သျှမ်းပြည်တောင်ပိုင်း ကွန်ဟိန်းမြို့နယ်တွင် စစ်အာဏာသိမ်း ဆန့်ကျင်လှုပ်ရှားရာတွင် ပါဝင်ခဲ့သည့် ပြည်သူ (၃) ဦးသည် ယနေ့ (ဖေဖော်ဝါရီ ၁၆)ရက်ထိ မလွှတ်မြောက်သေးကြောင်း စုံစမ်းသိရသည်။
ကွန်ဟိန်းမြို့ နှင့် ကာလိမြို့တို့တွင် ဖေဖော်ဝါရီ ၁၁ ရက်နေ့က အာဏာရှင်ဆန့်ကျင်ရေး လှုပ်ရှားသူ ၃ ဦးကို ဖမ်းဆီးသွားပြီး၊ ၆ရက်တိုင်ကြာခဲ့သော်လည်း ပြန်လွှတ်ပေးချင်းမရှိသေးကြောင်းသိရသည်။
ဖမ်းဆီးခံရသူ (၃)ဦးဖြစ်သည့် ကွန်ဟိန်းမြို့နယ် စိုင်းလိန်ခမ်း၊ ကာလိမြို့မှ ဦးမိုးဇော် နှင့် စိုင်းချစ်ငွေ(ခ) စိုင်းဟန်မိန်းတို့ဖြစ်သည်။
ထိုသူ (၃)ဦးကို တောင်ကြီးမြို့နယ်ရှိ တောင်းလေးလုံးထောင်တွင် ပို့ဆောင်ထားကြောင်း မိသားစုဝင်များ ပြောပြချက် အရသိရသည်။
“ ဟိုညလာဖမ်းသွားတုန်းကတော့ သူတို့လုံခြုံရေးအတွက်ဆိုပြီး လာထိန်းသိမ်းသွားတယ်။ ခုကတောင်းလေးလုံးထောင်ကို ရောက်သွားပြီး။ ကျမတို့ အရမ်းစိတ်ပူနေရတယ်။ ခုထိပြန်မလွှတ်လာပေးသေးဘူး” ဟု စိုင်းလင်းခမ်း၏ မိန်းမဖြစ်သူကပြောသည်။
လက်ရှိမှာ ဖမ်းဆီးခံရသူ ၃ဦးကို မည်သည့် အမှုဖြင့် ဖွင့်ထားသည်ကို မသိရှိရသေးကြောင်းလည်း မိသားစုဝင်များက ပြောပြသည်။
စစ်အာဏာရှင်ကို ဆန့်ကျင်သည့် လှုပ်ရှားမှုကြောင့် ကွန်ဟိန်းမြို့နယ် ဒေသခံ (၃)ဦးဖမ်းဆီးခံရပြီးနောက်၊ ကွန်ဟိန်းမြို့နယ်အတွင်း ဆန္ဒထုတ်ဖော်မှုကို ရပ်ဆိုင်းလိုက်ရကြောင်း သိရသည်။
“ သူတို့ဖမ်းဆီးသွားပြီးနောက်ပိုင်းမှာတော့ ကျနော်တို့ဖက်ကလည်း ဆန္ဒထုတ်ဖော်တာမရှိတော့ပါဘူး” ဟု ကွန်ဟိန်းဒေသခံတစ်ဦးက ပြောသည်။
လက်ရှိဖမ်းဆီးခံရသူများကိုလည်း ပြန်လွှတ်ပေးမည်ဟု သတင်းထွက်ပေါ်နေသော်လည်း ဒေသခံများမှာ သေချာမသိရှိရသေးပေ။
Leave a Comments