သျှမ်းပြည်မြောက်ပိုင်း သိန္နီမြို့နယ်နှင့် ကွတ်ခိုင်မြို့နယ်ကြား အစိုးရတပ်မတော်နှင့် တအာင်း TNLA တို့တိုက်ပွဲကြောင့် ခရီးသွားပြည်သူလူထု လမ်းခရီးမဆက်ရဲဘဲ ရောက်သည့်နေရာတွင် ရပ်နားထားရသည့်အပြင် ရွာသားများလည်း လက်နက်ကြီးသံကြောင့် ကြောက်ရွံ့နေကြကြောင်းသိရသည်။
နိုဝင်ဘာလ ၁၃ ရက် ယနေ့မနက်ပိုင်းကတည်းက သိန္နီ ကွတ်ခိုင်ကြား လွယ်ဆာမ်ဆစ်တွင် တိုက်ပွဲဖြစ်ပွါးရာ မူစယ်-မန္တလေးခရီးသွားများ လမ်းခရီးပြတ်တောက်ရကြောင်း ဒေသခံစိုင်းလှ က သျှမ်းသံတော်ဆင့်အားပြောသည်။
“မနက်အစောပိုင်း ၇ နာရီကတည်းက သေနတ်သံထွက်တာ။ လက်နက်ကြီးသံစစကြားမိတယ်။ ကွတ်ခိုင်မြို့တွင်းတပ်ကနေ ပစ်ခတ်တာ။ ပြီးမှ ၂ ဖက် ပစ်ခတ်သံကြားရတယ်။ ခရီးသည်ကားတွေကြီးငယ်အကုန် ကွတ်ခိုင်အဝင်မှာအစိုးရတပ် ကတားထား တယ်။ ကွတ်ခိုင်အထွက်မှာ တအာင်းတပ်က တားထားတယ်ဆိုတော့ ကားအသွားအလာ ၂ နာရီလောက်အကြာ ရပ်ထားရတာပေါ့။ ”- ဟု အသက် ၅၀ ခန့်အရွယ်ရှိ ဒေသခံ စိုင်းလှ ကပြောသည်။
လားရှိုးမှ ကွတ်ခိုင်အဝင် လွယ်ဆမ်ဆစ်နှင့် ကောင်းခါးလမ်းခွဲ ကြား ဂေါက်ကလပ်နှင့် ကမ္ဘာအေးအနီး ကွတ်ခိုင်မြို့မှ ၃ မိုင်ခန့်အကွာတွင်တိုက်ပွဲဖြစ်ပွါးခဲ့ခြင်းဖြစ်သည်။
“လက်နက်ကြီးတွေပစ်ခတ်လို့ ရွာသားတွေစိုးရိမ်မှုရှိနေကြတာ။ သူတို့ကပစ်ဖို့ဘဲသိတယ်။ ဘယ်မှာကျကျ ဂရုမစိုက်တော့ဘူးလေ။ ခုလောလောဆယ်တော့ စစ်ဘေးရှောင်မရှိသေးဘူး။ သေနတ်သံလည်း ၉ နာရီကျော်ကျော် ၁၀ နာရီလောက်မှာ ငြိမ်သွားတယ် ” – ဟု စိုင်းလှ ကပြောသည်။
သျှမ်းပြည်မြောက်ပိုင်းတွင်ယခုတပတ်အတွင်းတိုက်ပွဲများပြန်လည်ဖြစ်ပွါးလာပြီး တိုက်ပွဲများတွင် အစိုးရတပ်မှ လက်နက်ကြီးပစ်ခတ်မှုများရှိခဲ့ကြောင်း တိုက်ပွဲများဖြစ်ပွါးခဲ့သော ကျောက်မဲဒေသခံ၊ ကွတ်ခိုင်ဒေသခံများကပြောသည်။
