အမျိုးသားပြန်လည် သင့်မြတ်ရေး နှင့် ငြိမ်းချမ်းရေး ဗဟိုဌာန NRPC နှင့် တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘာတူ စာချုပ်   NCA   လက်မှတ်ရေးထိုးထားသည့် လက်နက်ကိုင်အဖွဲ့များမှ ခေါင်းဆောင်များ ထိုင်းနိုင်ငံ ချင်းမိုင် မြို့ ၌ အလွှတ်သဘော တွေ့ဆုံ ဆွေးနွေးခဲ့ကြသည်။

သြဂုတ်လ ၁၉ ရက် ညနေ ၃ နာရီခွဲတွင် ပြုလုပ်သောအဆိုပါတွေ့ဆုံမှု တွင် NRPC မှ ဒုတိယ ဗိုလ်ချုပ်ကြီး ခင်ဇော်ဦး (အငြိမ်းစား) ဦးဆောင်သည့် ကိုယ်စားလှယ် အဖွဲ့ နှင့် NCA လက်မှတ်ရေးထိုးသည့် လက်နက်ကိုင် ၁၀ ဖွဲ့ မှ ကိုယ်စားလှယ်များ တက်ရောက်ခဲ့ကြသည်။

“ဒီကနေ့ ကျနော်တို့အလွှတ်သဘောမျိုး တွေ့ဆုံတာပါ။ EAOဘက်က ကြုံတွေ့နေတဲ့အခက်အခဲတွေ NCA အကောင်အထည်ဖော်တဲ့အပိုင်းမှာ ကြံုတွေ့နေတဲ့ ပြသာနာကို အဆိုတင်သွင်း ကြတယ်။ အဓိက အစိုးရ အဆိုပြုတဲ့အပေါ်မှာ မရှင်းလင်းတာတွေ ရှင်းလင်းအောင် ပြောတာပါ။” ဟု သမ္မတရုံး ညွှန်ကြားရေးမှူးချုပ် ဦးဇော်ဌေး က မီဒီယာ များကို ပြောကြားခဲ့သည်။

လုပ်ငန်းစဉ် ၄ ခုဖြစ်သည့် NCA အဓိပ္ပာယ်ဖွင့်ဆိုချက် ကွဲလွဲမှု၊ ၂၀၂၀ မတိုင်ခင် နှင့် ၂၀၂၀ အလွန် ကာလ ငြိမ်းချမ်းရေး လုပ်ငန်းစဉ်၊ ငြိမ်းချမ်းရေး ညီလာခံ ဖက်ဒရယ် အခြေခံမူ နှင့် NCA ငြိမ်းချမ်းရေး အသီးအပွင့်များ တပြိုင်တည်း သွားရန် ပြန်လည်ရှင်းလင်းခဲ့ကြောင်း ဦးဇော်ဌေး က ပြောသည်။

“ ၂၀၂၀ မတိုင်ခင် ကျနော်တို့ ဘာတွေ ရအောင်လုပ်မလဲ။ ငြိမ်းချမ်းရေး ညီလာခံ မှာ ဘာတွေ ရအောင်လုပ်မလဲ ၂၀၂၀ ကျော်သွားရင် ဘာတွေ ဆက်လုပ်မလဲ။ ၂၀၂၀ အလွန်တက်လာတဲ့ အစိုးရကလည်း ဒီလမ်းကြောင်းကို ဆက်ပြီး အကောင်အထည်ဖော်သွားလို့ ရတယ် ။နောက် တချက် က ညီလာခံ တခု ကျင်းပဖို့ လိုလားတယ်” ဟု ဦးဇော်ဌေး က ပြောသည်။

NRPC အနေဖြင့် သြဂုတ်လ ၂၀ ရက်နေ့တွင် ကရင် အမျိုးသားအစည်းအရုံး (KNU) ၊ သျှမ်းပြည် ပြန်လည် ထူထောင်ရေး ကေင်စီ (RCSS/SSA) တို့နှင့် သီးသန့်တွေ့ဆုံရန် ရှိကြောင်းသိရသည်။

သြဂုတ် ၂၁ ရက်နေ့တွင် ငြိမ်းချမ်းရေး လုပ်ငန်းစဉ် ဦးဆောင် အဖွဲ့ ( PPST) အစည်းအဝေး ဆက်လက်ကျင်းပသွားမည် ဟုလည်း သိရပါသည်။