သျှမ်း – ကရင်နီပြည် နယ်စပ် မိုးဗြဲမြို့တွင် စစ်ကောင်စီတပ်မှ လက်နက်ကြီး ရမ်းသမ်းပစ်ခတ်ပြီး လေကြောင်း အသုံးပြု တိုက်ခိုက်နေခြင်းကြောင့် တိုက်ပွဲများ ဆက်လက်ပြင်းထန်နေကြောင်း စုံစမ်းသိရသည်။

ယနေ့ (မေလ ၇ ရက်) တွင်လည်း မိုးဗြဲမြို့နှင့် ကုန်းသာကျေးရွာတွင် စစ်ကောင်စီတပ်က လက်နက်ကြီး ပစ်ခတ်သည့်အပြင် လေကြောင်း အသုံးပြု တိုက်ခိုက်နေပြီး တော်လှန်ရေးတပ်ဖွဲ့များနှင့် တိုက်ပွဲများ ဆက်လက်ပြင်းထန်နေကြောင်း သတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“မိုးဗြဲဘက် အခြေအနေကတော့ ဒီနေ့ လက်နက်ကြီးတွေ ကျနေပါတယ်။ တစ်ဘက်မှာလည်း မိုးဗြဲ အရှေ့ဘက် ကုန်းသာကျေးရွာမှာလည်း တိုက်ပွဲတွေ ပြင်းထန်နေပါတယ်၊ လေယာဉ်တွေပါ သုံးပြီး ဗုံးကြဲတိုက်ခိုက်နေပါတယ်။ စစ်ကောင်စီက အဆိပ်ဗုံးကို နေ့တိုင်းတော့မဟုတ်ဘူး၊ ဒါပေမယ့် တိုက်ပွဲဖြစ်ရင်တောာ့ ပိုကြဲတယ်”ဟု သတင်းရင်းမြစ်တစ်ဦးက ပြောသည်။

မိုးဗြဲမြို့တွင် စစ်ကောင်စီတပ်မှ နေ့စဉ်ရက်ဆက် လက်နက်ကြီး ပစ်ခတ်ခြင်း၊ အဆိပ်ငွေ့ဗုံးများပါ လေယာဉ်၊ ဒရုန်းများဖြင့် အသုံးပြုတိုက်ခိုက်နေပြီး တိုက်ပွဲများ ဆက်လက်ပြင်းထန်နေကြောင်း ကရင်နီအမျိုးသားများကာကွယ်ရေးတပ် ( KNDF ) မှ ယမန်နေ့ (မေလ ၆ ရက်)တွင် ထုတ်ပြန်ခဲ့သည်။

ပြီးခဲ့သည့် ဧပြီလ နောက်ဆုံးပတ်နှင့် မေလ ပထမပတ်အတွင်း ဖယ်ခုံမြို့နယ် မိုးဗြဲမြို့ကို စစ်ကောင်စီတပ်က စစ်အင်အားဖြည့်ခြင်း၊ စစ်ကြောင်းထိုးခြင်းများ ပြုလုပ်ခဲ့သည့်အတွက်ကြောင့် နှစ်ဘက်တိုက်ပွဲများ ပြန်လည် ပြင်းထန်လာကြောင်း သိရသည်။

မိုးဗြဲမြို့သိမ်းတိုက်ပွဲအတွင်းတွင် စစ်ကောင်စီတပ်နှင့် သျှမ်းတောင်စစ်ဒေသခွဲ၊ PDF ဗျူဟာအမှတ်(၁) လက်အောက်ရှိ တပ်ရင်းတပ်ဖွဲ့၊ ကရင်နီအမျိုးသား ကာကွယ်ရေးတပ် KNDF အပြင် အခြားမဟာမိတ် တပ်ပေါင်းစုတို့ ပါဝင်တိုက်ခိုက်နေကြောင်းသိရသည်။

သျှမ်း – ကရင်နီ နယ်စပ် မိုးဗြဲမြို့တွင် စစ်ကောင်စီ နှင့် တော်လှန်ရေး တပ်‌ပေါင်းစုတို့အကြား ပြီးခဲ့သည့် နှစ်ဆန်းပိုင်းမှ စ၍ လက်ရှိအချိန်ထိ လေးလကျော်ကြာ နေ့စဉ်နီးပါး တိုက်ပွဲပြင်းထန်နေပြီး နှစ်ဘက်ထိခိုက် ကျဆုံးမှုများရှိကာ နေအိမ်မီးလောင်မှုများလည်း ရှိကြောင်း သိရသည်။

မိုးဗြဲမြို့သည် နေပြည်တော်နှင့် မိုင် ၁၀၀ ဝန်းကျင်ခန့်သာ ဝေးကွာသည့်အပြင်၊ မိုးဗြဲမြို့၏ မြောက်ဘက်တွင် ပင်လောင်း၊ ညောင်ရွှေနှင့် ဆီဆိုင်၊ တောင်ဘက်တွင် ဖရူဆိုနှင့် သံတောင်၊ အရှေ့ဘက်တွင် လွိုင်ကော်နှင့် ဒီးမော့ဆို ၊ အနောက်ဘက်တွင် ပျဉ်းမနားမြို့နယ်တို့နှင့် နယ်နိမိတ်ချင်း ထိစပ်နေသည့်အတွက် နှစ်ဘက်တပ်တို့၏ စစ်ရေးအရ အရေးပါသည့် နေရာဖြစ်ကြောင်း သိရသည်။