အပစ်အခတ်ရပ်စဲကြောင်း သက်တမ်းထပ်တိုးကြေညာသည့်နေတွင် စစ်ကောင်စီတပ်က သျှမ်းပြည် ဆီဆိုင်မြို့နယ်အတွင်းရှိ PNLO ၏ ဌာနချုပ်နှင့် ကျေးရွာများအား လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း PNLA မှ ယနေ့ ဧပြီလ ၂၃ ရက်နေ့တွင် သတင်းထုတ်ပြန်သည်။

ယမန်နေ့ ဧပြီလ ၂၂ ရက်တွင် တိုက်ပွဲဖြစ်ပွားခြင်းမရှိဘဲ စစ်ကောင်စီတပ်က ပအိုဝ်းအမျိုးသား လွတ်မြောက်ရေးအဖွဲ့ချုပ် PNLO ဌာနချုပ် ဧရိယာရှိ ကျေးရွာများနှင့် နောင်ထော်ကျေးရွာကို လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း PNLA ပြန်ကြားရေးတာဝန်ရှိသူ ခွန်ရိန်းယံက သျှမ်းသံတော်ဆင့်ကို ပြောသည်။

“ဖြစ်စဉ်ကတော့ မနေ့ကဖြစ်တာ။ စစ်ကောင်စီက သူတို့ပစ်ရပ်ထားတယ်ဆိုပြီး ကြေညာထားတဲ့ နောက်ဆုံးရက်ပဲ။ ပြီးတော့ သူတို့ထပ်မံ သက်တမ်းတိုးတဲ့ရက်ပဲ။ အဲ့ဒီရက်မှာပဲ သူတို့က ကျနော်တို့ ဌာနချုပ်မှာရှိတဲ့ ကျေးရွာတွေ၊ နောင်ထောင်ကျေးရွာတွေကို ၈၁-မမတွေ၊ ဟောင်ဝစ်ဇာ လက်နက်ကြီးတွေနဲ့ ပစ်ခတ်တိုက်ခိုက်တာ ၁၀ ကြိမ်ရှိတယ်။ ပေါက်ကွဲတာရှိတယ်၊ မပေါက်ကွဲတာရှိတယ်” ဟု ခွန်ရိန်းယံက ပြောသည်။

စစ်ကောင်စီ၏ လက်နက်ကြီး ပစ်ခတ်မှုကြောင့် ကျေးရွာအတွင်းရှိ နေအိမ်အချို့ ထိခိုက်ပျက်စီးခဲ့သော်လည်း ထိခိုက်ဒဏ်ရာရသူမရှိကြောင်း ဆိုသည်။

ငလျင်ဘေးသင့် ပြည်လည်တည်ဆောက်ရေးနှင့် ထူထောင်ရေးလုပ်ငန်းများ အရှိန်အဟုန်ဖြင့် ဆက်လက်ဆောင်နိုင်စေရန်ဟုဆိုကာ ဧပြီ ၂ ရက်မှ ၂၂ ရက်ထိ ယာယီအပစ်ရပ်ကြေညာထားသော စစ်ကောင်စီသည် အပစ်ရပ်ကာလကို ဧပြီ ၃၀ ရက်ထိ သက်တမ်းထပ်တိုးလိုက်ကြောင်း ယမန်နေ့ ဧပြီ ၂၂ ထုတ်ပြန်ကြေညာသည်။

သို့သော် အပစ်အခတ် ရပ်စဲကြောင်း ကြေညာထားသည်ဆိုသော်လည်း စစ်ကောင်စီတပ်က နိုင်ငံတဝှမ်းရှိ ကျေးရွာများအား ဗုံးကြဲမပြတ် ရှိနေကြောင်း ခွန်ရိန်းယံက ထပ်လောင်းပြောသည်။

“ဒီလုပ်ရပ်တွေက သေချာကြည့်လိုက်ရင် ကျနော်တို့ ဒေသမှာမှမဟုတ်ဘူး။ အခြားဒေသတွေမှာလည်း အပစ်ရပ်ထားတယ်ဆိုပြီးတော့မှ ဗုံးတွေကြဲတယ်။ ကလေးသူငယ်တွေကအစ သေဆုံးမှုရှိတယ်ဆိုတဲ့ဟာကို တွေ့ရတယ်။ ဆိုတော့ ဒါကိုကြည့်ခြင်းအားဖြင့် စစ်ကောင်စီက ငြိမ်းချမ်းမှု၊ တည်ငြိမ်မှုကို တကယ်လိုလားတာ မဟုတ်ဘူးဆိုတာကို တွေ့နေရတဲ့ အနေအထားဖြစ်ပါတယ်” ဟု ခွန်ရိန်းယံကဆိုသည်။

ပြီးခဲ့သည့် မတ်လ ၂၈ ရက်နေ့က စစ်ကိုင်းမြို့အနီးကို ဗဟိုပြု၍ လှုပ်ခတ်ခဲ့သော ရစ်ချ်တာစကေး ၇ ဒဿမ ၇ အဆင့်ရှိ အလွန်ပြင်းထန်သည့် မြေငလျင်လှုပ်ခတ်မှုနှင့် နောက်ဆက်တွဲ မြေငလျင်ငယ် လှုပ်ခတ်မှုကြောင့် နိုင်ငံတဝှမ်း သေဆုံးသူ ၃,၇၃၅ ဦး၊ ဒဏ်ရာရသူ ၅,၁၀၈ ဦးနှင့် ပျောက်ဆုံးနေသူ ၁၂၀ ဦးရှိကြောင့် စစ်ကောင်စီက ဧပြီလ ၂၀ ရက်နေ့တွင် သတင်းထုတ်ပြန်သည်။