သျှမ်းပြည်အရှေ့ပိုင်း မိုင်းပျဉ်းမြို့နယ်တွင် ရွေးကောက်ပွဲ အပိုင်း (၂) အတွက် ကြိုတင်မဲကောက်ယူရာတွင် လွှတ်တော်ကိုယ်စားလှယ်များ လိုက်ပါခွင့်ပြုမည်ဟု ရွေးကော်ပွဲကော်မရှင်က ပြောသော်လည်း မြေပြင်တွင် ကြံ့ခိုင်ရေး ဖွံ့ဖြိုးရေး (USDP)ပါတီမှလွဲ၍ အခြားပါတီများကိုအကြောင်းကြားခြင်းမရှိခဲ့ ကြောင်း စုံစမ်းသိရသည်။

လာမည့် ဇန်နဝါရီလ ၁၁ ရက်တွင် သျှမ်းပြည်အရှေ့ပိုင်း မိုင်းခတ်၊ မိုင်းပျဉ်း၊ မိုင်းဖြတ်၊ မိုင်းတုံ၊ မိုင်းယောင်း၊ မိုင်းယန်း အပါအဝင် သျှမ်းပြည်မှ မြို့နယ် ၁၇ မြို့နယ်တွင် ရွေးကောက်ပွဲ အပိုင်း (၂) ကျင်းပမည် ဖြစ်သည်။

ဇန်နဝါရီလ ၆ ရက်မှစ၍ မိုင်းပျဉ်းမြို့နယ်အတွင်းရှိ ရပ်ကွက်/ ကျေးရွာတွင် ကြိုတင်မဲသွားရောက် ကောက်ခံရာတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး (USDP) ပါတီမှလွှဲ၍ အခြားပါတီများမှ လွှတ်တော်ကိုယ်စားလှယ်လောင်းများကို ရွေးကောက်ကော်မရှင်က အကြောင်းကြားခြင်းမရှိခဲ့ကြောင်း မိုင်းပျဉ်းမြို့ ရပ်/ကျေးအဖွဲ့ဝင်တစ်ဉီးက သျှမ်းသံတော်ဆင့်ကို ပြောသည်။

“ဘယ်နှစ်ပါတီပဲရှိရှိ ရှိတဲ့ပါတီတိုင်းကို အကြောင်းကြားရမယ်လို့ ပြောထားတာ။ ဒါပေမယ့် သူတို့ဘက်က ဘယ်သူ့ကိုမှ မခေါ်ချင်ဘူး။ ကျနော်တို့ပါတီက လူအင်အားနည်းတော့၊ ကြိုတင်မဲကောက်ရင် ကျနော်တို့ကို အကြောင်းကြားဖို့ အကြိမ်ကြိမ်မှာနေရတယ်။ စသလိုနောက်သလိုနဲ့ အမြဲပြောနေရတယ်။ အကယ်လို့ အခြားပါတီကို အကြောင်းမကြားရင် အပေါ်ကိုတင်မယ်လို့ ပြောထားတာ” ဟု ၎င်းက ပြောသည်။

မိုင်းပျဉ်းမြို့နယ်အတွင်းရှိ ရပ်ကွက်/ ကျေးရွာတွင် မဲရုံပေါင်း ၈၀ ကျော်ရှိပြီး ဝင်ရောက်ယှဉ်ပြိုင်မည့် ပါတီများမှာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေး (USDP)ပါတီနှင့် ရှမ်းနှင့်တိုင်းရင်းသားများ ဒီမိုကရက်တစ် (SNDP) ကျားဖြူပါတီ နှစ်ခုသာရှိကြောင်း သိရသည်။

ကြိုတင်မဲကောက်ယူရာတွင် ကျားဖြူပါတီပါတီကို အကြောင်းကြားခြင်း မရှိသောကြောင့် ပြီးခဲ့သည့် ရက်ပိုင်း၌ ပြည်ထောင်စုရွေးကောက်ပွဲကော်မရှင် UEC အဖွဲ့ဝင် ဦးခင်မောင်ဦးကို အကြောင်းထားရကြောင်း ကျားဖြူပါတီ ဥက္ကဋ္ဌ စိုင်းအိုက်ပေါင်းက ဇန်နဝါရီလ ၈ ရက်နေ့က သျှမ်းသံတော်ဆင့်ကို ပြောသည်။

