သျှမ်းပြည် နမ္မတူမြို့ပေါ်သို့ စစ်ကော်မရှင်တပ်က လေကြောင်းဖြင့် ထပ်မံဗုံးကြဲ တိုက်ခိုက်ခဲ့ပြီး ထပ်မံထွက်ပြေးရသည့် စစ်ဘေးရှောင် (၅၀၀) ကျော် အကူအညီ လိုအပ်နေကြောင်း စုံစမ်းသိရသည်။

ယမန်နေ့ (အောက်တိုဘာလ ၂၃ ရက်) ည ၉ နာရီခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ္မတူမြို့ပေါ်သို့ စစ်ကော်မရှင်တပ်မှ ဂျက်ဖိုက်တာဖြင့် ထပ်မံဗုံးကြဲတိုက်ခိုက်ခဲ့ရာ ထိခိုက်ပျက်စီးမှုရှိကြောင်း ဒေသခံများက ပြောသည်။

“နမ္မတူမြစ်တောင်ဘက် မြို့ထဲကို ကျတာ။ အရင် အစိုးရဝန်ထမ်းတွေ နေတဲ့ သတလရပ်ကွက်ထဲ ကျတာ ဖြစ်လောက်တယ်၊ နေရာတော့ သေချာ မသိသေးဘူး။ တချို့လည်း သတလရပ်ကွက်လို့ ပြောတယ်၊ တချို့လည်း သတ္တုချက်စက်ရုံဘက် ကျတယ်လို့ ပြောတယ်။ အခုက စတားလင့်တွေလည်း ပိတ်ထားလို့ ဆက်သွယ်ဖို့ ခက်နေတယ်”ဟု နမ္မတူစစ်ရှောင် အမျိုးသားတစ်ဦးက သျှမ်းသံတော်ဆင့်ကို ပြောသည်။

နမ္မတူမြို့ပေါ် စစ်ကော်မရှင်တပ်၏ လေကြောင်းဗုံးကြဲ တိုက်ခိုက်မှုကြောင့် ထိခိုက်ပျက်စီးမှုအခြေအနေကို သျှမ်းသံတော်ဆင့်မှ ဆက်လက်စုံစမ်းနေပြီး ယခု အောက်တိုဘာလ တတိယပတ်အထိ TNLA ထိန်းချုပ်ထားသည့် နမ္မတူမြို့ကို စစ်ကော်မရှင်တပ်က (၆) ကြိမ်ထက်မနည်း ဆက်တိုက် ဗုံးကြဲတိုက်ခိုက်ခဲ့သည်။

အလားတူ သီပေါမြို့ကို ပြန်လည်ထိန်းချုပ်ထားသည့် စစ်ကော်မရှင်တပ်သည် ခြေမြန်တပ်ရင်း ခလရ-(၂၃) ကို ကျော်ကာ သီပေါ-နမ္မတူကြား ကွန်စံလိတ်ရွာ၊ မိုးတေရွာဘက် မြေပြင်ထိုးစစ် ရောက်ရှိလာပြီး မိုးတေတံတားလည်း မိုင်းခွဲဖျက်ဆီးခံလိုက်ရခြင်းကြောင့် နမ္မတူဒေသခံ (၅၀၀) နီးပါး ဘေးလွတ်ရာ ထပ်မံထွက်ပြေး တိမ်းရှောင်နေကြောင်း ဒေသခံများထံမှ သိရသည်။

“ရှေ့ရက်က စစ်တပ်နဲ့ TNLA မိုးတေတံတားနား တိုက်ပွဲဖြစ်တယ်။ TNLA ဘက်က တပ်ဆုတ်ပြီးတော့ အခု စစ်တပ်က မိုးတေတံတားမှာ တပ်စွဲထားတယ်၊ အဲ့တံတား ကျော်သွားရင် နမ္မတူနယ်ထဲ ရောက်ပြီဆိုတော့ ဒေသခံတွေလည်း စိုးရိမ်ပြီး ထွက်ပြေးနေကြတယ်။ အခက်အခဲကတော့ အများကြီး၊ ကူတဲ့လူ မရှိဘူး”ဟု သီပေါမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် နမ္မတူမြို့နယ်ရှိ ဆိုက်ခေါင်၊ မန်စံ၊ နမ့်တောင်ကုန်း၊ မိုင်းမု၊ ပန်လုံ စသည့် ကျေးရွာအုပ်စုများမှ ဒေသခံများသည် လားရှိုးမြို့နှင့် တန့်ယန်းမြို့ဘက်ထိ ထပ်မံထွက်ပြေးနေရကြောင်း စစ်ရှောင်ကူညီသူများထံမှ သိရသည်။

အောက်တိုဘာ လဆန်းပိုင်းတွင် TNLA ထိန်းချုပ်ထားသည့် နမ္မတူမြို့ပေါ်ကို စစ်ကော်မရှင်တပ်က လေကြောင်းဖြင့် တိုက်ခိုက်ခဲ့ခြင်းကြောင့် ဒေသခံတစ်ထောင်ကျော် လားရှိုးမြို့ဘက် (၂) ပတ်ခန့် ထွက်ပြေးတိမ်းရှောင်ခဲ့ရသည်။

သို့သော် တောင်ယာရိတ်သိမ်းချိန် ဖြစ်ခြင်းကြောင့် စစ်ဘေးရှောင်များ နေရပ်ပြန်သွားခဲ့ရာ လက်ရှိ စစ်ကော်မရှင်တပ်၏ နမ္မတူမြို့ကို ဦးတည်နေသည့် မြေပြင်ထိုးစစ်တွင် စစ်ဘေးထပ်မရှောင်နိုင်ဘဲ ငွေကြေးနည်းပါးခြင်းကြောင့် တိုက်ပွဲကြား ကျန်နေသူများလည်း ရှိကြောင်း ဒေသခံများထံမှ သိရသည်။

အခြားတစ်ဘက်တွင် TNLA ထိန်းချုပ်ထားသည့် နမ္မတူမြို့ပေါ်၌ ဖုန်းလိုင်း၊ အင်တာနက်လိုင်းများ ဖြတ်တောက်ခံထားရသည့်အပြင် စတားလင့် Starlink ဝိုင်ဖိုင်များလည်း ပိတ်ပင်ထားခြင်းကြောင့် ဆက်သွယ်ရေး ခက်ခဲနေကြောင်း စစ်ဘေးရှောင်များက ပြောသည်။