သျှမ်းပြည် မြောက်ပိုင်း နမ္မတူမြို့နယ် အတွင်းသို့ပြန်လာသည့် ပြည်တော်ပြန်များသည် COVID-19 ကော်မတီကို အကြောင်းမကြားဘဲ မိမိနေအိမ်သို တိတ်တဆိတ့် ပြန်နေနေကြကြောင်း သတင်းရရှိသည်။
ထိုင်း၊ တရုတ်နိုင်ငံမှ ပြန်လာသည့် ပြည်တော်ပြန် များသည် Quarantine ဝင်ရောက်နေထိုင်ခြင်းမရှိဘဲ မိမိနေအိမ်သို့ တိတ်တဆိတ်ပြန်နေကြသဖြင့် နမ္မတူဒေသခံများ COVID-19ပျံ့နှံ့မှု ဖြစ်ပွားမည်ကို စိုးရိမ်နေကြကြောင်း နမ္မတူမြို့ သျှမ်းစာပေ နှင့် ယဉ်ကျေးမှု ဥက္ကဌ ဦးဘဉာဏ် က သျှမ်းသံတော်ဆင့် ကိုပြောသည်။
“ ပြည်ပ ပြန်လာတဲ့သူ အများစုက ကျေးရွာကလူတွေများတယ်။ သူတို့က Quarantine မနေကြဘူး။ အိမ်တွေမှာ နေကြတယ်။ အဲ့ထဲက တယောက်ယောက် က ကိုဗစ်-၁၉ ဖြစ်ရင်တော့ အားလုံးထိပြီပဲ” ဟု ဦးဘဉာဏ် က ပြောသည်။
ပြည်ပ ပြန်လာသူ အများစုသည် နမ္မတူမြို့နယ် အတွင်းရှိ တိုင်းရင်းသားလက်နက်ကိုင် ထိန်းချုပ်သည့်နေရာမှ ပြည်သူများဖြစ်ကြောင်း၊ ထိုသူများကို သေချာ စိစစ်ကာ စောင့်ကြည့်ရန် လိုအပ်ကြောင်း လည်း ဦးဘဉာဏ် က ပြောသည်။
“ ပြည်ပ ပြန်တဲ့သူတွေက ရောဂါပိုးမပါလာရင်တော့ ဘာမှမဖြစ်ဘူး။ ပါလာရင်တော့ အားလုံး စိုးရိမ်ရတယ်။ ဒီရောဂါပိုးက ကိုယ်တယောက်တည်းမဟုတ်ဘူ အားလုံးကူးနိုင်တော့ ကျနော်တို့ မြို့ပေါ်လူလည်း ထိလာနိုင်တယ်” ဟု ဦးဘဉာဏ်က ထပ်လောင်းပြောသည်။
နမ္မတူမြို့နယ် အတွင်း ပြည်တော်ပြန် များကို ၁၄ရက် Home Quarantine အဖြစ် ထားရှိကြောင်း၊ သက်ဆိုင်ရာကို သတင်းပေးပို့ရန်လည်း ညွှန်ကြားထားကြောင်း၊ ပြည်သူများကို ထိန်းချုပ်ရန် ခက်ခဲကြောင်းလည်း နမ္မတူမြို့နယ် ပြည်နယ်လွှတ်တော်ကိုယ်စားလှယ် အမှတ်(၂) နန်းစံဟွမ် က ပြောသည်။
“ Home quarantine အနေနဲ့ ကူညီရတာခက်တယ်။ ငွေကြေးကလည်း သိပ်မကူနိုင်ဘူးလေ။ နောက်ကျမတို့ကတော့ ကျေးရွာတွေကွင်းဆင်းပြီး ပြည်တော်ပြန်ဆိုရင် သတင်းပို့ပေးဖို့တွေ လည်း ပြောထားပါတယ်” ဟု နန်းစံဟွမ်က ဆိုသည်။
လွန်ခဲ့သည့် ဖေဖော်ဝါရီ ၃ရက် တွင် တရုတ်ပြည်တွင် အလုပ်လုပ်ပြီး ပြန်လာသည့် အမျိုးသားတဦးသည်နေမကောင်းသဖြင့် ကိုဗစ်-၁၉ သံသယရှိသူအဖြစ် နမ္မတူဆေးရုံတွင် ဆေးကုသနေစဉ် သေဆုံးခဲ့ကြောင်းသိရသည်။
လက်ရှိ မြန်မာနိုင်ငံတွင် ကိုဗစ်-၁၉ ကူးစက်ခံရသူ ၁၂၇ဦးရှိပြီး သေဆုံးသူ ၅ဦးရှိကြောင်းသိရသည်။