သျှမ်းပြည်တောင်ပိုင်း ကျေးသီးမြို့အနီးတွင် သျှမ်းလက်နက်ကိုင် (၂)ဖွဲ့ အပြန်အလှန် နယ်မြေကျူးလွန်မှု ဟု ပြောဆိုကာ တိုက်ပွဲ ၂ရက်ဆက်တိုက် ဖြစ်ပွားခဲ့ကြောင်း စုံစမ်းသိရသည်။
ကျေးသီးမြို့နယ် နှင့် မိုင်းနောင်ကြား လွိုင်ဟွန်းတောင်အနီးတွင် ယမန်(ဇွန် ၁)ရက် မနက်ပိုင်းမှ စတင်ကာ သျှမ်းပြည် ပြန်လည်ထူထောင်ရေးကောင်စီ (RCSS/SSA)နှင့် သျှမ်းပြည်တိုးတက်ရေး ပါတီ (SSPP/SSA) တို့သည် အပြန်အလှန် နယ်မြေကျူးလွန်သည် ဟုဆိုကာ တိုက်ပွဲ ၂ရက်ဆက်တိုက်ဖြစ်ပွားခဲ့ရပြီး စစ်ဘေးရှောင် (၂၀၀)ကျော် ထွက်ပြေးတိမ်းရှောင်နေကြရသည်။
“မနေ့က တိုက်ပွဲစဖြစ်ရတယ်၊ ပြောရမယ်ဆိုရင် SSPP တို့က ကျနော်တို့ကနယ်မြေထဲကို ကျူးကျော်ဝင်ရောက်လာလို့ ကျနော်တို့ဖက်ကလည်း ပြန်ပြီး ခုခံကာကွယ်တဲ့ သဘောပါ” ဟု RCSS/SSA ပြောရေးဆိုခွင့် ရှိသူ ဗိုလ်မှူးခမ်းစံက သျှမ်းသံတော်ဆင့်ကို ပြောသည်။
ထိုနည်းတူ SSPP/SSA မှ ပြောရေးဆိုခွင့် ရှိသူ ဗိုလ်မှူး စိုင်းဖုန်းဟန် ကလည်း “ အခု တိုက်ပွဲဖြစ်ပွားတဲ့နေရာတွေကို ကြည့်မယ် ဆိုရင် များသောအားဖြင့် က ကျနော်တို့ SSPP ထိန်းချုပ်ထားတဲ့ နယ်မြေတွေမှာ ဖြစ်နေကြတယ်ဆိုတာ အားလုံးသိတဲ့အတိုင်းပဲ” ဟု သျှမ်းသံတော်ဆင့်ကို ပြောသည်။
လက်ရှိတိုက်ပွဲဖြစ်ပွားမှုကြောင့် ပြည်သူများထွက်ပြေးတိမ်းရှောင်နေရကြောင်း လည်း ဗိုလ်မှူးစိုင်းဖုန်းဟန် က ပြောသည်။
ထို့ကြောင့် သျှမ်းတပ် (၂)တပ် နယ်မြေကျူးလွန်မှုကြောင့် တိုက်ပွဲဖြစ်ပွားနေခြင်းသည် ပြည်သူများအတွက် စိုးရိမ်ပူပန်မှု ဖြင့် စစ်ဘေးရှောင်နေရပြီး၊ သျှမ်းတပ်(၂)တပ်အနေဖြင့် ယခုကဲ့သို့ တိုက်ပွဲထိတွေ့မှုမျိုးမဖြစ်စေချင်ကြောင်းလည်း ကျေးသီးဒေသခံ တစ်ဦး ကပြောသည်။
“ သျှမ်းတပ် (၂)တပ် နယ်မြေလုနေကြတယ်လို့ ကျနော်ထင်တယ်။ ဒါက မဖြစ်သင့်ဘူး။ အခု ကိုယ့်လူမျိုးတွေပဲ စစ်ထပ်ပြေးနေရတယ်။ မွေးဖွားစ မိခင်တွေလည်း ပါတယ်။ အချင်းချင်း ငြင်းခုံနေရမယ့်အချိန်မဟုတ်တော့ဘူး” ဟု ကျေးသီး ဒေသခံက ဆိုသည်။
စစ်ရှောင်လာသည့် သူများတွင် ကိုယ်ဝန်ဆောင်အမျိုးသမီးများ၊ မွေးဖွားစ မိခင်များ၊ ကလေးငယ်များနှင့် သက်ကြီးရွယ်အိုများအပြင် တိုက်ပွဲကြောင့် ရုတ်တရက်ထွက်ပြေးလာရသည့်အတွက် အဝတ်အစား မပါ လာသည့် သူများရှိကြောင်း သိရသည်။
သျှမ်းလက်နက်ကိုင် တပ်ဖွဲ့ (၂)တပ် ကို သျှမ်းသံဃာများ၊ သျှမ်းပြည်သူများ က တိုက်ပွဲများ ရပ်တန့်ရန် အကြိမ်ကြိမ် တောင်းဆိုခဲ့သော်လည်း ထူးခြားလာခြင်းမရှိဘဲ တိုက်ပွဲ ဆက်လက်ဖြစ်ပွားနေသည့်အပေါ် စိတ်မကောင်းနေကြကြောင်း သိရသည်။
Leave a Comments