သျှမ်းပြည်တောင်ပိုင်း၊ ရွာငံမြို့နယ် မြောက်ဘက်ရှိ ကျေးရွာများတွင် ပျူစောထီးများက စစ်ကောင်စီ အတွက် စစ်သားစုဆောင်းပေးနေကြောင်း စုံစမ်းသိရှိရသည်။
ဇွန်လ ပထမ ပတ်မှစပြီး ယနေ့ (ဇွန်လ ၁၉ ရက်)အထိ စစ်ကောင်စီလက်အောက်ခံ ပျူစောထီးများက ရွာငံမြို့နယ် ကျေးရွာတစ်ချို့တွင် လက်နက်ပြခြိမ်းခြောက်မှုများ လုပ်ဆောင်နေပြီး ပြည်သူ့စစ်မှုထမ်းသင်တန်း အမှတ်စဉ် (၁၅) အတွက် စစ်သားစုဆောင်းပေးနေပြီး ၎င်းပျူစောထီးများအတွက် ကျေးရွာများမှ လစဉ်ကြေးများ ထည့်ပေးနေရကြောင်း ဒေသခံများက ပြောသည်။
“ရွာထဲကို ပျူစောထီးတွေက စစ်သားတွေ ခေါ်လာတယ်။ အခုလည်း ရွာထဲမှာ စစ်မှုထမ်းဖို့အတွက် လူ စာရင်းတွေ ကောက်နေတယ်၊ ဘယ်သူတွေ ပါလဲတော့မပြောဘူး။ ကြိုပြောလိုက်ရင် ထွက်ပြေးမှာစိုးလို့ စစ်သားတွေ လာတဲ့အချိန်မှ သွားဖမ်းခေါ်ပြီး ထည့်ပေးဖို့ စီစဉ်ထားတယ်လို့ ပြောတယ်” ဟု ရွာငံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့အပြင် အဆိုပါ ပျူစောထီးများသည် ၄င်းတို့အတွက် အဖွဲ့ရန်ပုံငွေဟုဆိုကာ ကျေးရွာတစ်ရွာလျှင် ကျပ် (၇) သိန်း လစဉ်ကောက်ခံနေခြင်းကြောင့် တစ်အိမ်ထောင် ကျပ် (၂၀၀၀) နှုန်း အနည်းဆုံး ပေးဆောင်နေရပြီး အဆင်မပြေကြောင်း ၎င်းက ဆက်ပြောသည်။
အလားတူ လွိုင်လင်မြို့နယ် ပင်လုံမြို့တွင်လည်း စစ်မှုထမ်းအပတ်စဉ်သစ်အတွက် မဲနှိုက်ရန် ဆင့်ခေါ်စာရောက်ရှိလာပြီး စစ်မှုထမ်းမထမ်းလိုသည့် လူငယ်များ တိမ်းရှောင်ရန် ပြင်ဆင်နေကြသော်လည်း မိသားစုအတွက် ထိခိုက်လာမည်ကို စိုးရိမ်နေကြကြောင်း ပင်လုံမြို့ခံ အမျိုးသားတစ်ဦးကလည်း ပြောသည်။
“စစ်မှုထမ်းဖို့ မဲနှိုက်သွားရမယ်ဆိုပြီး ဒီနေ့ပဲ စာရောက်လာတာ။ ခြိမ်းခြောက်တာမျိုးတော့ မရှိပေမဲ့ လာကိုလာရမယ်၊ မလာရင် အစားထိုးမဲပြန်နှိုက်ရမှာပဲ။ အဲ့လိုဆိုတော့ ရှောင်ပြေးလို့လည်း ရမှာမဟုတ်ဘူး။ မဲပေါက်လို့ မသွားရင်လည်း မိသားစုကို တစ်ခုခုလုပ်မှာ စိုးရိမ်ရတယ်”ဟု ပင်လုံမြို့ခံ အမျိုးသားတစ်ဦးက ပြောသည်။
ပင်လုံမြို့ ရပ်ကွက်အုပ်ချုပ်ရေးမှူးရုံးမှ ဆင့်ခေါ်စာထဲတွင် လာမည့် ဇွန်လ (၂၂) ရက်နေ့ နံနက် (၉)နာရီအချိန်တွင် အသက်(၁၈) မှ (၃၅) နှစ် ကြားရှိ လူငယ်များအားလုံး ပင်လုံမြို့ ရပ်ကွက် (၃)ရှိ ဝမ်စံခမ်းခန်းမသို့ သွားရောက်မဲနှိုက်ရမည်ဟု ထည့်သွင်းဖော်ပြထားသည်။
ထို့အပြင် လွိုင်လင်မြို့တွင်လည်း စစ်မှုထမ်းရန်အတွက် ယမန်နေ့ (ဇွန်လ ၁၈ ရက်)မှစ၍ စစ်မှုထမ်းစာရင်း အမည်ပေါက်သည့် ဒေသခံလူငယ်များ မဲနှိုက်နေကြရကြောင်းလည်း ဒေသခံများထံမှ သိရသည်။
အလားတူ ဇွန်လ (၁၆) ရက်တွင်လည်း မိုင်းတုံမြို့ မြို့မရပ်ကွက်တွင် စစ်မှုထမ်းရန်အတွက် အစည်းအဝေးခေါ် ယူကာ အသက် (၁၈) နှစ်မှ (၃၅ )ကြား အမျိုးသားများကို အလှည့်ကျ စစ်မှုထမ်းခိုင်းမည်ဖြစ်ပြီး ထွက်ပြေးလျှင်အရေးယူမည်ဟုလည်း စစ်ကောင်စီအဖွဲ့ဝင်များက ပြောဆိုသွားကြောင်း သိရသည်။
Leave a Comments