သျှမ်း/အရှေ့ မင်္ဂလာစည်တော်ပါတီ ရွေးကောက်ပွဲမ၀င်

သျှမ်းပြည်အရှေ့ပိုင်းက သျှမ်းပါတီ  တခုဖြစ်သော သျှမ်းပြည်အရှေ့ပိုင်း ဒီမိုကရက်တစ်ဖွံ့ဖြိုးတိုးတက်ရေးပါတီ ESSDDP (မင်္ဂလာစည်တော်ပါတီ )သည် ယခုနှစ်ရွေးကောက်ပွဲတွင် ၀င်ရောက်ယှဉ်ပြိုင်မည်မဟုတ်ကြောင်း သိရသည်။

ပြီးခဲ့သည့် ၂၀၁၅ ရွေးကောက်ပွဲက ကျိုင်းတုံ မြို့တွင် သျှမ်းပါတီကြီး ၃ ခုဖြစ်သော မင်္ဂလာစည်တော်ပါတီ ESSDDP ကျားဖြူပါတီ SNDP  ကျားခေါင်းပါတီ SNLD တို့ ယှဉ်ပြိုင်ခဲ့ကြသော်လည်း ၄င်းတို့ ၃ ပါတီမှ ရသည့်မဲအရေအတွက်သည် ကြံ့ခိုင်ရေးပါတီ၏ မဲအရေအတွက်လောက်မရရှိခဲ့ဘဲ လွှတ်တော် ကိုယ်စားလှယ် ၄ နေရာစလုံး ကြံ့ခိုင်ရေးပါတီနှင့် အမျိုးသားဒီမိုကရေစီအဖွဲ့ချုပ် တို့မှ အနိုင်ရခဲ့သည်။

အလားတူ တာချီလိတ်မြို့နှင့်မိုင်းဆတ်မြို့တို့တွင်လည်း သျှမ်းပါတီ တနေရာမျှမရရှိခဲ့ပေ။

ယခုရွေးကောက်ပွဲတွင်မူ ESSDDP မှ ၀င်ရောက်ယှဉ်ပြိုင်တော့မည်မဟုတ်ဟု ကြေငြာခဲ့သဖြင့် ကျိုင်းတုံတွင် သျှမ်းပါတီအနိုင်မရမည်ကို ဒေသခံလူငယ်များက စိုးရိမ်ကြောင့်ကြနေကြသည်။

ESSDDP ဉက္ကဌ လုံးစိုင်းဟောင်ခမ်းက – “ဒီနှစ် ၂၀၂၀ ရွေးကောက်ပွဲ ကျနော်တို့ ESSDDP က ၀င်မပြိုင်တော့ဘူးခင်ဗျ။ မေလကတည်းက ပါတီရုပ်သိမ်းလိုက်ပါပြီ။ ကျနော်တို့မှာ လူအင်အားအခက်အခဲရှိတယ်။ ရံပုံငွေအင်အားလည်း မရှိဘူး။ ကျနော်ကိုယ်တိုင်ကလည်း သိပ်နေမကောင်းချင်ဘူး။ ကြိုတင်ပြင်ဆင်မှုလည်း မရှိထားတော့လေ ”- ဟု သျှမ်းသံတော်ဆင့်အားပြောသည်။

ကျိုင်းတုံမြို့တွင် ယခုရွေးကောက်ပွဲအတွက် ကြံ့ခိုင်ရေးပါတီသည် ငွေအင်အားတောင့်တင်းကာ ကြိုတင်ပြင်ဆင်မှုအားကောင်းနေကြောင်း ဒေသခံလူငယ်များကပြောဆိုသည်။

ကျိုင်းတုံမြို့နယ် TYO သျှမ်းလူငယ်အဖွဲ့၀င် စိုင်းနွမ်ကောန်းက – “ဒီ ၂၀၂၀ ရွေးကောက်ပွဲမှာ ကျနော်တို့ သျှမ်းလူထုတွေကနေ သျှမ်းပါတီကို တစုတစည်းတည်း မဲပေးမယ်ဆိုရင်တော့ သျှမ်းပါတီအနိုင်ရမှာပါ။ ပြီးခဲ့တဲ့ရွေးကောက်ပွဲတုန်းက ကျနော်တို့သျှမ်းဒေသခံက သျှမ်းပါတီကိုမဲမပေးလို့ သျှမ်းပါတီအနိုင် မရတာပါ။ တကယ်တော့ ကျိုင်းတုံမှာက သျှမ်းလူဉီးရေကအများဆုံးပါ ”- ဟုသျှမ်းသံတော်ဆင့် အားပြောသည်။

ကျိုင်းတုံမြို့တွင်   သျှမ်းပါတီ ၂  သည် အင်အားကြီး  ပြည်ထောင်စုကြံ့ခိုင်ရေးပါတီ နှင့် အမျိုးသားဒီမိုကရေစီအဖွဲ့ချုပ်တို့ကို ယှဉ်ပြိုင်ရမည်ဖြစ်သည်။ ထို့အပြင် တခြားတိုင်းရင်းသားပါတီများလည်း  ယှဉ်ပြိုင်မည်ဟုသိရသည်။   

သျှမ်းပြည်အရှေ့ပိုင်းကျိုင်းတုံ  ၊ တာချီလိတ် နှင့် မိုင်းဆတ်ခရိုင် အတွင်း  ၉ မြို့နယ်ရှိပြီး၂၀၁၀ ရွေးကောက်ပွဲကသျှမ်းပါတီမှ နေရာတချို့အနိုင်ရရှိခဲ့သော်လည်း  ၂၀၁၅ ရွေးကောက်ပွဲတွင်မူ သျှမ်းပါတီ တနေရာမျှ အနိုင်မရရှိခဲ့ပေ။

ကျိုင်းတုံမြို့က ရပ်မိရပ်ဖနှင့် အမျိုးသားရေး တက်ကြွလှုပ်ရှားသူတို့စုပေါင်းကာ သျှမ်းပြည်အရှေ့ပိုင်း ဒီမိုကရက်တစ်ဖွံ့ဖြိုးတိုးတက်ရေးပါတီ ESSDDP (မင်္ဂလာစည်တော်ပါတီ )ကို ၂၀၁၅ ခုနှစ်က တည်ထောင်ကာ ရွေးကောက်ပွဲ၀င်ရောက်ယှဉ်ပြိုင်ခဲ့သည်။ သို့သော် တနေရာမျှအနိုင်မရရှိခဲ့ကြပေ။

Leave a Comments