“မိုင်းပျဉ်းမှာ ကြိုတင်မဲလုပ်တဲ့ဟာ ကျနော်တို့လူကို မခေါ်ဘူး။ မခေါ်တော့ ကျနော်တို့ ဦးခင်မောင်ဦးကို လှမ်းပြီးတော့ ပြောလိုက်တယ်လေ။ ဦးခင်မောင်ဦးက နေပြည်တော်က တစ်ခါတည်း သျှမ်းပြည်နယ် ရွေးကောက်ပွဲ ကော်မရှင်ဥက္ကဋ္ဌဆီ လှမ်းပြီးတော့ ပြောလိုက်တော့ ကြိုတင်မဲ လုပ်တော့မယ်ဆိုရင် အခုနောက်ပိုင်း ကျနော်တို့ လွှတ်တော်ကိုယ်စားလှယ်လောင်းတွေ ခေါ်တယ်” ဟု စိုင်းအိုက်ပေါင်းက ပြောသည်။

ထိုသို့ အကြောင်းကြားပြီးနောက် ပြည်ထောင်စုရွေးကောက်ပွဲကော်မရှင်အဖွဲ့ဝင် ဦးမျိုးမောင် (ရှမ်းရှေ့တာဝန်ခံ)သည် ယမန်နေ့ ဇန်နဝါရီလ ၉ ရက်နေ့က တာဝန်ရှိသူများနှင့်အတူ ရွေးကောက်ပွဲ အပိုင်း (၂) အောင်မြင်စွာ ကျင်းပနိုင်ရေးအတွက် မိုင်းပျဉ်းမြို့နယ်အတွင်းရှိ ရပ်ကွက်/ ကျေးရွာအုပ်စုများတွင် သွားရောက်ကြည့်ရှုစစ်ဆေးခဲ့ကြောင်း သိရသည်။

သို့သော် ရွေးကောက်ပွဲ အပိုင်း (၂) အတွက် ကြိုတင်မဲကောက်ယူရာတွင် အချို့နေရာတွင်သာ အကြောင်းကြားပြီး အချို့နေရာတွင် အကြောင်းကြားခြင်းမရှိကြောင်း၊ သုံးပုံ နှစ်ပုံခန့်တွင် အခြားပါတီမှ လွှတ်တော် ကိုယ်စားလှယ်များကို အကြောင်းကြားခြင်းမရှိခဲ့ကြောင်း အထက်ပါ အမျိုးသားတစ်ဦးက ပြောသည်။

“ရှင်းရှင်းပြောရရင်တော့ စားပြီးမှ ပြောတာပေါ့။ တစ်ခါတစ်လေကျရင် သစ်သီးသွားခူးဖို့ကို ခွင့်တောင်းနေရသလိုပဲ” ဟု ၎င်းက ပြောသည်။

မိုင်းပျဉ်းမြို့သည် လာမည့် ဇန်နဝါရီလ ၁၁ ရက်တွင် ရွေးကောက်ပွဲကျင်းပမည် ဖြစ်သောကြောင့် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး (USDP)ပါတီမှ ကျေးရွာအတွင်းရှိ ဒေသခံများကို မဲရုံများတွင် ဆန္ဒမဲသွားပေးနိုင်ရန် ကားဖြင့်သယ်ယူပို့ဆောင်ပေးမည်ဟု ဒေသခံများက ပြောသည်။

