သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA) နှင့် အစိုးရတပ်မတော် တို့ ယမန်နေ့ မတ် ၁၅ ရက် က နေပြည်တော်တွင် တွေ့ဆုံဆွေးနွေးခဲ့ကြောင်း သတင်းရရှိသည်။
နေပြည်တော် တိုင်းစစ်ဌာနချုပ် ပေါင်းလောင်းရိပ်သာတွင် တွေ့ဆုံကြခြင်းဖြစ်ပြီး ငြိမ်းချမ်းရေး လုပ်ငန်း စဉ်များ၊ တပ်ပိုင်းဆိုင်ရာ ကိစ္စရပ်များ၊ JMC ဆိုင်ရာ လုပ်ငန်းများ၊ လူထု အတွက် ဒေသဖွံ့ဖြိုးရေး လုပ်ငန်း များ နှင့် လက်ရှိဖြစ်ပွားနေသည့် Novel Corona Virus (ခိုရိုနာဗိုင်းရပ်စ်) COVID -19 ကာကွယ်ရေး အတွက် ပြည်သူလူထုများအား အသိပညာပေးခြင်းတို့ကို ဆွေးနွေးခဲ့ကြကြောင်း သိရသည်။
ယင်းတွေ့ဆုံပွဲတွင် RCSS/SSA ဘက်မှ ဗိုလ်ချုပ် ဘောင်ခေး ဦးဆောင်ပြီး၊ အစိုးရ တပ်မတော် ဘက်တွင် ဒုတိယ ဗိုလ်ချုပ်ကြီး ရာပြည့် က ဦးဆောင် ဆွေးနွေးခဲ့သည်။
“ တပ်၂ဖက် အကြောင်းကိစ္စတွေ ရှိလာရင် တွေ့ဆုံဆွေးနွေးဖို့ ပြောထားပါတယ်။ မိုင်းကိုင် ကိစ္စလည်း ဆွေးနွေးကြပါတယ်။ တိုက်ပွဲထပ်မဖြစ်ဖို့ လည်း ဆွေးနွေးပါတယ်” ဟု RCSS/SSA ပြောရေးဆိုခွင့်ရှိသူ ဗိုလ်မှူးကြီး အုမ်ခေး က ပြောသည်။
RCSS/SSA နှင့် အစိုးရ တပ်မတော် သည် ဖေဖော်ဝါရီ ၂၇ ရက်မှ စတင်ကာ မတ်လဆန်းပိုင်းထိ သျှမ်းပြည် တောင်ပိုင်း မိုင်းကိုင်မြို့နယ် လွိုင်တောင်း တောင်ကြော တလျှောက်တွင် တိုက်ပွဲဖြစ်ပွား ခဲ့သည်။
RCSS/SSA တပ်စခန်းချသည့် လွိုင်တောင်း တပ်စခန်း တပ်ဆုတ်ခဲ့ရပြီး လက်ရှိမှာ အစိုးရတပ်မတော်က တပ်စခန်းချထားကြောင်း သိရသည်။
