သျှမ်းပြည်မြောက်ပိုင်း တန့်ယန်းမြို့တွင် မီးဖြတ်တောက်ချိန်များနေသဖြင့် ပြည်သူများ ဝင်ငွေပိုင်း ထိခိုက်မှု ရှိနေကြောင်း သတင်းသိရသည်။
ယခု ဒီဇင်ဘာလဆန်းပိုင်းမှ စတင်ကာ တန့်ယန်းမြို့အတွင်း၌ အချိန်ပိုင်း အလှည့်ကျပေးမည်ဟု အချိန်ဇယား ထုတ်ပြန်ခဲ့သော်လည်း မီးပျက်သည့် အချိန် များနေပြီး ဒေသခံများက စားသောက်ရေးပိုင်း နှင့် ဝင်ငွေပိုင်းများ ထိခိုက်နေကြောင်း ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“အချိန်ဇယားပေးပြီး မီးကိုလည်း အချိန်မှန် မပေးဘူး၊ ပေးတဲ့ လိုင်းကပေးပြီး တချို့လိုင်းကတော့ ၂ ရက်တိုင်တိုင် မီးလုံးဝ မရတာလည်း ရှိနေတယ်၊ မီးပေး ရင်လည်း တစ်ချိန်လုံး braker ကျတယ် ပြန်တင်ပေးဖို့ပြောတာနဲ့ မီးက ပြန်ပျက်ပြီ၊ ဒီမီးကြောင့် တစ်မြို့လုံး ဒုက္ခရောက်နေရတယ်” ဟု အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ လျှပ်စစ်မီးပေး အချိန်မမှန်မှုကြောင့် တန့်ယန်းမြို့မှ ပြည်သူများသည် ချက်ပြုတ်စားသောက်ရေး အတွက် အခက်အခဲများ ရှိနေသည့်အပြင် တချို့သော ဝမ်းစာရှာဖွေရေးလုပ်ငန်းများလည်း ထိခိုက်လာပြီး ဝင်ငွေ ပိုင်း ထိခိုက်လာကြောင်းလည်း သိရသည်။
“အချိန်ဇယားအတိုင်း အတိအကျလာရင် နဲနဲအဆင်ပြေပါသေးတယ်၊ အခုက ညသန်းခေါင်ကြီး ရေထတင်ရတယ်၊ အဝတ်ထလျှော် ရတယ်၊ ဆံပင်လုပ်တဲ့ဆိုင်တွေဆိုလည်း မီးမရတော့ မီးစက်နဲ့ ဆိုတော့ အခုဆီစျေးနဲ့ တအားကို ဒုက္ခရောက်ကြတယ်၊ လာချင်တဲ့ အချိန်လာတော့ ထမင်းဟင်းလည်း မီးသွေး နဲ့ပဲ ချက်ရတယ်၊ ဥပမာ တစ်ရက် ၁ သိန်းလောက်ရရင် ဆီဖိုးက ၃/၄ သောင်းလောက်ကို ပြန်ထွက်နေပြီ” ဟု အထက်ပါ အမျိုးသားက ပြောသည်။
လျှပ်စစ်မီး မမှန်မှုကြောင့် ပြည်သူများ ကြုံတွေ့နေရသည့် အခက်အခဲများကို သက်ဆိုင်ရာ တာဝန်ရှိသူများကို တင်ပြတောင်းဆိုသော်လည်း မည်သည့် တုံ့ပြန်ပြောဆိုချက်မှ မရှိကြောင်း အထက်ပါ အမျိုးသားက ဆက်ပြောသည်။
“တန့်ယန်းက ပြည်သူတွေလည်း ဒီလျှပ်စစ်မီးကြောင့် တော်တော် ဒုက္ခရောက်နေကြတယ်၊ ဝင်ငွေပိုင်းတွေ ထိခိုက်သလို အခုကဆို မီးလုံးဝ မလာတာလည်း ရက်တွေ ဆက်တိုက်ရှိဖူးတယ်၊ ရပ်ကွက် တာဝန်ရှိသူတွေ လျှပ်စစ်တာဝန်ရှိသူတွေလည်း ဘာပြောပြော ငြိမ်နေကြတယ်” ဟု အထက်ပါ ပုဂ္ဂိုလ်က ဆက်ပြောသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် တန့်ယန်းမြို့ အပါအဝင် သျှမ်းပြည်တဝှမ်းလုံး၌ လျှပ်စစ်မီး ပြတ်တောက်မှု အချိန်များပြားနေပြီး ပြည်သူများ၏ အခက်အခဲကို သက်ဆိုင်ရာ တာဝန်ရှိသူများက လျစ်လျူရှုနေသည့်အပေါ် ဝေဖန်ပြောဆိုမှုများလည်း မြင့်တက်နေသည်။
Leave a Comments