၂၀၂၀ တပ်မတော်နေ့အလွန် ပြည်ထောင်စုငြိမ်းချမ်းရေးညီလာခံ ကျင်းပနိုင်ရန်ဆွေးနွေးပြင်ဆင်

0

တစ်ဆို့နေသည့် ငြိမ်းချမ်းရေးဖြစ်စဉ်များ ဖြည်လျှော့ကာ စတုတ္ထအကြိမ်မြောက် ပြည်ထောင်စုငြိမ်းချမ်းရေး ညီလာခံ ခေါ် ၂၁ ရာစုပင်လုံညီလာခံ ဒုတိယအကြိမ် ကျင်းပနိုင်ရန် အပစ်ရပ်လက်နက်ကိုင် ၁၀ ဖွဲ့ နှင့် အစိုးရကိုယ်စားလှယ်တို့ ထိုင်းနိုင်ငံ ချင်းမိုင်မြို့တွင် ယနေ့တွေ့ဆုံဆွေးနွေးကြသည်။

Photo SHAN-အစိုးရ၏ ငြိမ်းချမ်းရေးကိုယ်စားလှယ်များနှင့် NCA ထိုး တိုင်းရင်းသား ၁၀ ဖွဲ့ကိုယ်စားလှယ်များ နို၀င်ဘာလ ၂၀ ရက် ၂၀၁၉ ထိုင်းနိုင်ငံချင်းမိုင်မြို့တွင်တွေ့ဆုံဆွေးနွေးကြစဉ်

ဒုတိယ ဗိုလ်ချုပ်ကြီးခင်ဇော်ဦး ဦးဆောင်သည့် အစိုးရ ငြိမ်းချမ်းရေးကိုယ်စားလှယ် အဖွဲ့ နှင့် သျှမ်းပြည် တပ်မတော် RCSS/SSA မှ ဗိုလ်မှူးကြီး စိုင်းငင်း ဦးဆောင်သည့် တနိုင်ငံလုံးအပစ်အခတ်ရပ်စဲရေးစာချုပ် NCA လက်မှတ်ရေးထိုးထားသည့် ကိုယ်စားလှယ် များ ထိုင်းနိုင်ငံမြောက်ပိုင်း ချင်းမိုင်ခရိုင် ဆန်ကမ်ပိုင်း မြို့နယ် ခမ်းမွန့်ဟော်တယ် တွင် နိုဝင်ဘာ ၂၀ ရက် နံနက် ၁၀ နာရီမှ မွန်းတည့်ချိန် ၁၂ နာရီခန့်အထိ တွေ့ဆုံဆွေးနွေးကြသည်။

တွေ့ဆုံမှုအပြီး သတင်းစာရှင်းလင်းပွဲ ပြုလုပ်ရာ နိုင်ငံတော် ပြောခွင့်ရ ပုဂ္ဂိုလ် ဦးဇော်ဌေးက – “ပြည် ထောင် စုငြိမ်းချမ်းရေးညီလာခံကိုဘယ်ပုံစံဘယ်လိုသွားကြမလဲဆိုတဲ့ Time Line ပေါ့။ မတ်လ တပ်မတော် နေ့နောက်ပိုင်း ကျင်းပနိုင်ဖို့အတွက် အစိုးရက အဆိုပြုထားတယ်။ JICM ကျင်းပရေး ညီလာခံကျင်း ပရေးအတွက် ကြားမှာ လုပ်ရမယ့်အလုပ်တွေအများကြီးကိုကျနော်တို့လုပ်သွားဖို့ရှိတယ်။ တဖက်နဲ့တ ဖက်အဆိုပြုချက်တွေလည်းရှိနေပါပြီ ကျနော်တို့ဆွေးနွေးသွားဖို့ဘဲလိုပါတယ်“ – ဟု ပြောသည်။

အပစ်ရပ်လက်နက်ကိုင် ၁၀ ဖွဲ့ကိုယ်စားလှယ်နှင့် အစိုးရ ငြိမ်းချမ်းရေးကိုယ်စားလှယ် တို့တွေ့ဆုံမှုတွင် အဓိက အကြောင်းအရာ ၅ ခုဆွေးနွေးခဲ့သည်။ ၄င်းတို့မှာ – (၁) အစိုးရ မှ အဆိုပြုထားချက်အရ JICM အမြန်ဆုံးကျင်းပနိုင်ရေး၊ (၂) ပြည်ထောင်စုငြိမ်းချမ်းရေးညီလာခံကျင်းပနိုင်ရေးကိစ္စ၊ (၃) ငြိမ်းချမ်းရေး အားထိခိုက်စေခဲ့သည့် RCSS ဥက္ကဌ ခရီးစဉ်မှာ သင်ခန်းစာယူရမည့်ကိစ္စ၊ (၄) နှစ်ဘက်ကြုံတွေနေရသည့် အခြေအနေများအားလွတ်လပ်ပွင့်လင်းစွာဆွေးနွေးဖို့ နှင့် (၅) လက်ရှိ နိုင်ငံတကာအရေးနှင့် အစိုးရ တပ်မတော် တို့ရင်ဆိုင်နေရသည့်ကိစ္စ စသည့်အရေးများတွေ့ဆုံဆွေးနွေးကြသည်ဟု သိရသည်။

Photo SHAN-တွေ့ဆုံမှုအပြီး အစိုးရကိုယ်စားလှယ်ပြောရေးဆိုခွင့်ဦးဇော်ဌေးနှင့် EAO ဘက်မှ နိုင်အောင်မငေးတို့ သတင်းထောက်များအား လက်ခံဖြေကြားပေးနေစဉ်

အဆိုပါတွေ့ဆုံမှု နှင့် ပတ်သက်ပြီး NCA- S EAOs ပြောရေးဆိုခွင့်ရှိသူ မွန်ပြည်သစ်ပါတီမှ နိုင်အောင်မငေး က – “JICMကိုဘယ်လိုသွားမလဲ။ ကနဦးကလည်း ကျနော်တို့ဆုံးဖြတ်ထားပြီးသားဆိုတော့ ကျနော်တို့ ဆက်သွား ဖို့အစီအစဉ်ရှိပါတယ်။ နောက် UPC ကိုဘယ်တော့ကျင်းပနိုင်မလဲဆိုတာလည်း JICM ထဲမှာ အသေးစိပ် ရက်နေ့ကိုလည်း ကျနော်တို့ပြန်ပြီးဆွေးနွေးမယ်။ ဒါကျနော်တို့ဒီနေ့ ၂ ဖက်တွေ့တဲ့ရလာဒ် ကောင်းတခုပါဘဲ” – ဟု ပြောသည်။

နိုဝင်ဘာ ၁၉ ရက်နေ့ တွင် တပ်မတော်၊ အစိုးရ နှင့် RCSS/SSA တို့တွေ့ဆုံခဲ့ပြီး ၂၀ ရက်နေ့ တွင် NCA- S EAOs ကိုယ်စားလှယ်များ နှင့် တွေ့ဆုံကာ နို၀င်ဘာ ၂၂ ရက်နေ့တွင် ကရင်အမျိုးသားအစည်းအရုံး KNU နှင့် သီးသန့် တွေ့ဆုံဖို့လည်းရှိနေပါသည်။

Leave a Comments

SHARE