ကနေ့မြန်မာနိုင်ငံတွင် ကိုဗစ်-၁၉ ဓါတ်ခွဲအတည်ပြုလူနာ နေ့စဉ်ရာနှင့်ချီတိုးလာနေသည်ဖြစ်ရာ လူထု ကိုဗစ်-၁၉ ရောဂါ ကင်းဝေးစေရေးအတွက်ရည်ရွယ်ပြီး ရှမ်းပြည်ပြန်လည်ထူထောင်ရေးကောင်စီ ရှမ်းပြည်တပ်မတော်က ၄င်းထိန်းချုပ်လှုပ်ရှားရာနယ်မြေများအတွင်း ဂိတ်ပြန်ထောင်ကာ အ၀င်အထွက်သွားလာနေသူများအား စစ်ဆေးမှုပြုနေကြောင်းသိရသည်။
စက်တင်ဘာလဆန်းကတည်းကစပြီး RCSS/SSA ထိန်းချုပ်လှုပ်ရှားသည့် သျှမ်းပြည်တောင်ပိုင်း ၊မြောက်ပိုင်း၊အရှေ့ပိုင်းအတွင်း မြို့နယ်များတွင် ကိုဗစ် ၁၉ကာကွယ်ရေးအတွက်ဒေသခံလူထုအား ကျန်းမာရေးစစ်ဆေးပေးမှုစခန်းများ ပြန်လည်ထားရှိလာခြင်းဖြစ်ကြောင်း RCSS/SSA ပြောခွင့်ရ ဒု-ဗိုလ်မှူးကြီး အုမ်ခေး က သျှမ်းသံတော်ဆင့်အားပြောသည်။
“ဒုတိယလှိုင်းကြောင့်ရောဂါကူးစက်မှု မရှိအောင် မြို့အ၀င်အထွက်တွေမှာကျနော်တို့သွားပြီး ဂိတ်ထောင်စောင့်စစ်ပေးတယ်။ အရင်ကိုဗစ်စစကူးတုန်းက လုပ်သလိုပေါ့။ ရောဂါကြောင့် အခက်အခဲတော့ ရှိကြမှာဘဲနော့။ ဒါမယ့် ကျနော်တို့ ထိခိုက်နစ်နာအောင်တော့မလုပ်ဘူး။ မြို့တိုင်းကိုဗစ်ကင်းစင်ဖို့အတွက်ပါ။ ”
RCSS/SSA ထိန်းချုပ်နယ်မြေအတွင်းရှိ မြို့နယ်တချို့တွင် စတင်စစ်ဆေးနေပြီး မြို့နယ်တချို့တွင်မူ စတင်စစ်ဆေးရန်ပြင်ဆင်နေသေးသည့်အဆင့်ဖြစ်ကြောင်း ၊ ပြည်တွင်း ရောဂါကူးစက်မှုမဖြစ်အောင်ကြိုတင်ကာကွယ်တားဆီးခြင်းဖြစ်ကြောင်း ၄င်းကဆိုပါသည်။
ထိုသို့ RCSS/SSA မှ စစ်ဆေးမှုသည် သွားလာနေသော ဒေသခံလူထုအတွက် နှောင့်နှေးကြန့်ကြာစေသဖြင့် လျှော့ပေါ့ပေးရန် တအာင်းအမျိုးသားပါတီ TNP က တောင်းဆိုလိုက်သည်။
TNP ပါတီဉက္ကဌမိုင်းနုမ်ဟန် က- “ကျနော်တို့မိုင်းကိုင်မြို့ ရဲ့တောင်ပေါ်ဒေသဘက်မှာနေထိုင်တဲ့ဒေသခံလူထု သွားရေးလာရေးအတွက်အခက်အခဲဖြစ်စေတယ်။ မြို့စျေးဆင်းပြီး လှူဖို့ဒါန်းဖို့ စားသောက်ဖို့အတွက်၀ယ်စရာခြမ်းဖို့တောင်မှ ခွင့်မပြုတော့ အခက်အခဲဖြစ်တာပေါ့။ တချို့လည်း ဆွေမျိုးမိဘ ဆုံးတာတောင် မသွားနိုင်ဘူး။ အရင်ကလည်းဒါမျိုးလုပ်ခဲ့ဖူးတယ်။ ဒါပေမယ့် ဒီလောက်အထိ မကြပ်ဘူး။ ခုလည်း ရွေးကောက်ပွဲအတွက်စည်းရုံးရေးဆင်းချိန်ဖြစ်နေတော့ စစ်ဆေးတင်းကြပ်မှုနဲနဲလျှော့ပေါ့ပေးဖို့တောင်းဆိုချင်ပါတယ်”- ဟု ပြောဆိုသည်။
