သျှမ်းပြည်တောင်ပိုင်း လင်းခေးမြို့နယ် ဝမ်ဟတ်တိုက်နယ်တွင် ကျင်းပပြုလုပ်နေသည့် ၂၁၂၀ ပြည့်နှစ် သျှမ်းနှစ်သစ်ကူးပွဲနှင့် ဓမ္မစကူးလ် သင်တန်းဆင်းပွဲသို့ RCSS ဥက္ကဋ္ဌ ဗိုလ်ချုပ်ကြီးယွက်စစ် တက်ရောက်ခဲ့ကြောင်း သတင်းသိရသည်။

ယနေ့ (နိုဝင်ဘာလ ၁၉ ရက်) နေ့လယ် ၁ နာရီတွင် လင်းခေးမြို့နယ် ဝမ်ဟတ်တိုက်နယ် နားကုန်းကျေးရွာတွင် ကျင်းပပြုလုပ်နေသည့် ၂၁၂၀ ပြည့်နှစ် သျှမ်းနှစ်သစ်ကူးပွဲတော်နှင့် ၂၅ ကြိမ်မြောက် ဓမ္မစကူးလ် သင်တန်းဆင်းပွဲ အခမ်းအနားသို့ သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) ဥက္ကဋ္ဌ ဗိုလ်ချုပ်ကြီးယွက်စစ် တက်ရောက်ခဲ့ကြောင်း ဒေသခံများက ပြောသည်။

“အဓိကတော့ ဓမ္မစကူးလ် ငွေရတုပွဲနဲ့ သျှမ်းနှစ်သစ်ကူး ကြိုဆိုပွဲ လုပ်တာပေါ့။ အဲ့မှာ ဥက္ကဋ္ဌကြီးက ပွဲတက်ရောက် ချီးမြှင့်ပေးတယ်၊ ဘုန်းကြီးကျောင်းအတွက် အလှူငွေ လှူဒါန်းတယ်။ လူထုနဲ့ တွေ့ဆုံပြီး အမှာစကားပြောတယ်”ဟု လင်းခေးမြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

လင်းခေးမြို့နယ် ဝမ်ဟတ်တိုက်နယ်တွင် ကျင်းပနေသည့် အဆိုပါ သျှမ်းနှစ်သစ်ကူးပွဲတော်သို့ RCSS/SSA အပြင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA)၊ ကာလိမြို့မှ တပ်မဟာ အမှတ်(၇) ပြည်သူ့စစ်၊ ဟိုမိန်းမြို့မှ မဟာဂျာ ဦးဆောင်သည့် SSS ပြည်သူ့စစ်အဖွဲ့ ကိုယ်စားလှယ်များလည်း တက်ရောက်ကြောင်း သိရသည်။

ထို့အပြင် ၂၀၂၅ ခုနှစ်အတွင်း အခြေခံပညာ အထက်တန်း အောင်မြင်ခဲ့သူများနှင့် ပြည်တွင်း/ပြည်ပမှ ဘွဲ့ဆွတ်ခူးရရှိသူများကို ဆုချီးမြှင့်ခဲ့ရာတွင် ဆရာ/ဆရာမ ၂၆၀ ဦး၊ ကျောင်းသား/သူ ၂၃၁၆ ဦးတို့ကို ဆုပေးအပ်နိုင်ခဲ့ကြောင်း RCSS သတင်းများ ဖော်ပြနေသည့် Tai Freedom မီဒီယာတွင် ရေးသားထားသည်။