မိုင်းပျဉ်းမြို့ခံတစ်ဦးက “အခုကြံ့ခိုင်ရေးပါတီက ကားငှားထားတယ်။ ကားနဲ့ အကြိုအပို့လုပ်ပေးမယ်တဲ့။ သူတို့ သွားကြိုတယ်ဆိုတော့ သူတို့ပါတီကို ထည့်ပေးရမှာ သေချာတယ်။ ကျနော်ပါတီ ဖြစ်ရင်လည်း ကျနော်ပါတီကို ထည့်ခိုင်းမှာပဲ” ဟု ပြောသည်။

စစ်ကော်မရှင်က ဦးဆောင်ကျင်းပခဲ့သည့် ရွေးကောက်ပွဲ ပထမပိုင်းတွင် ကြိုတင်မဲနှင့် ပတ်သက်၍ အငြင်းပွားမှုအချို့ ဖြစ်ပေါ်ခဲ့ပြီး စိစစ်ဆောင်ရွက်ပေးရန် နိုင်ငံရေးပါတီများက တင်ပြတောင်းဆိုခဲ့ကြကြောင်း သိရသည်။

စစ်ကော်မရှင်၏ ရွေးကောက်ပွဲတွင် ဝင်ရောက်ယှဉ်ပြိုင်နေသည့် ပါတီများ၏ တင်ပြချက်အရ ကြိုတင်မဲကောက်ယူရာတွင် ပါတီကိုယ်စားလှယ်များ လိုက်ပါခွင့်ကို လာမည့် ရွေးကောက်ပွဲ ဒုတိယပိုင်းနှင့် တတိယပိုင်းတွင် လုပ်ဆောင်သွားမည်ဟု ပြည်ထောင်စု ရွေးကောက်ပွဲမရှင် (UEC) ဘက်က ဇန်နဝါရီလ (၅) ရက်တွင် ပြန်လည်တုံ့ပြန်ထားသည်။

“ကျနော်တို့ နိုင်ငံရေးပါတီနဲ့ UEC ဥက္ကဋ္ဌ တွေ့ဆုံတဲ့အခါမှာလည်း ဒီနိုင်ငံရေးပါတီ ခေါင်းဆောင်တွေအနေနဲ့ အကြံပြုဆွေးနွေးတဲ့အရာတွေကို အားလုံးစနစ်တကျ ညွှန်ကြားတာ ရှိတယ်။ လာမယ့်ရွေးကောက်ပွဲမှာ တရားမျှတဖို့အတွက် ရွေးကောက်ပွဲကော်မရှင်ကို စာထုတ်ညွှန်ကြားထားတာရှိတယ်” ဟု ပအိုဝ်းအမျိုးသားဖွဲ့ချုပ် (PNO) ပါတီ၏ အထွေထွေအတွင်းရေးမှူး (၂) စောခွန်ကျော်ဝင်းကလည်း သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၆ ဇန်နဝါရီလ ၃ ရက်နေ့က ရွေးကောက်ပွဲကော်မရှင်၏ ထုတ်ပြန်ချက်အရ ရွေးကောက်ပွဲ ပထမပိုင်းတွင်ပါဝင်သည့် မဲဆန္ဒနယ် ၅၆ နေရာတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေး (USDP) ပါတီက ပြိုင်ဘက်မရှိသည့် နေရာများ အပါအဝင် မဲဆန္ဒနယ် ၅၂ နေရာတွင် အနိုင်ရရှိခဲ့ကြောင်း သိရသည်။

ပြိုင်ဘက်မရှိသည့် မဲဆန္ဒနယ်များမှာ ပြည်သူ့လွှတ်တော်တွင် ကချင်ပြည်နယ်၊ နောင်မွန်း၊ မံစီ၊ ရွှေကူ၊ စစ်ကိုင်း တိုင်း မင်းကင်း၊ ဝန်းသို၊ မော်လိုက်၊ ကနီ၊ ဆားလင်းကြီး၊ ရေဦး၊ တနင်္သာရီတိုင်း ရေဖြူ၊ လောင်းလုံ၊ မကွေးတိုင်း ဂန့်ဂေါနှင့် ရှမ်းပြည်နယ် မက်မန်း၊ ဖယ်ခုံ၊ မိုးနဲ တို့ဖြစ်သည်။