လက်ရှိ မိုင်းကိုင်မြို့တွင်း သျှမ်းပြည်တပ်မတော်က ကျန်းမာရေးစစ်ဆေးပေးနေသည့် ရွာများမှာ နောင်ဆာမ်ပူးအုပ်စု၊ ပါခေါင်အုပ်စု ၊ ခေးအုံအွေအုပ်စု၊ တုံလောအုပ်စုတို့တွင်ဖြစ်ပြီး၊ ပြင်ပမှလာသည့်သူများ ရွာတွင်း၀င်မည်ဆိုပါက ကွာရန်တင်း၀င်ရန် ၊ ရွာသားများ ရွာပြင်ထွက်မည်ဆိုပါက မျက်နှာဖုံးတပ်ဆင်ရန် စသဖြင့်စစ်ဆေးနေခြင်းဖြစ်သည်ဟုသိရသည်။
မိုင်းကိုင်မြို့သားစိုင်းထွန်းက – “မိုင်းကိုင်မြို့က အုပ်စုတိုင်းနီးပါးမှာပါဘဲ RCSS ကနေလူထုကိုကျန်းမာရေးစစ်ဆေးပေးနေတာက။ ရွာသားတွေတခြားမှာ သွားပြီးညအိပ်ညနေ လုပ်မယ်ဆိုရင် ရွာအကြီးအကဲတွေဆီကနေထောက်ခံစာယူသွားရမယ်။ ဆေးရုံဆေးခန်းသွားမယ်ဆိုရင် ရပ်ရွာသူကြီးကိုအကြောင်းကြားရမယ် စတာတွေ ပညာပေးပြောဆိုတာပါ။ စျေးဆင်းရင်တော့ရပါတယ်။ တခြားမြို့သွားမယ်ဆိုမှသာ တင်းကြပ်တာပါ”- ဟု သျှမ်းသံတော်ဆင့်အားပြောသည်။
ကိုရိုနာဗိုင်းရပ်စ်စတင်ကူးစက်ပျံ့ပွားစဉ် ယခုနှစ် မေလကလည်း RCSS/SSA က ၄င်းထိန်းချုပ်ရာနေရာဒေသအတွင်း ထိုသို့သော ကျန်းမာရေးစစ်ဆေးမှုပြုပေးခဲ့ဖူးကြောင်း၊ ထိုစဉ်က ရဲ၊ အစိုးရတပ်မတော်မှ ၀င်ရောက်တားဆီးမှုပြုခဲ့ဖူးကြောင်း၊ ယခုလည်း မြို့နယ်တိုင်းတွင် ထပ်မံစစ်ဆေးရန်ဆောင်ရွက်နေကြောင်း၊ ဒု-ဗိုလ်မှူးကြီးအုမ်ခေးက ပြောသည်။
ယခု ပြန်လည်ကူးစက်ပျံ့ပွါးလာသော ကိုဗစ်ဒုတိယလှိုင်းတွင် သျှမ်းပြည်အတွင်း ထပ်မံကူးစက်ခံရသူ ၉ ဉီးရှိနေပြီး တောင်ကြီးစ၀်စံထွန်းဆေးရုံတွင် ၂ ဉီး ၊ ကလောတပ်မတော်ဆေးရုံတွင် ၂ ဉီး၊နမ်စန်စစ်ဆေးရုံတွင် ၁ ဉီး၊ ကျိုင်းတုံတွင် ၄ ဉီး ဆေးကုသမှုခံယူနေပါသည်။
စက်တင်ဘာလ ၁၆ ရက်နေ့အထိ မြန်မာနိုင်ငံတ၀ှမ်း ကိုဗစ်-၁၉ ကူးစက်ခံရသူ စုစုပေါင်း ၃၈၉၄ ဉီးရှိပြီး သေဆုံးသူ ၄၆ ဉီးရှိပြီဖြစ်ကြောင်း သိရသည်။
