ကျေးသီးမြို့ပေါ်သို့ စစ်ရှောင် (၇၀၀)ကျော်ထိ ရှိလာ

0

သျှမ်းပြည်တောင်ပိုင်း ကျေးသီးမြို့နယ် အနီး သျှမ်းတပ်(၂)တပ် တိုက်ပွဲဖြစ်ပွားမှုကြောင့် ကျေးသီးမြို့ပေါ်သို့စစ်ရှောင် (၇၀၀)ကျော်ထိ ရောက်ရှိလာကြောင်း စုံစမ်းသိရသည်။

ဇွန်(၂)ရက်မှစတင်ကာ ဇွန်(၄)ရက်ထိ သျှမ်းပြည်ပြန်လည်ထူထောင်ရေး ကောင်စီ (RCSS/SSA)နှင့် သျှမ်းပြည်တိုးတက်ရေးပါတီ (SSPP/SSA)တို့ တိုက်ပွဲကြောင့် ပြည်သူ (၇၀၀)ကျော် စစ်ဘေးရှောင်နေရသည်။

“ ဒီနေ့ထပ်ရောက်လာတာ စုစုပေါင်း (၄၂၀)ကျော်ရှိတယ်။ အားလုံးကတော့ (၇၀၀)ကျော်ရှိပြီ၊ စစ်ရှောင်တွေ ကတော့ အဆက်မပြတ်ထပ်ရောက်လာတယ်” ဟု မိုင်းကောင်ကျေးရွာမှ ဒေသခံ တစ်ဦး က သျှမ်းသံတော်ဆင့်ကို ပြောသည်။

ယနေ့ ထပ်ရောက်လာသည့် စစ်ရှောင် (၄၂၀)ဦး သည် မိုင်းကောင်ကျေးရွာအုပ်စုဘက် မတ်ဝေါင်ရွာ၊ ဝမ်လတ်းရွာ၊ ဟိုးနားရွာ၊ ဝမ်ဟိုဖိုင်ရွာ၊ ဖိုင်မုန်ရွာ နှင့် နားဟျိုးရွာ မှ ပြည်သူများဖြစ်ကြသည်။

ယနေ့(ဇွန် ၄)ရက် မနက် ၇နာရီဝန်းကျင်တွင် ကျေးသီးမြို့နှင့် (၁၅)မိုင်ခန့် ဝေးကွာသည် မိုင်းကောင်ကျေးရွာအုပ်စု အတွင်းရှိ ကျေးရွာများထဲသို့ လက်နက်ကိုင် (၂)ဖွဲ့မှ ပြည်သူလူထုကို နည်း ပေါ်တာဆွဲမည်ဆိုသည့် ခြိမ်းခြောက်မှုကြောင့် ရွားသားများက ထိတ်လန့်ကာ ထွက်ပြေး လာကြကြောင်း မိုင်းကောင် ဒေသခံတစ်ဦးက သျှမ်းသံတော်ဆင့် ကို ပြောသည်။

“ဒီမနက် ၇ နာရီခွဲလောက်မှာ ရွာသားတွေကို ပေါ်တာဆွဲမယ်၊ လမ်းပြခိုင်းမယ်ဆိုပြီး သတင်းတွေကြားရတော့ ကျနော်တို့လည်း ရရာပစ္စည်းတွေသိမ်းပြီး ထွက်လာခဲ့တာပါ၊ ကျနော်တို့ထွက်လာတုန်းကတော့ သေနတ် သံ မကြားရသေးဘူး၊ ကျေးသီးရောက်ပြီးမှ သေနတ်သံတွေကို စကြားရတယ်” လို့ ၎င်းက ပြောသည်။

ထို့အပြင် ကျေးသီးမြို့နယ် နှင့် မိုင်းနောင်ကြား လွိုင်ဟွန်းတောင် အနီးတစ်လျှောက်တွင် RCSS/SSA နှင့် SSPP/SSA တို့သည် ဇွန်လ ၁ ရက်နေ့ က တည်းက အပြန်အလှန် နယ်မြေကျူးလွန်သည်ဆိုသည့် အကြောင်းပြချက်ဖြင့် တိုက်ပွဲဖြစ်ပွားခဲ့ပြီး၊ ပြည်သူများ ထွက်ပြေးတိမ်းရှောင်နေရကြောင်း သိရသည်။

“တိုက်ပွဲက တစ်နေ့ထက်တစ်နေ့ပိုတိုးလာတော့ စစ်ဘေးရှောင်တွေကလည်း များသာထက်များလာပြီ၊ အရင် တုန်းက နောင်ဆွမ်းကျောင်းမှာပဲ တည်းခိုကြတာ၊ အခုတော့ ဘုန်းတော်ကြီးကျောင်းလေးကျောင်းလုံးက စစ်ဘေးရှောင်တွေနဲ့ ပြည့်နေပြီ” ဟု စစ်ရှောင်များနားခိုသည့် နောင်ဆွမ်းကျောင်းမှ ဦးဇင်းတစ်ပါးက သျှမ်းသံတော်ဆင့်ကို မိန့်ကြားသည်။

သျှမ်းလက်နက်ကိုင် တပ်ဖွဲ့ (၂)တပ် ကို သျှမ်းသံဃာများ၊ သျှမ်းပြည်သူများက တိုက်ပွဲများ ရပ်တန့်ရန် အကြိမ်ကြိမ် တောင်းဆိုခဲ့သော်လည်း တိုက်ပွဲ ဆက်လက်ဖြစ်ပွားနေသည့်အပေါ် စိတ်မကောင်းကြောင်း လည်း ဦးဇင်း ကထပ်လောင်းမိန့်သည်။

ယခုကာလသည် စိုက်ပျိုးရေး လုပ်ဆောင်ရမည့် အချိန်ကာလဖြစ်သည့်အတွက် သျှမ်းတပ်(၂)တပ် ခေါင်းဆောင်များ အနေဖြင့် တိုက်ပွဲများအမြန်ဆုံး ရပ်တန့်ပေးရန် လည်း သျှမ်းပြည်သူများက တောင်းဆိုလိုက်သည်။

Leave a Comments