေးရှောင် ရွာသားတချို့သည် လက်ရှိ အချိန်သည် စိုက်ပျိုးရေးရာသီ ဖြစ်သဖြင့် နေရပ်ပြန်သွားကြသည့် သူများရှိကြသော်လည်း ရွာအနီးတွင် တိုက်ပွဲများ ဖြစ်ပွားနေသဖြင့် စစ်ဘေးပြန်ရှောင်လာရကြောင်းသိရသည်။
“ကျနော်တို့ မပြန်ရဲတော့ပါဘူး၊ မနေ့က စစ်ဘေးရှောင်တစ်ချို့က နေရပ်ပြန်သွားကြပါတယ်၊ဒါပေမယ့် ရွာနားမှာ နှစ်ဖက်လက်နက်ကိုင်တွေက သောင်းကျန်းနေကြလို့ စစ်ဘေးရှောင်စခန်းကို ပြန်လာကြရတယ်” ဟု စစ်ဘေးရှောင်စခန်းမှ ပြည်သူတစ်ဦးက သျှမ်းသံတော်ဆင့်ကို ပြောသည်။
သျှမ်းတပ် (၂)တပ်သည် ယနေ့ အချိန်ထိ စစ်ရေး တင်းမာနေပြီး ၊ စစ်အင်အားဆက်လပ်ဖြည့်ဆည်းမှုပြုလုပ်ကာ ကျေးရွာလမ်းကို အသုံးပြုနေသဖြင့် ပြည်သူများက ရွာပြန်ရန် မဖြစ်နိုင်သေးကြောင်း သိရသည်။
“နှစ်ဖက်စလုံးက စစ်ရေးတွေတင်းမာနေဆဲပဲ၊ ပြီးတော့ စစ်တပ်အင်အားဖြည့်ရင် နှစ်ဖက်လုံးက ကျေးရွာလမ်းကို အသုံးပြုကြတော့ နှစ်ဖက်ထိပ်တိုက်တွေ့ဆုံပြီး တိုက်ပွဲဖြစ်ပွားမှုကိုလည်း ကြောက်တယ်။ ဒါကြောင့် ရွာမပြန်ရဲသေးဘူး” လို့ စစ်ဘေးရှောင်ကို ကူညီထောက်ပံ့ပေးနေသူ တစ်ဦးက သျှမ်းသံတော်ဆင့်ကို ပြောသည်။
သျှမ်းတောင် ကျေးသီးမြို့တွင် (SSPP/SSA) နှင့် (RCSS/SSA ) လဝက်ကြာသည့် အထိ တိုက်ပွဲ ဖြစ်ပွားမှုကြောင့် စစ်ဘေးရှောင် ပြည်သူများ ( ၃၀၀၀ ) ကျော်ရှိနေကြောင်းသိရသည်။
