ကျေးသီးမြို့နယ် RCSS နှင့် SSPP တိုက်ပွဲဖြစ်၊ ဒေသခံ (၂၀၀) ထွက်ပြေးနေရ

0

သျှမ်းပြည် တောင်ပိုင်း ကျေးသီမြို့နယ်အတွင်း သျှမ်းတပ် (၂)တပ် တိုက်ပွဲဖြစ်ပွားမှုကြောင့် စစ်ဘေးရှောင် (၂၀၀) နီးပါး ကျေးသီးမြို့နယ် နောင်ဆွမ်းကျေးရွာ ဘုန်းကြီးကျောင်းသို့ထွက်ပြေးတိမ်းရှောင်နေရကြောင်း စုံစမ်းသိရသည်။

ယမန်နေ့(ဇွန် ၁)ရက် မနက်ပိုင်းတွင် သျှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် သျှမ်းပြည် တိုးတက်ရေးပါတီ (SSPP/SSA) တို့သည် ကျေးသီးမြို့ နှင့် ( ၁၅ ) မိုင်အကွာရှိ ဟိုပုံကျေးရွာအုပ်စု တဝှိက်တွင် တိုက်ပွဲဖြစ်ပွားမှုကြောင့် ဒေသခံများထိတ်လန့်ကာ ထွက်ပြေးတိမ်းရှောင်လာရကြောင်း သတင်းရရှိသည်။

ထိုစစ်ဘေးရှောင် (၂၀၀)နီးပါးသည် ကျေးသီးမြို့နယ် ဟိုပုံကျေးရွာအုပ်စု မတ်ဝေါင်းရွာ၊ နောင်ဆွမ်းကျေးရွာအုပ်စု နားဟျိုးကျေးရွာနှင့် ဝမ်လတ်ကျေးရွာမှ ဒေသခံများဖြစ်ကြောင်း သိရသည်။

“ မနေ့က မနက် (၇)နာရီလောက် သေနတ်သံစကြားရတယ်။ ထိတ်လန့်လို့ ထွက်ပြေးလာရတယ်။ တချို့ အဝတ်အစားတောင်မရဘူး။ ဒီမှာက အမျိုးသမီးနဲ့ ကလေး အများစုဖြစ်တယ်။” ဟု စစ်ရှောင်လာသည့် အမျိုးသား တစ်ဦး က ပြောသည်။

စစ်ရှောင်လာသည့် သူများတွင် ကိုယ်ဝန်ဆောင်အမျိုးသမီးများ၊ မွေးဖွားစ မိခင်များ၊ ကလေးငယ်များနှင့် သက်ကြီးရွယ်အိုများကြောင်း လည်း စစ်ရှောင်များက ပြောသည်။

တိုက်ပွဲကြောင့် ရုတ်တရက်ထွက်ပြေးလာရသည့်အတွက် အဝတ်အစား မပါလာသည့် သူများရှိကြောင်း၊ ထိုကျေးရွာထဲတွင် အမျိုးသားများက စ ပေါ်တာဆွဲခံရမည်ကို စိုးရိမ်သဖြင့် ထွက်ပြေးလာကြကြောင်းလည်း သိရသည်။

“တချို့ဒီဘုန်းကြီး ကျောင်းကို ရောက်လာတာ အဝတ်အစားအပိုတွေ အသုံးအဆောင်တွေ မပါခဲ့သူတွေရှိတယ်၊ ကျနော်တို့ ထွက်ပြေးလာတဲ့ အထဲမှာ တစ်ရက်ပဲ ရှိသေးတဲ့ မွေးကင်းစ ကလေးမိခင် နှစ်ယောက်ပါတယ်၊ အခုဆို ရွာထဲ မှာ အမျိုးသားတွေလည်း မနေရဲကြတော့ဘူး၊ ဘော်ဒါဆွဲခံရမှာစိုးလို့ ထွက်ပြေးကြကုန်ပြီ” လို့ စစ်ရှောင်လာသည့် အမျိုးသားတစ်ဦး က သျှမ်းသံတော်ဆင့်ကို ပြောသည်။

လက်ရှိအခြေအနေအရ စစ်ရှောင် (၂၀၀)နီးပါး အတွက် စားဝတ်နေရေး အခက်အခဲမရှိသေးကြောင်း၊ ထိုစစ်ရှောင်များကို ဘုန်းကြီးကျောင်း အနီးရှိ ပြည်သူများက လာရောက်ကူညီပေးနေကြောင်း၊ တိုက်ပွဲ ရက်ရှည်ကြာမည်ဆိုပါက အခက်အခဲများစွာ ရင်ဆိုင်ရမည် ဟု လည်းစစ်ဘေးရှောင်များကို ကူညီပေးနေသည့် သူများက ပြောသည်။

သျှမ်း တပ်(၂)တပ် တိုက်ပွဲ ရပ်တန့်ရန် အတွက် သျှမ်းပြည်သူများ၊ သျှမ်းသံဃာများက မကြာခဏ တောင်းဆို ခဲ့သော်လည်း လက်ရှိအချိန်အထိ တိုက်ပွဲရပ်တန့်ခြင်းမရှိဘဲ ဆက်လက် တိုက်ခိုက်နေသေးသဖြင့် ပြည်သူများက စိတ်မကောင်းဖြစ်နေကြောင်သိရသည်။

“ ကျနော်တို့ အကြိမ်ကြိမ် ပြောဆိုခဲ့တယ်။တောင်းဆိုခဲ့တယ်။ ဒါပေမယ့် သျှမ်းတပ် (၂)တပ်က ကျနော်တို့ပြည်သူတွေ စကားကို နားမထောင်ဘူး။ အခုကျနော်တို့ ပြည်သူတွေက အာဏာရှင်ကို တိုက်နေချိန် ညီနောင် တပ် (၂)တပ်ကို အားကိုးရမယ့်ချိန်မှာ သူတို့ အချင်းချင်းတိုက်နေတော့ ကျနော်တို့ ဘယ်သူ့ကို အားကိုးရမှာလဲ” ဟု သျှမ်းပြည်သူတစ်ဦးက ပြောသည်။

သျှမ်းတပ်(၂)တပ်သည် ယနေ့(ဇွန် ၂)ရက် အထိ အချင်းချင်း ပစ်ခတ်သံကြားနေသေးကြောင်း သိရသည်။

Leave a Comments