သျှမ်းပြည်အရှေ့ပိုင်းတွင် ၂ ပတ်အတွင်း ကိုဗစ် ၁၉ ပိုးတွေ့လူနာ စုစုပေါင်း ၁၀၄ ဦးရှိလာကြောင်း စုံစမ်းသိရှိရသည်။
ထိုအနက်တာချီလိတ်မြို့တွင် ကိုဗစ် ၁၉ ပိုးတွေ့လူနာအများဆုံးရှိ နေသဖြင့်လမ်းပန်းဆက်သွယ်ရေးနှင့်အသွားအလာကန့်သတ်မှုလည်းအများဆုံးရှိနေသည်ဟုသိရသည်။
“သျှမ်းအရှေ့မှာ တာချီလိတ်က ၇၅ယောက်၊ မိုင်းတုံ ၇ယောက်၊ မိုင်းယောင်း ၇ယောက်၊ မိုင်းပျဉ်း ၃ ယောက်၊ မိုင်းယန်း ၃ယောက်၊ မိုင်းဆတ် ၂ယောက် ရှိတယ်။ ဆေးရုံဆင်းသွားတာက ၁၈ ယောက်ရှိပါပြီ” ဟု သျှမ်းပြည်အရှေ့ပိုင်း လက်ထောက်ညွှန်ကြားရေးမှူး ဒေါက်တာ ဘစိုးသက် ကပြောသည်။
သျှမ်းရှေ့ပိုင်းတွင် ကိုဗစ် ၁၉ ကူးစက်မှုမြှင့်တက်လာသည့် အပေါ် ပြည်သူများအနေဖြင့် အိမ်တွင်သာ နေပေးကြရန်၊ ၂ ပတ်ကြာပြည်သူများ သွားလာမှုကို လျော့ချထားပါက ကိုဗစ် ၁၉ ကူးစက်မှုလည်း လျော့ကျသွားနိုင်ကြောင်း ဒေါက်တာဘစိုးသက်က ဆိုသည်။
၂ ပတ်အတွင်း သျှမ်းရှေ့တွင် ကိုဗစ် ၁၉ မြင့်တက်လာသည့် အပေါ် ဆရာဝန်များအနေဖြင့် ပိုးတွေ့အတည်ပြုလူနာများနှင့် ထိတွေ့သူများကို ထပ်မံလိုက်လံစုံစမ်းရာတွင် အခက်ခဲများရှိနေကြောင်းသိရသည်။
“ ကွန်တက်တွေကို လိုက်တာတော့အခက်ခဲရှိတာပေါ့။ စဖြစ်တာက KTVဆိုတော့ ဘယ်သူ၊ဘယ်နယောက်၊ ဟိုတယ်တို့ အနှိပ်ခန်းတို့သွားခဲ့လား၊ မသွားခဲ့လား ဆိုတာလိုက်ဖော်ထုတ်ဖို့ အရမ်းခက်ခဲတယ်” ဟု ဒေါက်တာဘစိုးသက်က ပြောသည်။
တာချီလိတ်မြို့တွင် ကိုဗစ် ၁၉ ပိုးတွေ့လူနာများလာသည့်အပေါ် ပြည်သူတစ်ချို့ စိုးရိမ်မှုများ ရှိနေကြောင်းသိရသည်။
“ ကျနော်တို့ တာချီလိတ်မြို့မှာတော့ ၂၈ ရက်က ကိုဗစ် ၁၉ ပိုးတွေ့လူနာရှိလာပြီးစသိတာနဲ့ ပြည်သူတွေကတော့ ကြောက်ကြပါတယ်။ အလုပ်တွေလဲ အများကြီးပိတ်လိုက်တာရှိတယ်။ ဒီတစ်ခါတော့ လူတွေက တော်တော်ကြောက်လာတယ်” ဟု တာချီလိတ်တွင် အလုပ်လုပ်နေသည့် စိုင်းညွှန့်ကပြောသည်။
မြန်မာနိုင်ငံတ၀ှမ်း ဒီဇင်ဘာ ၆ ရက်နေ့ ညနေ ၈ နာရီထိ ကိုဗစ် ၁၉ အတည်ပြုလူနာ (၉၉၁၅၅) ဦးရှိပြီး ဆေးရုံဆင်းခွင့်ရသူ (၇၇၆၃၆) ဦးနှင့် သေဆုံးသူ (၂၁၁၀) ဦးရှိကြောင်း ကျန်းမားရေးနှင့် အားကစား ဝန်ကြီးဌာန ထုတ်ပြန်ချက်အရသိရသည်။
