မြန်မာ့တပ်မတော်နှင့် TNLA  ကွတ်ခိုင်မြို့နယ်တွင်း တိုက်ပွဲဖြစ်ပွား

0

သျှမ်းပြည်နယ် မြောက်ပိုင်း ကွတ်ခိုင်မြို့နယ် အတွင်း ယနေ့ မနက်ပိုင်းက မြန်မာ့တပ်မတော် နှင့် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) တို့ တိုက်ပွဲဖြစ်ပွား ခဲ့ကြောင်း သတင်းရရှိသည်။

Photo Credit to Owner- TNLA and Myanmar Military

စက်တင်ဘာ ၂၄ ရက်  ယနေ့ မနက် ၅ နာရီခွဲက ကွတ်ခိုင်မြို့နယ် ကုန်းဆာရွာ အထက် တောင်ကုန်းပေါ်တွင် မြန်မာ့တပ်မတော်မှ ခြေလျင်တပ်ရင်း ခလရ ၄၅၊  ၂၄၂၊ ၆၉ ပူးပေါင်းပြီး TNLA တပ်မဟာ ၅ နှင့် တပ်ရင်း ၂၂၃ တပ်စွဲထားသည့် နေရာကို ဝင်ရောက်တိုက်ခိုက်မှု ကြောင့် တိုက်ပွဲဖြစ်ပွားရခြင်းဖြစ်သည် ဟု TNLA မှ ပြောရေးဆိုခွင့်ရှိသူ ဗိုလ်မှူးတားအိုက်ကျော် က သျှမ်းသံတော်ဆင့် သို့ ပြောသည်။

“ မနက် ၅ နာရီခွဲ မှာ ကျနော်တို့ တပ်စခန်းချတဲ့နေရာကို မြန်မာ့တပ်မတော် ဘက်က လာပြီး တိုက်တာပါ။ တိုက်ပွဲက ယခုချိန်ထိ မငြိမ်သေးဘူး(၁၁နာရီခွဲ) ထိ ဖြစ်နေတုန်းပါ” ဟု တားအိုက်ကျော် က ဆိုသည်။

အဆိုပါက တိုက်ပွဲ ဖြစ်သည့်နေရာသည် ကွတ်ခိုင်မြို့ နှင့် ၂မိုင်ခန့်သာ ကွာဝေးပြီး၊ ကွတ်ခိုင် အခြေစိုက် မြန်မာ့တပ်မတော် ဘက်မှ လက်နက်ကြီးများအသုံးပြုပြီး ပစ်ခတ်မှုရှိကြောင်း လည်း တားအိုက်ကျော်က ကပြောသည်။

“ ကွတ်ခိုင်မြို့ထဲ လက်နက်ကြီးသံတွေ ကြားရတယ်။ ဖြစ်တဲ့နေရာက ကွတ်ခိုင်နဲ့ နီးတယ်လေ။ ဒီမနက် ၅ နာရီခွဲကနေ မနက် ၁၁ နာရီ ထိဖြစ်တယ်။ လွိုင်ဆမ်ဆစ် တောင်ကြောဘက်တွေမှာ ဖြစ်တာ အဲ့နားက ရွာတွေရှိတယ်” ဟု ကွတ်ခိုင်မြို့နယ် သျှမ်းစာပေ၊ယဉ်ကျေးမှု ဥက္ကဌ စိုင်းလှအောင် က သျှမ်းသံတော်ဆင့် သို့ ပြောသည်။

ယနေ့ဖြစ်သည့် တိုက်ပွဲသည် လွန်ခဲ့သည့် သြဂုတ်လကုန်ပိုင်းတွင်ဖြစ်ပွားသည့် တိုက်ပွဲကဲ့သို့ မဟုတ်ဘဲ အချင်းချင်း ထိတွေ့မှု ကြောင့် ဖြစ်သည့် တိုက်ပွဲဖြစ်ကြောင်း စိုင်းလှအောင် ပြောသည်။

“အခု ဖြစ်နေတာက အချင်းချင်း ထိတွေ့မှုလိုပါပဲ။ သေနတ်နဲ့ အချက်ပေးတဲ့သဘောပါပဲ။ အခု ကွတ်ခိုင်က ပုံမှန် ရက်တွေလိုပါပဲ” ဟု စိုင်းလှအောင် က ဆိုသည်။

ညီနောင်မဟာမိတ် ၃ဖွဲ့ဖြစ်သည့် TNLA၊ ကိုးကန့်တပ် ( MNDAA )နှင့် ရခိုင် တပ် (AA) တို့သည့် တဖတ်သတ် အပစ်ခတ်ရပ်စဲရေးကို ဒီဇင်ဘာ ၃၁ ရက်ထိ တိုးမြင့်လိုက်ပြီး၊ မြန်မာ့ တပ်မတော်ဘက်မှ စက်တင်ဘာ ၂၁ ရက်နေ့တွင် ကုန်ဆုံးသွားသည့် စစ်တိုင်း (၅)တိုင်း တဖက်သတ် အပစ်ခတ်ရပ်စဲကို ထပ်မံ မတိုးထားပေ။

မြန်မာ့တပ်မတော်ဘက် မှ တဖက်သတ် အပစ်ခတ်ရပ်စဲရေး ထပ်မံတိုးခြင်း၊ မတိုးခြင်းသည် အဓိက မဟုတ်ကြောင်း၊ တပ်မတော် ဘက်မှ တဖက်သတ် အပစ်ခတ်ရပ်စဲရေး ကြေညာခဲ့သော်လည်း တိုက်ပွဲထပ်မံ ဖြစ်ပွားခဲ့ကြောင်း တားအိုက်ကျော်က ထောက်ပြ ပြောဆိုလိုက်သည်။

“ တပ်မတော်ဘက်က အပစ်ခတ်ရပ် တိုးတာ မတိုးတာ ကျနော်တို့နဲ့မဆိုင်ဘူး။ အရင်က တပ်က ထုတ်ပြန်လည်း တိုက်ပွဲဖြစ်တယ်။ မထုတ်ပြန်လည်း တိုက်ပွဲဖြစ်တယ်။ သူတို့ မတိုးတာ ကတော့ စစ်ရေး အရ ပြင်ဆင်နေပြီ။ စစ်ရေးပြင်းထန်လာမလားဆိုတာတော့ စိုးရိမ်ရတယ်” ဟု တားအိုက်ကျော် က ပြောဆိုလိုက်သည်။

မြောက်ပိုင်း မဟာမိတ် (၄)ဖွဲ့ နှင့် မြန်မာ့တပ်မတော်သည် စက်တင်ဘာ ၁၇ ရက်နေ့တွင် သျှမ်းပြည်နယ် ကျိုင်းတုံမြို့တွင် တွေ့ဆုံမှု ပြုလုပ်ခဲ့ကြပြီး နှစ်ဖက် စစ်ရေးလျော့ ကျမှုကို ဆွေးနွေးမှု မရှိခဲ့ကြောင်း၊ ထို့ပြင် အောက်တိုဘာ လတွင် ထပ်မံ တွေ့ဆုံရန်လည်း ကြေညာထားသည်။

 

ဢုပ်ႇဢူဝ်း ၽူႈတွႆႇႁွၵ်ႈ

SHARE