သျှမ်းပြည် ကွတ်ခိုင်မြို့တွင် ဆိုင်ကယ်ခိုးယူ ထွက်ပြေးခဲ့သည့် TNLA တပ်သားတစ်ဦးကို ရပ်ကွက်နေ ပြည်သူများက ဝိုင်းဝန်းဖမ်းဆီးခဲ့ရကြောင်း စုံစမ်းသိရသည်။

နိုဝင်ဘာလ (၁၅)ရက် ညနေ ၆ နာရီကျော်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကွတ်ခိုင်မြို့ ရပ်ကွက်(၁) ရှိ “အောင်” ဆိုင်ကယ်ပြင်ဆိုင်ရှိ ဆိုင်ကယ်တစ်စီးကို TNLA တပ်သားတစ်ဦး ခိုးယူထွက်ပြေးသွားခြင်းကြောင့် ရပ်ကွက်နေပြည်သူများ ဝိုင်းဝန်းဖမ်းဆီးခဲ့ရကြောင်း ကွတ်ခိုင်ဒေသခံများက ပြောသည်။

“ရပ်ကွက်(၁)က ‘အောင်’ဆိုင်ကယ်ပြုပြင်ဆိုင်ပေါ့နော်၊ အဲ့ဒီမှာ ပိုင်ရှင်က ဆိုင်ကယ်ပြင်ရင်းနဲ့ သူက သော့ကို တန်းလန်းထားတာထင်တယ်။ အဲ့ဒါကို စစ်သားတစ်ယောက်က မောင်းပြေးသွားတယ်။ ပြည်သူတွေ နောက်က လိုက်ဖမ်းကြတော့ ဟိုဘက် မြို့ပြင်ထိပ် ရတနာမိုး နားမှာမှ သွားမိတာလေ။ ဟုတ်တယ် TNLA စစ်သားပဲ၊ ဖြစ်စဉ်ကတော့ မှန်တယ်”ဟု ကွတ်ခိုင်မြို့မှ ဖြစ်စဉ်သိရှိသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ဆိုင်ကယ်ခိုးယူထွက်ပြေးခဲ့သည့် အဆိုပါ TNLA တပ်သားမှာ နမ့်ဆန်မြို့မှ ကွတ်ခိုင်မြို့သို့ တာဝန်လာရောက် ထမ်းဆောင်နေသူဖြစ်ကြောင်း သိရပြီး ၎င်းကို ပြည်သူများ ဝိုင်းဝန်းဖမ်းဆီးကာ ကွတ်ခိုင်မြို့ရှိ TNLA တပ်ဖွဲ့ထံ အပ်နှံပေးခဲ့သည်ဟု ကွတ်ခိုင်ဒေသခံများက ပြောသည်။

လက်ရှိတွင် ၎င်း TNLA တပ်သားကို ကွတ်ခိုင်မြို့ရှိ TNLA လက်အောက်ခံ ရဲတပ်ဖွဲ့မှ အချုပ်ခန်းတွင် ဖမ်းဆီးထားပြီး ခိုးရာပါဆိုင်ကယ်ကို ပြည်သူများမှ မူလပိုင်ရှင်ထံ ပြန်လည်ပေးအပ်ခဲ့ကြောင်း သိရသည်။

“သူတို့အချင်းချင်း စစ်မေးမှာပေါ့။ လောင်းကစား ဒါမှမဟုတ် ငွေရေးကြေးရေး အရေးတစ်ကြီး လိုအပ်တယ်ဆိုတာ အဲ့ဒါတွေ ဆက်စပ်မှာ။ အဲ့လိုမျိုး ပြည်သူတွေက ပြန်ဖမ်းမိတယ် ဆိုတော့လည်း အဖွဲ့အစည်းကိုတော့ နာမည်ထိခိုက်တာပေါ့။ အဲ့ဒါကျတော့ သူတို့ ထိထိရောက်ရောက် အရေးယူမယ်လို့ ပြောတယ်”ဟု ကွတ်ခိုင်မြို့မှ ၎င်းဒေသခံ အမျိုးသားက ဆက်ပြောသည်။

