ပိတ်ဆို့နေသည့် ငြိမ်းချမ်းရေး ပူပေါင်းဖြေရှင်းရန်အတွက် သျှမ်းပြည်ပြန်လည်ထူထောင်ရေးပါတီ၊ သျှမ်းပြည် တပ်မတော် RCSS/SSA နှင့် မြန်မာ့တပ်မတော်၊ အစိုးရ ၏ ငြိမ်းချမ်းရေးကော်မရှင် (PC) အဖွဲ့တို့နှင့် ယခု လ အတွင်းတွေ့ဆုံ ဆွေးနွေးရန်ရှိကြောင်း သတင်းရရှိသည်။

RCSS/SSA ၊ မြန်မာ့တပ်မတော် နှင့် အစိုးရ ၏ ငြိမ်းချမ်းရေး ကော်မရှင် PC တို့သည် ပိတ်ဆို့နေသည့် ငြိမ်းချမ်းရေး ကိစ္စကို ပူးပေါင်းဖြေရှင်းရန် ဇူလိုင် ၁၁ ရက်မှ ၁၂ ရက်ထိ တွေ့ဆုံ ဆွေးနွေးကြမည် ဖြစ်ကြောင်း RCSS/SSA အတွင်းရေးမှူး ၂ ဗိုလ်မှူးကြီး စိုင်းငင်း က သျှမ်းသံတော်ဆင့်ကို ပြောကြားသည်။

“ အခု တွေ့ဆုံမှုက အရေးပေါ် တွေ့ဆုံမှု တော့မဟုတ်ပါဘူး။ အရင် တခါကလည်း တွေ့ဆုံဆွေးနွေးခဲ့ပါတယ်။ အခု တခါလည်း တွေ့သင့်တဲ့ အခြေအနေ မို့လို့တွေ့ကြတာပါ” ဟု ဗိုလ်မှူးကြီး စိုင်းငင်း ကဆိုသည်။

မြန်မာ့တပ်မတော်နှင့် အစိုးရ၏ ငြိမ်းချမ်းရေးကော်မရှင်တို့နှင့် တွေ့ဆုံသည့် အခါ အဓိက အနေဖြင့် လက်ရှိ ငြိမ်းချမ်းရေး အခြေအနေကို ဆွေးနွေးကြမည် ဖြစ်ကြောင်း၊ ထို့ပြင် မိမိပြည်နယ် ဒေသရှိသည့် ပြည်သူလူထု ဖွံ့ဖြိုးတိုးတက်အောင် ပူးပေါင်းဆောင်ရွက်မည့် ကိစ္စများကိုပါ ထည့်သွင်းဆွေးနွေးသွားမည် ဟု ဗိုလ်မှူးကြီး စိုင်းငင်းက ထပ်လောင်း ပြောပြသည်။

“ မကြာခဏ တွေ့ကြတာကောင်းပါတယ်။ မတွေ့တာ မဆွေးနွေးတာ ထက်စာရင် တွေ့တာကောင်းတာပေါ့။ ဒါမှ တဖွဲ့နဲ့တဖွဲ့နားလည်ပြီး စစ်ပွဲတွေ တကယ်ရပ်တန့်နိုင်မယ်။ စားပွဲပေါ်တွေ့ဆုံဆွေးနွေးတာ ကောင်းပါတယ်” ဟု ဗိုလ်မှူးကြီး စိုင်းငင်းက မှတ်ချက် ပြုလိုက်သည်။

RCSS/SSA နည်းတူ တခြား တိုင်းရင်းသား လက်နက်ကိုင် တပ်ဖွဲ့များလည်း အစိုးရ၏ ငြိမ်းချမ်းရေး ကော်မရှင် PC နှင့် တွေ့ဆုံရန် ရှိကြကြောင်း သိရသည်။

ဇူလိုင်လ ၉ ရက်နေ့ကလည်း ကရင်အမျိုးသားအစည်းအရုံး KNU နှင့် အစိုးရ၏ ငြိမ်းချမ်းရေး ကော်မရှင် ( PC ) တို့သည် ရန်ကုန် မြို့ ရွှေလီလမ်းရှိ အမျိုးသား ပြန်လည်သင့်မြတ်ရေး နှင့် ငြိမ်းချမ်းရေးဗဟိုဌာန( NRPC) ရုံး၌ “ အလွတ်သဘောဆွေးနွေး ” တွေ့ဆုံခဲ့ကြသည်။