သျှမ်းပြည် ကျောက်မဲခရိုင်၊ သီပေါမြို့နယ်၊ နမ့်လန်မြို့တွင် သျှမ်းတပ်မှ တပ်သားသစ် အတွက် ဒေသခံ လူငယ်များ လာရောက်ဖမ်းဆီးခေါ်ဆောင်ရာ သျှမ်းတပ် အချင်းချင်း တိုက်ခိုက်မှုကို မလိုလားသည့်အတွက် တပ်သားသစ် စုဆောင်းမှုတွင် မပါချင်ကြောင်း စုံစမ်းသိရသည်။
“အရင်ကတော့ တစ်ရွာ၊ တစ်ရပ်ကွက်ကို ဘယ်လောက်ဆိုပြီးတော့ စာရင်းချပေးတာ။ အခုတော့ သူတို့ ကိုယ်တိုင် ဒီအိမ် ဒီနာမည် ဆိုပြီး စာရင်းအတိအကျနဲ့လာတာ၊ သား ၂ ယောက် ရှိတဲ့သူရော၊ သားတစ်ယောက် တည်းရှိပြီး ဖခင်ဖြစ်သူက အသက်ငယ်သေးရင်လည်း ခေါ်သွားတယ်” ဟု နမ့်လန်မြို့မှ အသက် ၃၀ ကျော် အမျိုးသား တစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် မေလ ၁၉ ရက်မှ စတင်ကာ နမ့်လန်မြို့တွင်း ရပ်ကွက်များဖြစ်ကြသည့် စက်ရုံရပ်ကွက် (ပွၵ့်ယူင်ႇၸၢၵ်ႈ) ၊ မက်မုံဟိန် ရပ်ကွက် (ပွၵ့်မၢၵ်ႇမူင်ႈႁိင်ႇ) ၊ အေးချမ်းသာရပ်ကွက် (ပွၵ့်ၵတ်းယဵၼ်) နှင့် တောင်ပိုင်းရပ်ကွက် (ပွၵ့်ၸၢၼ်း) တို့တွင် SSPP/SSA က တပ်သားသစ်အတွက် ဝင်ရောက်ဖမ်းဆီးခြင်း ဖြစ်ကြောင်း သိရသည်။
လက်ရှိတွင် ဒေသခံ အမျိုးသားများ၊ လူငယ်များ ၂၀ ထက်မနည်း ဖမ်းဆီးခေါ်ဆောင်သွားခြင်း ခံရပြီး တချို့ ကလည်း ရှောင်တိမ်းခြင်းများ ပြုလုပ်နေရကြောင်း ၎င်း အမျိုးသားက ဆက်ပြောသည်။
“ညဘက်အချိန်ပဲ ဝင်ဖမ်းတာ၊ တစ်ညကို ၃ ယောက်ကနေ ၆ ယောက်ထိ ပါသွားတယ်၊ အခုဆိုလည်း သားနှစ် ယောက်ရှိတဲ့ သူတွေက ရှောင်ကြတယ်၊ သားတစ်ယောက်တည်း ရှိတဲ့သူတွေလည်း ရှောင်ကြတယ်၊ ကြောက်ကြ တာပေါ့၊ စစ်သားမလုပ်ချင်ဘူး၊ မရှောင်ရသေးသူတွေလည်း ဘယ်အချိန်ခေါ်သွားခံရမလဲဆိုပြီးတော့ စိုးရိမ်ကြောက်လန့် နေရတယ်” ဟု အထက်ပါ အမျိုးသားက ဆက်ဆိုသည်။
သျှမ်းတပ် (၂) တပ်အချင်းချင်း ပစ်ခတ်တိုက်ခိုက်နေသည်ကို ပြည်သူများ မလိုလားသဖြင့် လူငယ်များ စစ်မှုထမ်း မလုပ်ချင်ကြောင်း ဒေသခံများက ဆက်လက်ပြောသည်။
“SSPP က လာကောက်လည်း ကိုယ့်သားသမီး ဆွေမျိုးတွေထဲကပဲ၊ RCSS က လာကောက်လည်း ဒီဆွေဒီမျိုး ထဲ ကပဲ ၊ ဒါကြောင့် ကိုယ့်ရှမ်းလူမျိုး အချင်းချင်းသာမက ကိုယ့်ဆွေမျိုးအချင်းချင်း ပြန်တိုက်ခိုက်နေရမှာကို မလို လားဘူး။ အဲ့ကြောင့်လည်း စစ်မှုထမ်း မလုပ်ချင်တာ” ဟု နမ့်လန်မြို့ခံ အသက် ၂၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ တပ်သားသစ် အတွက် ပြည်သူလူထုများကို ဖမ်းဆီးခေါ်ဆောင်ခြင်း နှင့် ပတ်သက်ပြီး ရှမ်းပြည် တိုးတက်ရေးပါတီ၊ ရှမ်းပြည်တပ်မတော် (SSPP/SSA) ၏ ပြောရေးဆိုခွင့်ရှိသူများထံသို့ အကြိမ်ကြိမ် ဖုန်းဆက်သော်လည်း ဖုန်းလက်ခံ ဖြေကြားခြင်း မရှိပေ။
သျှမ်းတပ် (၂) တပ်သည် သျှမ်းပြည်မြောက်ပိုင်း ကျောက်မဲခရိုင် ကျောက်မဲမြို့ဘက်မှ စတင်ဖြစ်ပွားခဲ့ပြီး သျှမ်းတောင် ရပ်စောက်မြို့နယ်အထိ တိုက်ပွဲ ပျံ့ခဲ့သည်။
Leave a Comments