အလားတူ နိုဝင်ဘာလ ၁ ရက် ညပိုင်းတွင် ကွတ်ခိုင်မြို့ရှိ TNLA လက်အောက်ခံ ရဲတပ်ဖွဲ့မှ အချုပ်ခန်းတွင် ဖမ်းဆီးချုပ်နှောင်ထားသော အချုပ်သား (၃၈) ဦး ထွက်ပြေး လွတ်မြောက်သွားခဲ့ကြောင်း သတင်းထွက်ပေါ်ခဲ့သော်လည်း တန်ဆောင်မုန်းလပြည့်နေ့ အထိမ်းအမှတ်အဖြစ် TNLA မှ ၎င်းတို့ကို လွတ်ငြိမ်းချမ်းသာခွင့် ပေးခြင်းလည်း ဖြစ်နိုင်ကြောင်း ကွတ်ခိုင်ဒေသခံများက သုံးသပ်ပြောဆိုသည်။

ထိုသို့ ထွက်ပြေးလွတ်မြောက်ခဲ့သူများထဲတွင် ကွတ်ခိုင်မြို့ ရပ်ကွက်(၈) ၌ “ရွှေကွတ်ခိုင်” အထူးကုဆေးခန်း ဖွင့်လှစ်ထားသည့် အသက် (၃၇) နှစ်အရွယ် ဒေါက်တာ အောင်ဖြိုးနိုင် ဆိုသူလည်း ပါဝင်ပြီး ၎င်းဆေးခန်းတွင် အလုပ်လုပ်နေသည့် အသက် (၁၄) နှစ်အရွယ် မိန်းကလေးကို အကြိမ်ကြိမ် မုဒိမ်းပြုကျင့်ခဲ့မှုကြောင့် စက်တင်ဘာလအတွင်း TNLA ဘက်မှ ဖမ်းဆီးခဲ့သူဖြစ်ကြောင်း သိရသည်။

“တကယ်ဆိုရင် ပြစ်မှုထင်ရှားတဲ့ ရာဇဝတ်သားဆိုရင် အများသိအောင် တရားစီရင်ရေးနဲ့ ပြစ်ဒဏ်ကို အမိန့်ချမှတ်ရမှာလေ။ ဒီအဆင့် မရောက်သေးဘူးဆိုရင် သေချာတယ် သူဟာ ကွတ်ခိုင် ရဲအချုပ်မှာပဲ ရှိနေရမယ်။ အဲဒီကာလမှာပဲ အချုပ်ဖောက်ပြေးတယ် ဆိုပြီး သတင်းထွက်လာတော့ သူ့ဆီကလည်း ငွေအဆမတန် ညှစ်ပြီး ရောလွှတ်ပေးလိုက်တယ်လို့ သုံးသပ်တယ်”ဟု ကွတ်ခိုင်ဒေသခံ ၎င်းအမျိုးသားက ထပ်လောင်းပြောသည်။

ကွတ်ခိုင်မြို့တွင် TNLA တပ်သားတစ်ဦး ဆိုင်ကယ်ခိုးယူထွက်ပြေးသည့် ဖြစ်စဉ်နှင့် TNLA ဖမ်းဆီးထားသည့် အချုပ်သားများ ထွက်ပြေးခဲ့သည့် ဖြစ်စဉ်တို့ကို TNLA ပြောရေးဆိုခွင့်ရှိသူ လွေးယေဦး ထံ စုံစမ်းမေးမြန်းနိုင်ရန် သျှမ်းသံတော်ဆင့်မှ ဆက်သွယ်ခဲ့သော်လည်း အဆက်အသွယ် မရရှိခဲ့ပါ။

လက်ရှိတွင် TNLA တပ်သားများ အွန်လိုင်း စလော့ဂိမ်းကဲ့သို့ လောင်းကစား ဆော့ဖ်ဝဲများ ဆော့ကစားပါက ထောင်ဒဏ် (၃) အထိ ချမှတ်မည့် အမိန့်စာကို အောက်ခြေတပ်သားများထံ ဖြန့်ဝေထားကြောင်း သိရသည်။

ပြီးခဲ့သည့် ဩဂုတ်လ ၂၃ ရက်တွင် နမ့်ခမ်းမြို့၌ TNLA လက်အောက်ခံ ရဲတပ်ဖွဲ့မှ ဖမ်းဆီးထားသည့် ပြစ်မှုကျူးလွန်သူ အမျိုးသား (၅) ဦးကို လုံခြုံရေးအပြည့်ဖြင့် ကားပေါ်တင်ပြီး လမ်းမကြီးအတိုင်း မြို့အနှံ့ လှည့်လည်ပြသခဲ့ကြောင်း ဒေသခံများက ပြောသည်။

ပုံစာ – ကွတ်ခိုင်မြို့တွင် ဆိုင်ကယ်ခိုးယူထွက်ပြေးသည့် TNLA တပ်သားကို ပြည်သူပြန်ဖမ်းမိ (ဓာတ်ပုံ-ဒေသခံ)