သျှမ်းပြည်မြောက်ပိုင်း လားရှိုးခရိုင် တန့်ယန်းမြို့နယ် အတွင်း တိုင်းရင်းသားလက်နက်ကိုင်တပ်ဖွဲ့ နှင့် ပြည်သူ့စစ်များ စစ်သားစုဆောင်းမှုပြုလုပ်နေကြောင်း စုံစမ်းသိရသည်။
ထိုဒေသအတွင်းတွင် မေလနောက်ဆုံးပတ်မှ စတင်ပြီး မြောက်ပိုင်းမဟာမိတ်တပ်ဖွဲ့ဖြစ်သည့် သျှမ်းပြည်တိုးတက်ရေးပါတီ (SSPP/SSA)၊ တအာင်း(ပလောင်)တပ်မတော် (TNLA)၊ ကိုးကန့်ဒေသ (MNDAA) နှင့် ဗိုလ်မွန်းဦးဆောင်သည့် ဝမ်ပန်ပြည်သူ့စစ် တို့ စစ်သားစုဆောင်းနေကြောင်း သတင်းရရှိသည်။
သို့သော် တန့်ယန်းမြို့နယ်အတွင်း နေထိုင်သည့် သူများသည် တိုင်းရင်းသားလက်နက်ကိုင် တပ်ဖွဲ့ကို စစ်သားမလုပ်ချင်သဖြင့် ဝမ်ပန်ပြည်သူ့စစ်ထဲသို့ ဝင်ရောက်သွားကြကြောင်း မိုင်းတွမ်း ဒေသခံများ က ပြောသည်။
“ခုလက်ရှိ လူသစ်စုဆောင်းတာက ပလောင် နဲ့ ကိုးကန့်။ သျှမ်းတပ်တွေလည်း ကောက်တယ်။ ဒေသခံတွေတော့ မြို့ထဲကို ထွက်ပြေးကုန်ပြီ။ တစ်ချို့လည်း စစ်သားလုပ်ရမှာကြောက်လို့ ပြည်သူ့စစ်ထဲ ဝင်ကြတယ်” ဟု ထွက်ပြေးနေသည့် မိုင်းတွမ်း ဒေသခံတဦးကပြောသည်။
တန့်ယန်းမြို့နယ်အတွင်းနေထိုင်သည့် သျှမ်းလူမျိုးများသည် သျှမ်းတပ်ထဲသို့ ဝင်ရန် ဆန္ဒရှိကြကြောင်း၊ သို့သော် သျှမ်းလက်နက်ကိုင် (၂)တပ် အချင်းချင်း တိုက်ပွဲဖြစ်ပွားနေသည့်အတွက် သျှမ်းတပ်ထဲမဝင်ရခြင်းဖြစ်ကြောင်း မိုင်းတွမ်းဒေသခံ အမျိုးသမီးတဦးက ပြောသည်။
” ကျမရဲ့ သားတွေကို သျှမ်းစစ်သားပဲ လုပ်စေချင်တယ်။ဒါပေမယ့် သျှမ်းစစ်သား လုပ်ရင်လည်း ကိုယ့်လူမျိုးအချင်းချင်း ပြန်ပစ်ရမှာ ကြောက်လို့ အဲ့ကြောင့် ထွက်ပြေးတာပါ” ဟု မိုင်းတွမ်း ဒေသခံ တစ်ဦး က သျှမ်းသံတော်ဆင့် ကိုပြောသည်။
သျှမ်းတပ် (SSPP/SSA) သည် ၂၀၂၀ ခုနစ်မှ စတင်ကာ တန့်ယန်းမြို့နယ်ရှိ ကျေးရွာများထဲ ပိုမိုလှုပ်ရှား လာကြကြောင်း SSPP ၏ တန့်ယန်းနယ်မြေ အရာရှိတစ်ဦး က သျှမ်းသံတော်ဆင့် ကို ပြောသည်။
“ကျနော်တို့ မသွားလှုပ်ရှားရင် တခြားအဖွဲ့တွေက ပိုပြီး လှုပ်ရှားလာမယ်။ ဒါကြောင့် ကျနော်တို့ ၂၀၂၀ ကစပြီး အဲ့ဘက်ပိုင်းကို ပြန်လှုပ်ရှားလာတယ်။ ငွေတွေ ဆန်တွေ လူတွေ တောင်းတာကတော့ စစ်တပ်တိုင်းရဲ့ ပေါ်လစီဖြစ်တယ်။ အသက် (၁၈) နှစ်ပြည့်ရင် ဘယ်သူမဆို စစ်သင်တန်းတက်ရမှာပါ” ဟု SSPP အရာရှိ တစ်ဦး ကသျှမ်းသံတော်ဆင့် ကိုပြောသည်။
အသက် (၁၈)နှစ် ပြည့်သူတိုင်း လက်နက်ကိုင်တပ်ဖွဲ့အတွင်းသို့ ဝင်ရာက်ရန် ပေါ်လစီ ရှိထားသော်လည်း ငွေကြေးအဆင်ပြေသည့် မိသားစုဝင်တချို့ လက်နက်ကိုင် တပ်ဖွဲ့ထဲမဝင်ပါက တစ်ဦးလျှင် သိန်း(၄၀) မှ (၅၀) ထိ လူငှားပြီး အစားထိုးနေကြောင်း သိရသည်။
Leave a Comments