သျှမ်းပြည်မြောက်ပိုင်း သီပေါမြို့နယ်အတွင်း နမ္မတူမြစ်ပေါ် တည်ဆောက်မည့် ရေအားလျှပ်စစ်စီမံကိန်းတွင် ပါ၀င်နေသည့် ပြင်သစ်ကုမ္မဏီ က စီမံကိန်းမှနှုတ်ထွက်လိုက်ကြောင်းသိရသည်။
ပြင်သစ်ကုမ္မဏီတခုဖြစ်သော France’s Joint Venture IPGRB ကုမ္မဏီက ဇန်နဝါရီလ ၂၉ ရက်နေ့က စီမံကိန်းမှ နှုတ်ထွက်ကြောင်းကြေငြာလိုက်ပြီး နမ္မတူမြစ်ပေါ် အထက်ရဲရွာရေအားလျှပ်စစ်စီမံကိန်းနှင့် ပတ် သက်တော့မည်မဟုတ်ကြောင်း၊ထို့အတွက် မိမိကုမ္မဏီနာမည်အား အမည်ပျက်စာရင်း Dirty List မှ ပယ်ဖျက်ပေးပါရန် Burma Campaign UK အား တောင်းဆိုခဲ့သည့်အကြောင်း အထက်ရဲရွာရေအားလျှပ်စစ်စီမံကိန်း ကန့်ကွက် ရေး လှုပ်ရှားနေကြသည့် သီပေါမြို့နယ်ဒေသခံများကပြောသည်။
တာ့လုံဒေသခံ နန်းလောဝ်ခမ်းက – “ ပြီးခဲ့တဲ့အပတ်က ကြားမိတဲ့သတင်းအရတော့ ကုမ္မဏီတခုတည်းဘဲရှိပါ သေးတယ် စီမံကိန်းကနေနှုတ်ထွက်ကြောင်းကြေငြာတာက။ ကျမတို့အရမ်းဝမ်းသာပါတယ်။ ကျန်တဲ့ကုမ္မဏီ တွေကိုလည်း အဲလိုဘဲနှုတ်ထွက်စေချင်ပါတယ်။ စီမံကိန်းကြီးကိုရပ်တန့်စေချင်ပါတယ် ”- ဟု သျှမ်းသံတော်ဆင့် အား ပြောသည်။
အထက်ရဲရွာ ရေအားလျှပ်စစ်စီမံကိန်းကြောင့် တာ့လုံရွာ ၂ ရွာစလုံးအား ရေလွှမ်းမည်ဖြစ်ရာ ဒေသခံလူထု ၆၅၃ ဦး၊ လိမ္မော်ခြံ၊ ရှောက်ချိုသီးခြံ ၆၃၇ ဧက၊ လယ်ယာမြေ ၁၄၀ ဧက အပြင် ယာမြေပေါင်းမြောက်များစွာ ရေဘေးသင့် အခက်ကြုံ ရမည်ဖြစ်သဖြင့် ဒေသခံများမှ အစဉ်မပြတ်ဆန့်ကျင်ကန့်ကွက်လာခဲ့ကြသည်။
၄င်းနှင့်ပတ်သက်ပြီး သျှမ်းလူ့အခွင့်အရေးမဏ္ဍိုင်က ပြောခွင့်ရ စိုင်းဟော်ရှဲန်က – “ ဟုတ်ပါတယ် သူတို့ နှုတ်ထွက်သွားပါပြီ။ အဲဒီအတွက် ကျနော်တို့ဝမ်းမြောက်ဝမ်းသာဖြစ်ရပါတယ်။ ဒီပြင်သစ်ကုမ္မဏီက အစ ကတည်းက ဒီစီမံကိန်းမှာမပါသင့်ပါဘူး။ဘာလို့လဲဆိုတော့ ကျနော်တို့နိုင်ငံရဲ့ နိုင်ငံရေး စစ်ရေးအခြေ အနေ ကမတည်ငြိမ်သေးဘူး။ အခွင့်အရေးချိုးဖောက်ခံနေရတာအများကြီးရှိသေးတယ်။ ကျန်တဲ့ကုမ္မဏီတွေလည်း ဒေသခံလူထုရဲ့အခက်အခဲတွေကိုနားလည်ပေးသင့်တယ်။ ပြီးတော့ အခုလိုစီမံကိန်းကိုရပ်ဆိုင်းပေးပါလို့ တောင်းဆိုချင်တယ် ” – ဟုသျှမ်းသံတော်ဆင့်အားပြောသည်။
၂၀၁၈ စက်တင်ဘာလက အဆိုပါအထက်ရဲရွာရေအားလျှပ်စစ်စီမံကိန်း ဘတ်ဂျက်တိုးမြှင့်ပေးရန်အတွက် လွှတ်တော်အတွင်း မဲခွဲဆုံးဖြတ်ရာတွင် လျှပ်စစ်ရေးရာဒုဝန်ကြီး ဦးထွန်းနိုင်က ကုမ္မဏီများအား စီမံကိန်း အတွက်ဆောက်လုပ်ရေးလုပ်ငန်းတွင် ယုံကြည်မှုရှိရန်လိုအပ်ကြောင်းပြောဆိုရာ ဂျာမနီ၏ Lahmeyer ကုမ္မဏီ၊ ဆွိဇာလန်နိုင်ငံ၏ Stuckey SA ကုမ္မဏီနှင့် ပြင်သစ်နိုင်ငံ France’s Joint Venture IPGRB တို့နာမည်များပါရှိပါသည်။
Burma Campaign UK သည် ဒေသခံလူထုအခွင့်အရေးထိခိုက်စေသော မြန်မာနိုင်ငံအတွင်းဝင်ရောက် ရင်းနှီးမြုပ်နှံသော ကုမ္မဏီတချို့၏အမည်စာရင်းများ Dirty List ကို ၂၀၁၈ နှစ်နှောင်းပိုင်းက ထုတ်ပြန်လိုက်သည်။ သဘာဝသယံဇာတအားထိခိုက်စေသောဆည် ၊ ရေအားလျှပ်စစ်စီမံကိန်း၊ ရွှေတူး ဖော်ရေး၊ သတ္တု ၊ကျောက်မီးသွေးတူးဖော်ရေးစီမံကိန်းများတွင် ရင်းနှီးမြုပ်နှံမှုပြုနေသော ကုမ္မဏီများ၏ အမည် စာရင်းများပါ ရှိကြောင်း သိရသည်။