သျှမ်းပြည်နယ်မြောက်ပိုင်း သီပေါမြို့နယ် အတွင်း သျှမ်းတပ် ၂ တပ် ပစ်ခတ်မှုကြောင့် စစ်ဘေးရှောင် ၃၀၀ ကျော် ထွက်ပြေးနေရပြီး ထိုသူထဲတွင် ကိုယ်ဝန်ဆောင်မိခင်နှင့် ကလေး အများဆုံးဖြစ်ကြောင် သတင်းရရှိသည်။
ထိုစစ်ဘေးရှောင်ပြည်သူများသည် အောင်မင်္ဂလာ ဘုန်းကြီးကျောင်းတွင် (၁၀၇) ဦးရှိပြီး၊ စဉ့်အင်ဘုန်းကြီးကျောင်းတွင် (၂၀၈) ဦး ရှိကြောင်း သိရသည်။
” ဆွန်လုံးကျေးရွာ အုပ်စုထဲ (၃၀၀) ကျော်ရှိတယ်။ ကျေးရွာက ၅ ရွာလောက်ပြေးလာခဲ့ကြတယ်။ မတ်လ ၁၈ နေ့ကတည်းက ရှောင်းပြေးလာကြတယ်။” စစ်ရှောင်ကူညီပေးသူများက ပြောသည်။
အဆိုပါ စစ်ဘေးရှောင်လာသည့်သူများသည် ကလေး၊ ကိုယ်ဝန်ဆောင်မိခင်များ၊ ကျန်းမားရေး မကောင်းသူများ၊ လေဖြတ်နေသူ များပါဝင်ကြောင်း ကူညီနေသည့်သူက ဆိုသည်။
လက်ရှိအချိန်ထိ သီပေါမြို့နယ် အတွင်း တွင် သျှမ်းပြည်တပ်မတော် (၂)တပ်ဖြစ်သည့် SSPP/SSA နှင့် RCSS/SSAတို့ စစ်ရေး တင်းမာနေဆဲဖြစ်သဖြင့် စစ်ရှောင်များ နေရပ်ပြန်ရန် ခက်ခဲနေကြောင်း၊ စစ်ရှောင်များအတွက် စားဝတ်နေရး လိုအပ်နေကြောင်းလည်း ကူညီသူများက ပြောကြသည်။
” သူတို့တွေပြန်ရင်လဲ စစ်ရေးတင်မာနေမှာကိူ စိတ်ပူစိုးရိမ်နေကြတယ်။ တိုက်ပွဲထက်ဖြစ်မှာကြောက်လို့ ဘယ်သူမှ မပြန်ရဲသေးဘူး။ ဒီနေ့တော ပစ်ခတ်တာ မကြားရသေးဘူး။ ” စစ်ရှောင်များကို ကူညီနေသည့်သူတဦး ကထပ်လောင်းပြောသည်။
ယမန်နေ့ တွင်လည်း SSPP/SSAနှင့် RCSS/SSAတို့ သည် သီပေါမြို့နယ် နားမခေါ်ကျေးရွာ အနီးတွင် တိုက်ပွဲဖြစ်သဖြင့် အရပ်သားနေအိမ် ၂လုံးပေါ် လက်နက်ကြီး ကျကာ နေအိမ်ပျက်စီးခဲ့ပြီး၊ နားမခေါ်ဒေသခံများ သီပေါမြို့ ပေါ် ဆွေမျိုးအိမ်သို့ထွက်ပြေးတိမ်းရှောင်နရကြောင်း သိရသည်။
ထို့ပြင် မတ် (၂၃)ရက်တွင်လည်း သျှမ်းတပ် (၂)တပ်ကြောင့် ကျောက်မဲမြို့နယ် ညောင်မောင်းကျေးရွာ လက်နက်ကြီးကျကာ အမျိုးသား တဦး ပွဲချင်းပြီး သေဆုံးကာ၊ အမျိုးသမီး ၂ဦး ကျည်ထိမှန်ဒဏ်ရာရရှိခဲ့သည်။
