သျှမ်းပြည်တောင်ပိုင်း ဖယ်ခုံမြို့နယ် အနောက်ဘက်ရှိကျေးရွာကို စစ်ကော်မရှင်တပ်က လက်နက်ကြီးဖြင့် ရမ်းသမ်းပစ်ခတ်မှုကြောင့် အမျိုးသားတစ်ဦးသေဆုံးပြီး၊ တစ်ဦး ဒဏ်ရာရရှိခဲ့ကြောင်း စုံစမ်းရသည်။
ယနေ့ (ဖေဖော်ဝါရီ ၆ ရက်)မနက် ၁၀ နာရီဝန်ကျင် ဖယ်ခုံမြို့နယ်အနောက်ဘက်ခြမ်းရှိ လတိန်ကျေးရွာကို စစ်ကော်မရှင်တပ်က တိုက်ပွဲဖြစ်ပွားခြင်းမရှိဘဲ လက်နက်ကြီးဖြင့် ရမ်းသမ်း ပစ်ခတ်မှုနေခြင်းကြောင့် ဒေသခံ အမျိုးသားတစ်ဦး သေဆုံးပြီး၊ တစ်ဦးဒဏ်ရာရရှိခဲ့ကြောင်း စစ်ရေးသတင်းအရင်းမြစ်တစ်ဦးက သျှမ်းသံတော်ဆင့်ကို ပြောသည်။
“ဖယ်ခုံမြို့ ဘက်ကနေ ပစ်လာတာ။လတိန်ရွာထဲကိုကျတယ်။ အဲ့ရွာမှာ တိုက်ပွဲတွေလည်း မဖြစ်ဘူး။ လက်နက်ကြီး ကြောင့် နှစ်ယောက်ထိတယ် တစ်ယောက်သေတယ်။ တစ်ယောက် ဒဏ်ရာရတယ်”ဟု ၎င်းက ဆိုသည်။
ထိုစစ်ကော်မရှင်၏ လက်နက်ကြီးပစ်ခတ်မှုကြောင့် လတိန်ကျေးရွာနေ အသက် (၅၆) နှစ် ဦးစိုးဏသည် ပွဲချင်းပြီး သေဆုံးခဲ့ရကြောင်း သိရသည်။
ဖယ်ခုံမြို့နယ် မြောင်စလုံးကျေးရွာ နှင့် တောင်စလုံးကျေးရွာကြားတွင် ခြေမြန်တပ်ရင်း (ခမရ- ၃၃၆) အခြေစိုက်တည်ရှိသည်။
လက်ရှိ ဖယ်ခုံနှင့် ပင်လောင်း နယ်စပ်တကြောရှိ တောင်စလုံးကျေးရွာ၊ မြောက်စလုံးကျေးရွာနှင့် ဘောရန်းရွာနေ ဒေသခံများသည် ကရင်နီနယ်စပ်တကြောရှိ ဘေးလွတ်ရာ ကျေးရွာနှင့် တောတောင်အတွင်း ရွာလုံးကျွတ် ထွက်ပြေးတိမ်းရှောင် နေကြကြောင်း သိရသည်။
Leave a Comments