သင်္ကြန်ကာလအတွင်း ထိုင်းအစိုးရက ၄င်းနိုင်ငံအတွင်းရှိရွှေ့ပြောင်းအလုပ်သမားများအား နေရပ်ပြန်ခွင့် ၁ လ ခွင့်ပေးထားရာ ၅ ရက်အတွင်း မယ်ဆိုင်-တာချီလိတ်နယ်ခြားဂိတ်တနေရာတည်းတွင်ပင် နေရပ်ပြန် ရွှေ့ပြောင်းအလုပ်သမားများ တရားဝင်စာရင်းမှာ ၄ သောင်းနီးပါးရှိကြောင်းသိရသည်။
“ဧပြီလ ၅ ရက်နေ့ကနေ ၁၀ ရက်နေ့အထိ လူတော်တော်များများထွက်တယ်။ ဂိတ်စောင့်အာဏာပိုင်တွေ ဆီမှာသိရတဲ့စာရင်းအရ ၄၀၀၀၀ နီးပါး လို့ဆိုပါတယ် ။ ဒါတောင်မှ တခြား ဖြတ်လမ်းကနေပြန်တာမပါသေးဘူး စာရင်းက။ ထိုင်းအစိုးရခွင့်ပြုတဲ့ကာလထဲမှာဘဲပြန်ကြရမှာမို့လို့ အလုအယက် ပြန်ကြတာလည်းပါမှာပါ။ ”- ဟု တာချီလိတ်နေ ကုန်သည် စိုင်းဦး ကပြောသည်။
ထိုင်းနိုင်ငံအစိုးရက ဧပြီလ ၅ ရက်မှ ၃၀ ရက်နေ့အထိ ၂၅ ရက်အတွင်း ရွှေ့ပြောင်းအလုပ်သမားများအား နေရပ်ပြန်လည်ခွင့်တရားဝင်ပေးထားပြီးနယ်စပ်ကူးခ ၊ ဗီဇာ ပတ်စပို့တံဆိပ်တုံးထုကြေးပေးဖို့မလို ဟုလည်းကြေငြာထားသည်။ သို့သော် ဧပြီလ ၃၀ ရက်နေ့နောက်ပိုင်းမှ ပြန်လာသူများအား လဝကရုံးတွင် တံဆိပ်တုံးသွားထုရမည်ဖြစ်ပြီး ဘတ်ငွေ ၂၀၀၀ ကုန်ကျရမည်ဖြစ်ကြောင်းလည်း အစိုးရကထုတ်ပြန်ထားသည်။
ထိုင်းနိုင်ငံရောက် မြန်မာနိုင်ငံမှ ရွှေ့ပြောင်းအလုပ်သမားများ နေရပ်ပြန်နိုင်ရန် တရားဝင်ခွင့်ပြုထားသည့်နယ်စပ်လမ်း ၃ လမ်း (တာချီလိတ်-မယ်ဆိုင်လမ်း၊ ရယောင်း-ကော့သောင်းလမ်း၊ မြဝတီ-မဲဆောက်လမ်း) ရှိပြီး ၅ ရက်တာကာလအတွင်း အဆိုပါ လမ်းကြောင်း ၃ ခုမှနေရပ်ပြန်သူစာရင်းစုစုပေါင်း ၂ သိန်းခန့်ရှိကြောင်း ထိုင်းနိုင်ငံလုံးဆိုင်ရာ မြန်မာရွှေ့ပြောင်းအလုပ်သမားများကွန်ရက်က ပြောသည်ဟု 7 Day သတင်းတွင်ဖော်ပြထားသည်။
ထိုင်းနိုင်ငံအတွင်းရောက်ရှိအလုပ်လုပ်နေသော သျှမ်းပြည်သားအလုပ်သမား သိန်းနှင့်ချီရှိပြီး အများစုမှာ ချင်းမိုင်မြို့၊ လမ်းပွန်းမြို့တို့တွင်ခြံအလုပ်သမား၊ အိမ်အကူ ၊ ဆောက်လုပ်ရေး စသည်တို့တွင် လုပ်ကိုင်နေကြသည်။
Leave a Comments